Kli Smalkanka 15 - DAWAN BÎLA AISKA

Traska swin tiwan manka ba

¹ “Tras nani maikaia ba, 7 mani alkbia taim swis tiwbia.

² “Bara mana aibapaia apia tânka ba naha sa: Upla bani ai uplika ra diara kum kra lin takan kaka, lin takan uplika ba ra traska ba kulkbia apia. Ai uplika ra, apia kaka ai tawanka uplika ra sin aibapaia dukiara taibi munaia apia, kan traska ban swih tikaia manka ra Dawan ra mayunra daukbia piua ra baha aisin kabia.

³ Tringsar nani ra lika taibi munaia sip sma, lin munram ba maikaia; sakuna tawankam uplika man wina brin ba lika swirka tiwbia.

⁴ Baku lika man tilamra umpira nani âpu kabia, kan Dawan Gâdkam witin bui yamni mai munbia, baha kuntrika maikaia ba ra,

⁵ naiwa naha lâka nani yang bui man nani ra maikisna na, main kaiki bara daukaia trai munma kaka.

⁶ Âu, Dawan Gâdkam yamni mai munbia, pramis mai munan ba baku, bara nisan ailal ra lin munaia bri kama, sakuna pana man mita lika lin takma apia; nisan ailal ra minam ra taibi brima, sakuna man nani ra mai taibia apia.

⁷ “Dawan Gâdkam mita kuntrika maikuya ba tasbaya ra upla kum kra bâra sa, umpira man nani uplikam tilara, kupiam karna dauki uplikam diara âpu ba mapara mihtam prakpara;

⁸ sakuna kupiam aiska kira dîa brin dauki kabia ba lin muns.

⁹ Naha lukanka saura na kupiam ra bripara: ‘Mani 7 upla traska ban swih tikaia manka ba pat baila sa,’ bara man uplikam umpira bâra sa kaka, mamwan saura dauki diara kumi sin lin munras kama kaka, witin mampara winanka daukbia, Dawan ra sin, bara baha daukanka ba man ra saurka baku mai kulkbia.

¹⁰ Wirha mai taibras kira ban hilp muni bas, kan baha daukisma mita diara sut daukma ba ra Dawan Gâdkam yamni mai muni kabia.

¹¹ Upla umpira nani ba danh takbia apia naha tasbaya ra, bara baha mita yang mai blikisni, man nani mihtam param kama, man nani kuntrikam ra uplikam nani umpira pâtka wahwi ba aikuki.

Alba nani lâka ba

¹² “Man uplikam Hibru nani, waitna bara mairin kra alba kaia man ra mai atkuya ba, mani kumi baman warkkam takbia; mani matlalkahbi pura kumi alkbia ba ra, pri swis mahka wabia.

¹³ Bara mahka blîkma taim, mihta bîla baman lika blîkpara,

¹⁴ ban sakuna daiwram daknika nani wina yas, bara plawar wihki wain sin ailal yas; wibia sa kaka, Dawan Gâdkam dîa yamnika maikan ba wina aikuki sir muni bris.

¹⁵ Âmya lap tikaia apia, man sin Idsip ra alba kapram ba, bara Dawan Gâdkam pri lâka maikan, baha mita nanara yang naha adarka maikisni.

¹⁶ “Sakuna albikam ba mai wibia man ra, wamtla suliarka aikuki yamni munram ba tâwan, latwan mai kaiki bara waia apia wibia kaka,

¹⁷ bara man silak kum brih witin kiama ba man durkam ra praki sabi unta krauki swima, bara baku witin ba man albikam kabia prubia ba kat. Albikam mairin sin baku wibia kaka, baku dauks.

¹⁸ Saura lukpara man albikam ra pri swirka waia, kan witin 6 mani warkkam takan; wark uplika ai mana bakriki praiska man aibapaia kapram ba, witin hilp mai munan sa. Baha purkara, diara sut dauki kama ba Dawan Gâdkam yamni mai munbia.

Daiwan wainhka tawahkia nani holikira sakaia

¹⁹ “Daiwan wainhka tawahkia, bîp, apia kaka sîp nani wina aisubi takbia ba, Dawan Gâdkam dukiara holikira kulkaia sma. “Bîp luhpia wainhka tawahkia aisubia ba wark dingkpara, sîpkam luhpia tawahkia ba sin tâwa irpara.

²⁰ Tamya nani aikuki mani bani asla taki Dawan Gâdkam, witin plis kum aihka sâkbia ba ra pi bas.

²¹ Sakuna witin pât kum brisa kaka, mina kum kunhku sa, apia kaka nakra âpu, apia kaka diara kum kau âpu sa kaka, Dawan lamara brih wapara.

²² Man nani sut nâra iwisma ba, tawankam uplika nani aikuki wîna ba piaia sip sma, man nani puram suni klin takram, apia kaka kli takras sma, sakuna sula bara snapuka wîna pi ba baku sip sma piaia.

²³ Sakuna ai tâlia lika pipara, tâlia ba tasba ra lî baku laiks.