Kli Smalkanka 25 - DAWAN BÎLA AISKA

¹ “Upla nani unsaban bâra sa kaka, wihta nani mawanra balbia, bara wihta nani mita param sâkbia pâtkas ba, bara pâtkira ba pât ra laki swibia.

² Wihta bui pâtkira ba yaka ai mawanra aimakupbia, bara adar yabia wipaia, witin ai pâtka ba mana.

³ Trabil kum daukan tâwan wipaia kaka 40 klala wina kau luaia apia, tawan uplika ba klala latwanka wahwaia tâwan bara man nani mamwanra ai swira kaia dukiara.

⁴ “Bîp wainhka plawar mâ taibi piua ra, bîla ba diara ni priskpara.

Ai masaya ba ai maya briaia lâka ba

⁵ “Muihni wâl utla kumi ra dimi kan, bara kumi ba luhpa sakras pruya, piarkika ba waitna wala wal sip bribia apia. Sakuna ai maya kan ba muihnika ba ai maya bribia, baku ai masaya lâka ba kulki kaia.

⁶ Luhpia waitna pas aisubi takbia ba, aisika pruan ba nina yabia, baku witin nina ba Israel ra tiwbia apia.

⁷ Sakuna waitnika ba ai masaya wal briaia apia wibia kaka, mairka ba bui almuk nani lâka mawanra bri si wibia: ‘Yang maisaya na want apia sa ai muihni nina ba Israel ra kaia ba.’

⁸ Bamna tawan almukka nani mita paiwi witin ra aisabia, bara waitnika mita wibia wal briaia apia;

⁹ bara masaikika ai lamara wih, tawan almukka nani mawanra, sûska ba ai mina wina daiki, mawan ra yabalaya tuhbi bara wibia: ‘Baku daukisa waitna kum ai muihni ra ai kiamka swiaia want apia ba.’

¹⁰ Bara Israel aiska ra, ai taika nani ra Sûskas taika nani kulki kabia.

Lâ wala nani

¹¹ “Waitna wâl aiklabi kaka, kum mairka ba ai maya ra dakbi sakaia bal nina mapa wina waihla ra alkbia kaka,

¹² man nani bui alki umpira kaikras kira mairka ba alki mihta ba klaki daks.

^13-14 “Pakitkam ra paun tara bara sirpi sin bri kapara, kulki kaikanka kunin ba sin apia.

¹⁵ Ban sakuna, paun munan kasak kaia, Dawan Gâdkam bui kuntrika maikaia ba ra mani ailal raya kama dukiara.

¹⁶ Kan Dawan bui kasakka lâka daukras uplika ba ra saura kaikisa.

Amalec ra âpu daukaia adarka ba

¹⁷ “Idsip wina taki man nani yabal ra kapram piua ra, kupiam krawisa Amalec uplika nani dîa daukan ba.

¹⁸ Kupiam krawisa Gâd sibrinka sin âpu, man nani yabal ra wapi swapi tayat takram kan, puramra bal rau mai sauhkan ba. Bara swapni takan nani kan ba nina saitku bal, rausauhkan bara ninara ban takaskan.

¹⁹ Dawan Gâdkam bui kuntrika man nani dukiam maikbia ba ra, waihlam nani wina dakbi mai sakan bara ris brima piua ra, tasbaya ba wina Amalec uplika nani lukanka ba diki sâkma. ¡Man nani âmya tikpara!