Kulki Kaikanka 10 - DAWAN BÎLA AISKA

Silbar ni paskan trumpitka nani ba

¹ Dawan ba Moses ra aisi, naku win:

² “Amar ni pruki silbar trumpitka wâl paskma, baha nani ba puhbi upla nani ba paiwbia, utla nani ba plis wala ra lakaia dukiara sin.

³ Trumpit nani ba wâlsut puhban kabia ba ra, upla nani ba sut man mamwanra asla takan kabia Dawan wal aisaia tintka watla dimaika ra.

⁴ Sakuna kumi baman puhban kabia kaka, Israel kiamka nani tâ uplika nani baman mamwanra balbia.

⁵ Trumpit nani ba karna puhbi bin tara dauki ba ra, lalma tani ra uplika nani ba mahka impakbia.

⁶ Kli aima wala ra karna puhbi bin tara daukbia ba ra, baha lika waupasa tani ra uplika nani ba mahka impakaia dukiara.

⁷ Ban sakuna, upla nani ba asla takaia baman paiwaia dukiara lika, bin tara dauki, kli kli puhban kabia apia.

⁸ Bara Eran luhpia prîs nani ba baman trumpit ba puhbi kabia, lâka ba baku ban kabia.

⁹ “Tasbayam ra waihla nani mita mai warbia, bara war aiklabaia mampara taki balbia kaka, trumpit nani ba karna pali puhma, bara yang Dawan Gâdkam bal, man nani tâmwan aimakaia kupi kraukbia, bara waihla nani mihta wina swaki mai sakamna.

¹⁰ Man nani lilia daukaia yua ra sin trumpit ba puhs, kati raya yua liliaka daukaia, daiwan aiska angkaia yua, Dawan wal kli uplika takaia yua. Bara baku yang bui man nani ra kupi krauki kamna. Yang sika man nani Dawan Gâdkam.”

Israel luhpia nani ba Sainai wina mahka impakan

¹¹ Idsip wina takan ba piua wina mani wâl kati sin wâl bara yu 20 aimakan ba ra, wal lâ daukan tintka watla pura ba wina, kasbrika ba purara bukan.

¹² Bara Israel luhpia nani ba Sainai wina upla iwras tasbaya ra mahka impakan, bara kasbrika ba Parán langnika kat takaskan.

¹³ Dawan bui Moses ra win ba baku, witin nani naha wina mahka impakan,

¹⁴ pas tâura lika Juda kiamka luhpia aiklaklabra nani daknika plakinka munhtara wapi kan, bara ai lalka baku Nahasón bri kata, witin lika Aminadab luhpia.

¹⁵ Isacar luhpia kiamka nani aiklaklabra nani tâura wihtka aimakan ba Natanael, Suar luhpia ba.

¹⁶ Zabulón luhpia kiamka nani aiklaklabra nani wihtka tâura aimakan ba Eliab, Helón luhpia ba.

¹⁷ Bamna baha nani tint watla ba slingban, bara Guersón luhpia nani wihki Merarí luhpia nani aikuki mahka twilki yabal ra impakan.

¹⁸ Baha nani ninara wapan, Ruben kiamka luhpia plakinka bri nani ba aikuki, ai aiklaklabra nani wihtka ai tilara bri kan ba, Eleazar, Sedeúr luhpia ba sin impakan.

¹⁹ Simian luhpia nani kiamka aiklaklabra nani tâura aimaki kan ba lika Selumiel, Surisadai luhpia ba.

²⁰ Gad luhpia nani kiamka aiklaklabra nani tâura aimaki kan ba lika Eliasaf, Reuel luhpia ba.

²¹ Baha nani ninara Quehat kiamka nani ba impakan, witin nani sika diara holi nani ba brih auya kan. Witin nani auya kan ba ra, tâura wan ba tint watla ba pat paski mâkan kan.

²² Baha nani ninara Efraín luhpia nani kiamka plakinka ba impakan. Aiklaklabra nani ba, witin nani tâura impakan, Elisamá, Amihud luhpia ba, baha nani wihta aimaki kan.

²³ Manasés luhpia nani kiamka, aiklaklabra nani wihtka ba lika Gamaliel, Pedasur luhpia ba.

²⁴ Benjamín luhpia nani kiamka aiklaklabra nani wihtka kan ba lika Abidán, Guidoní luhpia ba.

²⁵ Baha nani ninara Dan luhpia nani kiamka plakinka ba bri impakan. Aiklaklabra nani ba witin nani wihtka ba lika Ahiézer, Amisadai luhpia ba.

²⁶ Aser luhpia nani kiamka aiklaklabra nani wihtka ba lika Paguiel, Ocrán luhpia ba.

²⁷ Neftalí luhpia nani kiamka aiklaklabra nani wihtka ba lika Ahirá, Enán luhpia ba.

²⁸ Israel luhpia nani yabal ra impakaia lâka ba naku daukaia win kata, daknika kumi bani adarka ba kat.

Moses ai waikatka ra wisa, witin nani wal yula kahbi impakbia

²⁹ Yu kum Moses ai waikatka Hobab, Jetró luhpia Madián wina ba ra naku win: —Yang nani, Dawan aikaia win yaba tasbaya ra waia impakisna; kaisa yawan aikuki wap, bara yang nani yamni mai munamna, kan Dawan bui Israel ra yamni munaia ai pramiska sin daukan.

³⁰ Sakuna Hobab pana witin ra win: —Apia, yang tasbayi ra kli waia brin ai daukisa taiya nani bâra ba tilara.

³¹ Bara Moses pana win: —Yang mamkabisna ai swi wapara, kan man lika upla iwras tasbaya ra, ani kat utla mâkaia pliska ba kakaira sma; sip sma wan tâ briaia.

³² Man ba yang nani wal wama kaka, Dawan bui yang nani ra yamni ai munaia win ba aikbia ba ra, yang nani bui man ra sin yamni mai muni banhwamna.

³³ Witin nani baku Dawan ilka ba wina mahka yabal ra impakan yu yumhpa. Bara Dawan lâka auhban watla ba witin nani ai tâura bri impakan, anira takaskaia pliki banhwi kan ba kat.

³⁴ Witin nani ai watla mâkaia pliki kan ba ra, kakna ra kasbrika ba witin nani purara kan.

³⁵ Lâ watla ba mahka twilki impakuya ba ra, Moses naku aisi kan: “¡Dawanki, mahka bus! ¡Waihlam nani ba muns plapi yakabrira tawbia! ¡Kang mai kaiki, misbara mai kaiki nani ba plapi banhbia!’’

³⁶ Sakuna lâ watla ba takaskuya ba ra, naku aisin: “¡Dawanki, nanara kli taws, Israel aiklaklabra daknika ailal nani ba tilara!”