Kulki Kaikanka 11 - DAWAN BÎLA AISKA

Dawan bui Israel luhpia nani ra wîna pibia pramis munisa

¹ Yu kum Israel luhpia nani ba Dawan mapara brukwi aisi kan, witin nani pât wahwi ba tâwan. Baha Dawan walan ba ra ai kupia sauhkan, bamna Dawan pauta klauhan ba witin nani purara blikan kauhan, bara watla nani ba angki âpu daukan.

² Bamna upla nani ba bal wini, Moses ra hilp makaban, bara witin hilpka dukiara Moses bui Dawan ra ai pura sunan bara pauta klauhan kata ba daswan.

³ Bahamna baha pliska nina ba Taberá mâkata, Dawan pauta klauhan ba bahara witin nani purara blikan bamna.

⁴ Witin ai tilara upla kiamka sât wala nani ailal bâra kan, baha nani ba plun piaia dukiara baman luki kan, baha nani mita Israel luhpia nani ba ai lâka ra brih wan, bara witin nani mahka ini aisin: “¿Ani wina yawan upan pibia?

⁵ Wan kupia krawisa Idsip ra yawan inska prisant pi kata ba, dus mâ sâtka nani sin yawan pi kan, pipian, milun, inian, gialik sin.

⁶ Sakuna nanara lika sanglang bla yawan pruisa, wan nakra ra diara wala kaikras naha manâ na baman.”

⁷ (Bara manâ ba lika kisura mâ baku kata, mapla ba lika lalahni awas mâka maplika baku kan.

⁸ Upla nani baha pliki wahbi bri kan, baha piaia. Walpa ra akbi piaki kan, baha ni turtiya dauki kan.

⁹ Bara tihmia ra diwas laya iwi kan, bara baha tilara manâ ba bal kauhi kan.)

¹⁰ Bara Moses walan, upla nani ba ai taya nani aikuki tint watla dimaika ra bûi ini banhwi kan ba. Bara Dawan sin lawi kan, bara Moses sin kaikan baha yamni apia kan.

¹¹ Bara Moses bui Dawan ra win: —¿Yang albikam sna na, dîa muni baku saura ai munisma? ¿Dîa namkra ra aitani apia sna ki? ¿Maipara dîa brisma, uplika nani na wirhika sut ba yang purira sunram ba?

¹² ¿Dîa uplika nani sut na yang luhpi sa ki, bara man ai wisma klamhkla ra brih waia tiala di tuktika baku, aisika nani ra yaia pramis munri ba tasbaya ra?

¹³ ¿Ani wina yang wîna sakamna naha uplika nani ra yaia? Yang ra ini ai wisa: ‘Wîna piaia aik.’

¹⁴ Yang yakan sip apia sna, naha uplika nani aihwaki kaikaia; warkka na maipara wirha pali sa.

¹⁵ Bara baku yang ra ai dauki kaia sma kaka, yang mamkabisna man namkra ra aitani ai kaikisma kaka, yamni kabia tasba wina mahka ai sâkma, bara yang naha pâtka nani ba kaikamna apia.

¹⁶ Sakuna Dawan pana Moses ra win: —Israel luhpia nani tila wina 70 waitna almuk nani paiws balbia, man kaikisma tawan uplika nani mita kulki, bîla wali nani ba, bara asla takaia tintka watla dimaika ra brih bal, bara bahara man aikuki bîli kaiki banhwi bas.

¹⁷ Yang bal iwamna bara bahara man wal aisamna, bara man spirit brisma ba wina wirâ brimna, baha witin nani ra sin yabamna bara witin nani sin hilp mai munbia upla nani karbanka ba twilkaia; baku lika man yakan kama apia.

¹⁸ Sakuna man upla nani ra wima: Yauhka yua ba sunu taki banhs, bara wîna pih banhma. Kan witin nani aisi ini kan ba yang, walri bamna: ‘¿Ya wîna piaia wankbia? Kasak pali yawan Idsip ra kau yamni kata.’ Aitani aisisa bamna, yang bui man nani ra wîna maikamna bara pih banhma.

¹⁹ Yu kumi, yu wâl, yu matsip, apia kaka yu matawalsip, yu yawanaiska baman lika pima apia.

²⁰ Sakuna kati kum pi kabia wis, kakma unta bâk takbia, ban ai âuya warbia ba kat. Kan man nani sika Dawan ba bahki kulkram bara witin mawan ra ini wiram: ‘¿Dîa muni Idsip wina wan sakan?’

²¹ Bamna Moses pana win: —Upla nani ba 600,000 yang wal wapi balan, bara man wisma wîna aitani aikaisma, yang nani kati kum pih banhwi kaia dukiara.

²² ¿Ani wina witin nani sîp nani, bîp nani ailal aitani ikaia sip kabia? Apia kaka, kabu ra inska nani bâra ba sut asla dauki yabia sin, witin nani sut aitani pibia apia.

²³ Bara Dawan bui Moses ra pana aisin: —¿Dîa Dawan ba karnika âpu sa ki? Nanara kaikma yang bîli ba aimakisa sapa, apia kaka aimakras sapa.

Almuk nani 70 ba prapit baku mahka sturi aisisa

²⁴ Bara Moses taki wih, upla nani ra maisa pakan Dawan bui witin ra win ba. Bara upla nani ba tila wina, waitna almuk nani 70 asla daukan, bara yan buan tint watla ba tnaya kir.

²⁵ Bara Dawan kasbrika ra bal iwan, bara Moses wal aisin; bara Moses ra spiritka ba wina wiria saki brih, spiritka ba almuk nani 70 ba ra sin yan. Spirit ba nan witin nani ra diman ba ra, witin nani sin prapit nani aisi baku aisin; sakuna baha takan ba baku kli takras.

²⁶ Bara upla nani tilara waitna wâl takaskan kata, kumi ba nina Eldad kata, wala ba nina Medad. Witin nani purara sin spirit iwan. Witin nani tint watla ra lika waras kan, sakuna upla nani tilara dahra aisi kan.

²⁷ Bara wahma kum plapi Moses ra wih aisin: —¡Eldad wihki Medad wal upla nani tilara dahra aisisa!

²⁸ Bara Jasua Nun luhpia ba, wahma wina Moses hilpika ba mita pana win: —¡Wihtki Moses, baha nani baha ba baku daukbiara wis!

²⁹ Bara Moses pana win: —¿Man bui yang tâiwan lawisma ki? Aitani kaia kan upla sut ba Dawan prapitka kata, Dawan spiritka ba witin nani sut purara kahban kan sa kaka.

³⁰ Bara Moses lika Israel almukka nani ba aikuki, upla nani ba tilara wan.

Pusal nani ba blikisa

³¹ Bara Dawan daukan pâsa kabu wina krawan, bara kabu wina pusal nani upla nani watla ra bri balan, tasba mawan âpu. Yu aiska kum wapaia pitka pusal ailal pali 3 pît pura aipaswan kan ban purara taibi wapaia praiska kata. Witin nani ai tasbaya aiska ra, ai watla nani tnaya kir ba pusal baman kan.

³² Bamna baha yua aiska bara tihmia aiska sin, upla nani ba pusal wahbi banhwan. Isti taukras kan nani ba usnun matawalsip wahban, wala nani lika kau ailal wahban, bara ai watla tnaya kir pami banhwan.

³³ Witin nani pusal wîna ba piaia kau wakabi kan, Dawan lawanka ba pat witin nani purara balan, bara upla ailal yan pruan.

³⁴ Bara baha pliska nina ba Kibrot-hataavá mâkan, baha tânka ba lika plun piaia brinka baman luki kan uplika nani bikan bamna.

³⁵ Bara Quibrot-hataavá wina kli impakan, Haserot ra balan, bara Haserot ra takaskan.