Kli Smalkanka 9 - DAWAN BÎLA AISKA

Prisant ba Israel wina apia, sakuna Gâd wina sa

¹ “Israel luhpia nani, wali banhs: piua balan sa man nani Jordan ba lui waia, bara mahka man nani wal nisan kau tara, kau karna nani tawanka nani kutbanka purara ba pura lui tawanka ba bris;

² ai uplika nani ba tara, yari Anac kiamka baku. Aisinka kum bâra ba man nani pat nu sma: ‘¿Ya sip sa waitna tara Anac kiamka mapara buaia?’

³ “Nanara kaikaia sma, Dawan Gâdkam man nani mamwanra wapisa pauta ami sasauhkra kum baku, man nani mamwanra baha nisanka nani ra sauhkbia. Bara man nani mita nakra klipan kumi ra kangbi sâkma, Dawan baku pramis daukan.

⁴ Dawan Gâdkam mita man nani mamwan wina witin nani saki lulkbia ba ra, man nani mânkam tilamra wipara: ‘Naha na wan dukia briaia kan ba wankan bara tingki, Dawan wina naha kuntri na wan pliska wankan’; kan witin nani saura daukan ba tâwan Dawan mita kangbi sakan.

⁵ Prisant nani ba dukiara apia man nani ra umpira mai kaikan, ai kuntrika ra man nani pliskam brisma ba. Dawan bui man nani mamwan wina saki lulkisa, witin nani ai saurka tâwan. Bara Ebraham ra, Aisak ra bara Jekob ra, man nani damikam nani ra pramis daukan ba daukbia.

⁶ Nu bas man nani kasak sma tâwan Dawan baha tasbaya disang ba maikras, kan man nani lika upla kum lamla karna sa.

Israel saurka Horeb ilka ra

⁷ “Âmya tiwbiara man nani upla iwras tasbaya ra, nahki Dawan kupia sauhkram ba. Idsip wina taki naha pliska kat balram ba, man nani lika kiamam karna kapram.

⁸ Horeb ilka ra pat Dawan kupia sauhki banhram, bara man nani mampara uya ai kupia sauhkan mita pat mai sauhki tikuya kan.

⁹ Yang il ra ulri walpa tanta ba briaia, lâ walpa tanhta ra man nani wal Dawan aisi daukan ba. Bara yang bahara kakna 40 bara tihmia 40 takaskri, plun piras, lî sin diras.

¹⁰ Dawan wina walpa tanhta wâl aikan witin pali ai mihta ni ulban bîla nani ba il ra witin bui man nani ra aisin ba, il ra pauta klauhan tila wina yawan sut asla aidruban piua ra.

¹¹ Yu 40 bara tihmia 40 ba luan ba ra, Dawan baha walpa tanhta wâl ba aikan, upla wal lâ daukan lâka ba,

¹² bara ai win: ‘Istikira naha wina iwi was, kan Idsip wina sakatma uplika nani ba tanis tawan sa. Lâika kat daukaia adar yabri ba isti pali swin sa, bara ayan slilki aidul kum paskan.’

¹³ “Dawan mita kli ai win: ‘Yang kaikisni naha uplika nani na lal karna pali sa.

¹⁴ Yabalki wina tnaya ra taws, yang bui witin nani ba sauhki tikaisna, ai nina ba sin tasba wina diki sakaisna; sakuna man wina lika, nisan wala nani man wal kau ailal, kau karna daukaisna witin nani ba wal.’

¹⁵ “Il wina bal iwri piua ra, baha lika klauhi kata ba, mihti ra bri aulna kapri lâ tatka walpaya wâl ba.

¹⁶ Kuna witin kaikan, man nani bui Dawan mapara saura daukram, bras slilki, bîp kum lilka paski dauki banhram, Dawan yabalka nina blikaia adarka maikan kan ba lulki swiram,

¹⁷ bara mihti ra walpa tanhta wâl bri aulna kan ba lulkri, man nani mamwanra baiki pîs ra daukri.

¹⁸ Baha ningkara Dawan mawanra luli krikri, piua wala dauki kapri ba baku, yu 40 bara tihmia 40 plun piras bara lî sin diras, man nani saura daukram tâwan, Dawan mapara bûi kupia sauhki banhram.

¹⁹ Yang sirang iwri Dawan ai kupia baiwanka man nani mampara param sakan ba kaikri sauhki mai tikaia buan ba ra, sakuna kau aima kum Dawan ba yang ra walan.

²⁰ Dawan bui Eran ra sin ai kupia sauhkan bara sauhki tikaia win, kuna yang bui witin ra aisari;

²¹ baha ningkara man nani paskram bîpka baha ni saura daukram ba yang briri, bara pauta ra lulkri, ningkara mil ra mangki wauhi auhya yuya baku dauki, il bîla albangkika ra yakabri.

²² “Taberá ra, Masá ra bara Quibrot-hataavá ra sin man nani bui Dawan traika kaiki kupia sauhki banhram.

²³ Bara Dawan bui adar maikan, Cadés-barnea wina taki kuntri witin mita maikuya ba pliskam brima, baku sin man nani ai lâka mapara kapram, kasak lukras, ai bîla walaia sin want apia kapram.

²⁴ Man nani ra mai kakaira takri piua wina, Dawan mapara man nani lamla karna sma.

²⁵ Dawan sauhki mai tikaia luki sirang mai ikan bamna, yang Dawan mawanra luli kriki makabri, yu 40 bara 40 tihmia

²⁶ puri suni makabi wîri: ‘Dawan, naha uplika nani ra sauhki tikpara, man uplikam, man ra tara mai kulkaia pri sakram, karnikam tara ni Idsip wina sakram ba.

²⁷ Albikam Ebraham, Aisak bara Jekob dukiara kupiam krauks. Naha uplika nani ra kupiam karna takan ba, watawika saurka dukiara kulkpara.

²⁸ Kuntri wina sakram ba dukiara witin nani naku aisin apia ba mata: Dawan yawan pramis wan munan kuntri wala ra wan brih waia wisi, sakuna witin sip apia takan bara misbara wan kaikan, bara baku upla iwras tasbaya ra wan brih balan yawan nâra pruaia.

²⁹ Witin nani ba uplikam sa, man dukiam sa, man Idsip wina mihtam karnika ni sakram nani ba.’