Kli Smalkanka 20 - DAWAN BÎLA AISKA

War lâka nani

¹ “Waihlam mapara man nani war aiklabaia taki wama ba ra, kaikrika witin nani ba aras nani, war aiklabaia waginka nani aikuki bara war aiklabaia daknika ailal brih aula kaka, si bripara, kan man nani lika Dawan Gâdkam wal sma, Idsip wina mai sakan ba.

² Bara aiklabaia awarka aimakbia piua ra, prîs bui aiklaklabra daknika ra tâ bribia,

³ bara wibia: ‘Wals, Israel luhpia nani, naiwa man nani waihlam mapara aiklabaisma bamna, swapni taki sîa yapara, tatatwi sirang sin iwpara,

⁴ kan Dawan Gâdkam ba man nani wal sa; baha mita witin bui man nani waihlam mapara aiklabi pura lui maikbia.’

⁵ “Ningkara lalka nani ba aisi bara wibia: ‘Man nani tilam wina upla kum kra utla raya kum paski kau bâra dimras sa kaka, sip sa ai watla ra dimaia, ban kra sip sa war ra pruaia bara upla wala baha watla raya ba ra dimbia.

⁶ Upla kum kra bâra sa, man nani tilam wina wain nasla daukan bara baha nasla wina kau diras kaka, sip sa ai watla ra tawi waia, ban kra sip sa war ra pruaia bara wainka nasla ra mâ nani ba upla wala wahbia.

⁷ Upla kum kra ai maya takaia pramis daukan ba wal kau briras kaka, sip sa ai watla ra waia, ban kra sip sa war ra pruaia bara pramis munan ba wahma wala wal bribia.’

⁸ “Ba ningkara lalka nani ba kli aiklaklabra tâ bri nani ba ra wibia: ‘Upla kum kra kupia karna apia, sibri upla wala ra sibrin dingkisa kaka, ai watla ra wabia.’

⁹ Bara lalka nani ba aisi lubia taim, kiaptin nani ba aiklaklabra nani tâura aimakbia.

¹⁰ “Man nani tawan kum lamara aiklabaia dukiara dimi auma ba ra, tâura kupia kumi lâka pas wins.

¹¹ Tawanka uplika nani ba aitani lukisa kaka kupia kumi lâka ba briaia bara mai swika man nani dimi wama, baku kaka wark karna nani sut ra man nani albikam kabia.

¹² Sakuna witin nani kupia kumi lâka ba want apia wisi bara war aiklabaia wibia kaka, man nani mita tawanka ba kutbi kir bri rausauhki banhma.

¹³ Dawan Gâdkam mita baha tawanka aiska man nani mihtam ra mangkbia, bara sord ni iki âpu daukma.

¹⁴ Dawan Gâdkam mita man nani waihlam baha tawanka bilara ba wina, mihta dakbi mairka, tuktika bara daiwra nani sut maikbia, baha wina pih aibanhwi liliam takma.

¹⁵ Baha tawanka uplika nani nisanka nani man nani iwisma ba wina laihura iwi nani ba ra sin baku daukma.

¹⁶ Sakuna Dawan Gâdkam mita baha nisanka nani tawanka wina man nani dukiam maikbia ba ra, diara kumi sin raya swipara.

¹⁷ Ban sakuna, Dawan dukiara sakripais kum baku sauhki tiks hitita nani, amorreo nani, Kenan uplika nani, ferezeo nani, heveo nani bara Jebús uplika nani sut, dîa mai win ba kat daukma,

¹⁸ bara baku witin nani ai gâdka bahki nani ra mayuni diara saura nani dauki ba mai smalkbia apia, bara mai munbia Dawan Gâdkam mapara saura daukaia.

¹⁹ “Man nani tawan kum ra dimaia sma kama kaka, man nani piu wihka kutbi bri kaia sma. Dus nani mâ bri ba asa wal klakpara, kan baha ba man nani patam kabia, baha nani ba dus wail sa, upla âpu sa man aiklabisma ba mampara aiklabaia.

²⁰ Ban sakuna, dus mâ âpu nani ba lika klaks, kan baha ba man nani aiklabisma ba kainam kahbaika kabia, baha tawanka man nani mihtam ra aimakbia ba kat.