Kli Smalkanka 29 - DAWAN BÎLA AISKA

Moab ra Dawan ba Israel wal lâ daukan

¹ Naha lâka nani na sika Dawan mita Moses ra kli yaban kan Moab tasbaya ra, Israel luhpia nani ra smalkaia. Baha daukaia lâka na Horeb ilka ra pat witin nani wal aisin kan.

² Moses bui Israel luhpia nani sut asla dauki, bara win: “Man nani kaikram Idsip ra Dawan mita king fero ra dîa daukan ba, warkka dadaukra nani ra bara kuntrika aiska ra sin.

³ Bara baha traika kaikanka tara nani, sainka aihkakira nani kan ba baha nani witniska nani sma.

⁴ Sakuna nanara kat sin, Dawan mita maikras sa kupiam ra, bara sinskam ra baha tânka nani ba luki pliki kaikaia.

⁵ Bara upla iwras tasbaya nani bâk 40 mani ba yang tâm bri kapri, bara bahara kwalkam, sûskam dukiara aisaras kapram.

⁶ Brit, wain, diara laya nani sin piaia diaia maikras kan, bara Dawan ba man nani Gâdkam ba tânka bri kama dukiara.

⁷ “Yawan naha pliska ra balan ba ra, Sihón, Hesbón kingka, bara Og, Basán kingka nani wan mapara balan aiklabaia, sakuna yawan mita pura luan.

⁸ Bara ai kuntri yawan wan mihta ra bri, Ruben masraka nani ra, Gâd masraka bara Manasés masraka nani ra sin yabri.

⁹ Baha mita, naha lâka aisin na daukaia man nani alki bri trai kaiks, bara diara sut dauki kama piua ra yamni baman kabia dukiara.

¹⁰ “Naiwa man nani sut Dawan Gâdkam mawanra asla taki banhwisma: Israel kiamka masraka bani, almuk nani, wihta nani, Israel luhpia nani sut,

¹¹ tuktan nani, mairin nani, tringsar nani man nani tilamra iwi ba, pauta klaklakra nani ba wina, lî papanhkra nani ba kat.

¹² Man nani wal naiwa pramis dauki swer takaia sma, Dawan Gâdkam nani wal lâ daukan ba dukiara.

¹³ Naiwa baha lâka bapisa man nani ba witin ai uplika nani, witin bui man nani Gâdkam, damikam nani Ebraham, Aisak bara Jekob ra pat pramis daukan kan ba baku.

¹⁴ Sakuna naha lâka man nani aikuki dauki swer takan na Dawan lika man nani aikuki baman daukras,

¹⁵ ban sakuna wala nani naiwa mawanra bara lamara âpu nani ba aikuki sin.

¹⁶ Man nani pain tânka brisma nahki yawan Idsip ra iwi kan ba, bara wan yabalka ra sin nisan nani tilak lui waia kan ba;

¹⁷ bahara yawan kaikan gâd kuninkira nani aidul nani dus ni paskan, aitani kulkanka âpu ba, walpa, silbar bara gul ni paskan, baha uplika nani mayuni ba.

¹⁸ Man nani tilamra waitna, mairin, utla bîla uplika, masrakam kra, apia kaka kiamka kra, Dawan wan Gâdka ra lulki swibia apia, baha nisanka gâdka ra mayunaia dukiara. Man nani tilam wina kumi sin dus kum wakia tahplira ba, puisinkira ba baku takpara.

¹⁹ “Bara naha swer taki aisin bîla na walan ba ningkara, man nani tilamra lukisa witin ba uba yamni sa, bara lukbia: ‘Diara sut yang ra pain takbia, yang dîa brin ai dauki ba kat luki daukamna ba.’ Bara diara saura taki aisawbia ba, baha uplika ba tâka kabia.

²⁰ Dawan baha pâtka ban swi tikaia wilin apia kabia, sakuna witin ai lawanka tara, ai kupia baiwanka baha uplika purara lahtuban kabia, bara witin purara saurka aiska naha wauhkataya ra ulban ba kauhbia. Bara Dawan mita tasba mawan wina, witin kiamka ba diki sâkbia.

²¹ Naha lâka wauhkataya ra ulban ba baku, Dawan mita baha uplika ba, Israel luhpia nani masraka tila wina tnaya ra laki swira lâka ra swibia.

²² Man nani ninamra kiamkam wala nani yauhka balbia ba, bara tringsar nani kuntri wihka wina balbia ba, baha nani kaikbia Dawan mita siknis yula saura nani bara siknis sâtka nani naha tasbaya purara blîkbia ba;

²³ kuntri aiska ba kaikbia tasbayam ba sulpa, sâl, tasba baman ami tiwbia. Baha tasbaya ra diara mangkaia sip apia kabia, diara ai mâ sin sâkbia apia; twi sin pâwbia apia, Sodoma, Gomora, Adma bâra Seboím ra Dawan ai kupia baiwanka prautka ra sauhki tikan ba baku kabia.

²⁴ “Baku bamna, tasba aiska ba mita makabi walbia: ‘¿Dîa muni Dawan naha uplika nani ra naku daukan? ¿Dîa kan uba pali ai kupia baiwanka ba blikan?’

²⁵ Bara pana wibia: ‘Dawan Gâd bui man nani damikam nani wal Idsip wina sakan piua ra lâ daukan kan lâka ba, witin nani lulkan ba mita.

²⁶ Bara witin nani gâd kum kaikras kan yaba, diara sin yabras kan ba mawanra bawi mayunan.

²⁷ Baha mita Dawan ai kupia baiwanka ba naha tasbaya ra blikan, ba ra lahtubanka sâtka sut naha wauhkataya ra ulban ba witin purara batakan.

²⁸ Bara ai kupia baiwanka ni ai kuntrika wina saki lulkan, ai lawanka tara ni sin kuntri wala ra lulkan, naiwa yua ra taki ba baku.’

²⁹ “Diara nani bâra sa yawan tânka briras: baha nani ba Dawan Gâd dukia sa. Sakuna diara nani yawan ra marikan bara wan luhpia nani ra sin mariki ba, baha lika piu bani ra alki daukaia sa naha lâka nani na.