Kli Smalkanka 14 - DAWAN BÎLA AISKA

¹ “Man nani ba Dawan Gâd luhpia nani sma. Upla kum prubia kaka, baha dukiara lamla kusbi wînam ra klakpara.

² Kan man nani ba Dawan Gâdkam mihta ra mangkan uplika nani sma; witin mita naha tasba ra iwi uplika nani sut tila wina aihka mai saki yamni mai kulkan sa, witin ai dukia kaia.

Daiwan klin bara tâski nani

³ “Tâski kulkan dukia kumi sin man nani pipara.

⁴ “Naha sât daiwra man nani sip sma piaia: bîp wainhka, sîp, guts,

⁵ sula, snapuka, sula sâtka aringka yarira, guts wail bara sula sâtka wala nani sut ba.

⁶ Bamna wakabi daiwra nani, asmala bri nani, mina asmala baikan bri ba sut piaia sip sma.

⁷ Sakuna naha daiwra nani man nani piaia apia, wakabi pi daiwra kabia, asmala bri kabia, asmala baikan ba sin: “Kiamil, bangbang bara bangbang tara; naha daiwra nani na tâski kulkaia sma, kan baha nani wakabisa kuna mina baikras.

⁸ “Kwirku ba tâski kulkaia, asmala baikan brisa kuna wakabras. Baha ba tâski kulki banhwaia sma. Naha daiwra wînka pipara, wîna pruan ba sin kangpara.

⁹ “Daiwan nani liura tauki ba sip sa piaia, lahpatka bara taya nani sin bri ba,

¹⁰ sakuna lahpatka bara taya nani âpu ba lika pipara; baha nani ba tâski baku kulkaia sma.

¹¹ “Daiwan tnawira nani klin ba sip sma sut piaia,

¹² sakuna daiwan nani tila bâra sa man nani piaia apia sma ba: yakal, krakra, kaku,

¹³ yakal sâtka wala, tritri sâtka nani sut,

¹⁴ usus sâtka nani bâra ba,

¹⁵ daiwan tnawira yahpa tara ba, wauya, krikam, tritri sâtka nani sut ba,

¹⁶ iskri, yami, klukum sâtka wala,

¹⁷ iskri sâtka, kaku sâtka wala,

¹⁸ suk tara, tuskrana bara sakangki.

¹⁹ “Daiwan sirpi sut tnawira ba tâski kulki man nani pipara.

²⁰ Sakuna daiwan klin kulkan nani ba lika man nani piaia sip sma.

²¹ “Man nani ba tawan uplika kum, yamni mai kulkan sa Dawan Gâd dukiara; daiwan pruan kaka, kumi sin man nani pipara, sakuna upla tringsar nani man tawankam ra iwi nani ba ra yabaia sip sma, witin lika piaia sip sa. Bara tringsar nani impaki ba ra sin atkaia sip sma. “Guts luhpia ai yapti tialka laya ra ba pipara.

Matawalsip mânka dukiara smalkan ba

²² “Mani bani patam mâ nani dâkma ba wina, takaskras kira matawalsip yabaia mânka nani ba tnaya ra laki swi bas.

²³ Witin ai nina bâra kaia pliska aihka sâkbia ba ra man nani plawarkam, wainkam, batankam laya matawalsipka nani, bara bîpkam, sîpkam tawahkia nani wîna bahara man nani Dawan Gâdkam lamara mai kaiki ba ra pis, baha pliska witin bâk sakan ba ai nina bâra kaia mata, bara lan takma witin ra ban tara kulki kaia dukiara.

²⁴ Bara Dawan bui man nani ra yamni mai munbia kaka, sakuna yabal laihura wapaia sma kaka matawalsipkam mânka nani brih waia sma ba dukiara Dawan ai nina bâra kaia pliska aihka sakan ba wina man nani laihura iwisma ba tâwan,

²⁵ bâra mika man nani matawalsipkam mânka nani ba atki, bara atkram lalahka ba Dawan ai nina bâra kaia pliska aihka sakan ba ra brih wama.

²⁶ Bara baha lalahka ni bahara man nani diara kau aitani lukma ba atki banhma: bîp wainhka, sîp wainhka, apia kaka wain, diara laya swahwi ba, man nani dîa want sma ba bahara Dawan Gâdkam lamara mai kaiki ba ra tamya nani aikuki lilia dauki pima.

²⁷ “Libait nani man nani tilamra iwbia ba man nani lulki swipara, kan witin nani ra man nani ra tasbayam maikan ba baku tasbaya yabras bamna.

²⁸ “Man nani mani yumhpa bani patam mâ nani wina matawalsip mânka yabaia sma ba, tawanka ra kulki saki watla ra auhbi swi bas.

²⁹ Bara Libait nani tasba briras kan ba balbia, apia kaka tringsar nani, rau nani, piarka nani sin, sip kabia ai âuyapah piaia. Baku Dawan Gâdkam bui dîa sut daukma ba yamni munbia.