Kli Smalkanka 18 - DAWAN BÎLA AISKA

Prîs bara Libait nani raitka nani ba

¹ “Libai kiamka wina prîs warkka ra mangkan nani ba, wibia kaka Libai kiamka sut ba, witin nani Israel tasbaya ra tasba briaia apia sa. Sakuna sakripais nani Dawan ra yabi ba, Dawan briaia sakripaiska nani ba witin nani ra yabi kabia.

² Witin nani ba, uplikam wala nani baku ai tasbaya bribia apia, kan Dawan aisin ba baku, Dawan ba witin nani ai prapatika kabia.

³ “Upla nani, bîp nani sîp nani sakripais dauki ba wina prîs nani briaia ai raitka bri ba: nina dusa ba, kmakmaya ba, kuhma ba,

⁴ plawar nani mâ tawahkia wina, wain wina, batana laya, bara sîp nani tawahkia tâwa wina sin;

⁵ kan Dawan Gâd mita witin nani ba kiamka nani sut tila wina bâk sakan sa, Dawan dukia nani main kaikaia, witin bara ai luhpia nani sin.

⁶ “Libait kum, Israel man nani uplikam tawanka tilara ba wina brin daukisa kaka Dawan bui plis aihka sakan ba ra balaia,

⁷ bahara Libait nani Dawan warkka dauki ba baku, sip sa Dawan nina ra bahara prîs warkka ra mangkaia.

⁸ Bara witin nani sin plun nani wina ai sirka bribia wala nani bri ba baku, baha purkara, papika prapatika nani wina sin bribia.

Idan uplika nani mapara smalkan ba

⁹ “Dawan Gâdkam bui baha kuntrika maikaia win ba ra dimma taim, nisanka daukanka saura nani wal prawpara.

¹⁰ Man nani wina kumi sin luhpiam pauta ra bri si sakripais dauki yapara, dahra pliki saki warkka sin daukpara, kainara dîa takaia ba aisi wipara, sukia warkka sin daukpara,

¹¹ yabaki kaiki uplika wal, dahra saki aisi uplika, bara yapi kaiki piritka uplika wal sin tânkam pliki kaikpara, pruan nani piritka aikuki sin apia.

¹² Naha dukia dauki uplika nani ra Dawan mita saura kaikisa. Bara Dawan Gâdkam man nani mamwan wina naha nisanka nani ra kangbi saki ba, kan baha daukanka saura bâra ba mita sika.

¹³ Man nani Gâdkam wal asla wapni kaia sma.

¹⁴ Man nani naha tasbaya briaisma nisanka nani ba, diara mangki kaiki bara yapi kaiki naika dîa takaia dahra aisi ba uplika nani aisi witin nani rait kulkisa, sakuna Dawan Gâd bui man nani ra adar maikras man nani baku daukaia.

Prapit kum balaia kan ba

¹⁵ “Dawan Gâdkam mita prapit kum yang baku man nani tilam wina maikbia, bara man nani lika witin ra bîla walma.

¹⁶ Naha na man nani lukankam pali sika, Horeb ilka ra sut asla taki makabi bara wiram: ‘Yang nani kli Dawan wan Gâdka bîla baikra walaia apia, naha pauta klauhan na sin kaikaia want apia, pruaia apia dukiara.’

¹⁷ Bamna Dawan bui ai win: ‘Witin nani aisi ba pain sa.

¹⁸ Yang yarka witin nani ai uplika tila wina prapit kum takbia man baku, bara yang dîa wiaia adar yabamna ba baha ba witin aisi kabia, wibia bara kli sin wiaia.

¹⁹ Bara ani uplika naha prapitka yang nini ra aisabia ba walras kaka, pâtka ba yang bui witin ra kahbamna.

²⁰ Sakuna prapit ra, yang diara wiras kapri nini bri aimayuni aisi ba, apia kaka gâd wala nani nina brih aisi ba, witin ba pruaia pâtka ra lakan kabia.’

²¹ Bara man nani kupiam ra lukma: ‘¿Yawan nahki wan tânka bribia aisanka ba Dawan bîla apia sapa?’ Man nani naha na damra wali bas:

²² Prapitka Dawan nina ra aisin ba baku takras kaka, tânka ba Dawan bui witin ra wiras kan, sakuna prapit ba kaiki ban aisin mayunra lâka ra, baha mita man nani sîa yapara.