Kli Smalkanka 19 - DAWAN BÎLA AISKA

Yukuwaia tawanka nani

¹ “Dawan Gâdkam mita nisan nani nanara ai tasbaya bri ba sauhki tiki, bara man nani ra maikbia pliska ba briaia, bara man nani baha tawanka ra watla nani ba brima ba ra,

² Dawan Gâd mita kuntrika maikaia ba wina, tawan yumhpa aihka saki swis,

³ bara yabalka nani ba wapni dauks. Baha purkara, tasbaya Dawan Gâdkam mita pliskam maikaia ba, pîs yumhpa baiki sâks. Ani uplika bui upla kum ra ikbia kaka, baha tasbaya kum ra wih yukuwbia.

⁴ Bara kaikisa witin nani wal ai waihla apia kan ban ikan ba ra, ikan uplika ba sip sa tawan nani ba wina kum ra plapi swakwaia dukiara.

⁵ Ban kra wibia kaka naku: upla kum kra ai pâna wal unta ra pauta klakaia wan, bara asa ba wauhan taim, asa ba daiwi pânika ba ra klakwan, bara pânika ba pruan sa kaka, sip sa baha tawanka nani kum ra pliki ai rayaka swaki sakaia.

⁶ Yabal ba laihura sa kaka, pruan ba taika kum kau asla ba mita, pana munaia lukbia bara sip sa ai kupia baiki nina bliki ikaia, sakuna kasak tânka kat ba, aitani apia kan ikaia, kan kainara ai waihla apia kata.

⁷ Baha mita, yang mai wisna tawan yumhpa kum aihka sâks,

⁸ bara Dawan Gâdkam mita man nani tasbayam ba kau tara kulki, tasbaya pîska aiska ba, man nani damikam nani ra pramis munan kan ba baku maikbia kaka,

⁹ baku bamna man nani kau tawan yumhpa pura praks, yukuwaia tawanka pat yumhpa brisma ba purara (piua bani ra naha lâka nani naiwa maikisna na trai kaikisma ba ra, wibia kaka, Dawan Gâdkam ra latwan kaiki bara ai yabalka nina bliki bas).

¹⁰ Naha baku natka ra Dawan Gâdkam bui kuntrika man dukiam maikbia ba ra upla pâtkas tâlia sâkma apia, bara man puramra upla kum pruan trabilka balbia apia.

¹¹ “Sakuna upla kum upla wala wal ai waihla sa bara nina bliki alki ikuya kaka, baha ningkara yukuwaia tawanka ra dimi yukuwbia kaka,

¹² baha tawanka ra almukka nani ba mita adar yabia bara alki ikan ba taika nani ra yabia, bara pana ikaia pâtka ra lakbia.

¹³ Kupiam ra umpira lukpara, bara baku lika Israel ra tala pâtkas laikbia apia. Baha mita diara sut ba pain kabia.

¹⁴ “Dawan Gâdkam kuntrikam maikbia ba ra, upla tasbaya piarkika ba kulkan kabia, kainara dauki kan ba baku.

Witnis kuninkira nani lâka ba

¹⁵ “Upla kum saura daukan, apia kaka swakwanka dukiara, witnis dahra kwakwahkra kumi baman lika aitani kabia apia. Dahra kwakwahkra ba wâl, apia kaka yumhpa kaka lika, ai witniska ba aitani kulkbia.

¹⁶ “Rugkira kum bal upla kum witniska kunin aisisa, bara swakwanka dukiara dahra kwahkisa kaka,

¹⁷ bara unsabanka uplika wâlsut Dawan lamara kaiki ba ra brih balbia, bara prîs nani, wihta nani baha yua ra wark dauki kabia mawanra sin.

¹⁸ Bara wihta nani mita trabilka ba tânka laki kaikbia, bara witnis kuninkira mita upla wala dahra kwahki ba baku apia sa kaka,

¹⁹ wala dîa prais rau munaia wan kan ba baku witin ra rau munan kabia. Baku lika man nani tilamra saurka bâra ba, âpu daukbia.

²⁰ Bara wala nani baha tânka bribia ba ra, witin nani sibrin daukbia, bara daukanka saura nani ba daukaia trai kaikbia apia.

²¹ Man nani umpira kaikpara: rayaka ba rayaka mana sâks, pana nakra pana nakra, pana napa pana napa, pana mihta pana mihta, pana mina pana mina mana aibaps.