Kli Smalkanka 10 - DAWAN BÎLA AISKA

Lâ kli raya daukan ba

¹ “Bamna Dawan bui ai win: “Man walpa tanhta wâl klaks, pas kata baku. Lâ auhbaia watla sin kum dauki bara il ra uli was yang wal aisaia.

² Yang ulbaisna tâura ulban bîla nani kan ba, man baikatma ba, bara lâ auhbaia watla ra mangki main kaiki bas.”

³ “Baku bamna, akasia dusa ni lâ auhbaika watla kum paskri, bara walpa tanhta wâl klaki brih il ra uli wari.

⁴ Bara Dawan ba walpa tanhta ra Lâ nani Matawalsip ba ulban, tâura ulban kata ba baku, il ra pauta klauhan lilapas wina man nani ra mai wisata ba baku yawan sut asla kan piua ra yang ra aikan.

⁵ Bara yang il wina bal iwri; ningkara, Dawan bui yang ra adar aikan ba baku, walpa tanhta ba lâ auhbaika watla ra mangkri, naiwa kat kau baha nani bâra sa.

⁶ (Israel luhpia nani ba Beerot-bené-jaacán wina taki Moses ra waia impakan. Bahara Eran pruan bara bikan, bara ai luhpia Eleazar witin pliska ra prîs aimakan.

⁷ Baha wina Gudgoda ra wan, Gudgoda wina lî ailal tasbaya pliska Jotbata ra wan.

⁸ Baha piua wina, Dawan mita Libai kiamka ra bâk sakan Dawan lâka auhbaia watla ba brih waia, bara witin ai mawanra kaia mayuni ai nina ra yamni wiaia dukiara, naiwa yua kat ban dauki ba baku.

⁹ Baha mita, Libait nani ai muihni nani wal baku diara briras, kan Dawan ba witin nani ai dukia brin, Dawan witin aisin ba baku.)

¹⁰ “Yang il ra katna kakna 40 bara tihmia 40, kainara kan ba baku, naha piua ra sin Dawan ba yang ra ai walan, bara man nani ra mai sauhki tikaia want apia kan,

¹¹ sakuna ai win: ‘Bus, ridi taks, tawan mawanra taki was bara kuntri damikam nani ra yabaia pramis daukri ba dakbi bris.’

Gâd bui dîa makabi ba

¹² “Nanara, Israel luhpia nani, ¿Dawan Gâdkam man nani wina dîa makabisa? Ai bîla wali ai yabalka nani sut nina blîkma baman, kupiam aiska kira, sulkam aiska kira latwan kaiki mayuns,

¹³ bara ai lâka bîla nani wali daukaia, yamni wiaia dukiara.

¹⁴ Kupiam krauki bas, kasbrika purara bara tasba ai bilara diara sut bâra ba Dawan Gâdkam dukia sa.

¹⁵ Ban sakuna, Dawan Gâdkam man nani almukkam nani ra latwan kaikan, bara witin nani kiamka wina aihka sakan, baha ba man nani sika, nanara kaikisma na upla wala nani tilara.

¹⁶ “Wal lâ daukan lâka ba man nani kupiam ra bris, bara lamla karna kapara,

¹⁷ kan Dawan man nani Gâdkam ba, Gâd nani gâdka sa, bara Dawan nani dawanka sa. Witin lika Gâd kum ai karnika ba silp brisa, karnakira, sibrinkira pali sa, upla mawanka kulkras, prisant mana sin sip atki briras;

¹⁸ rau bara piarka nani lâka kasak daukisa, bara tringsar man nani tilamra iwi ba ra latwan kaiki, pata bara kwalka sin yabisa.

¹⁹ Bamna man nani bui tringsar nani ra latwan kaiks, kan man nani sin Idsip ra tringsar kapram.

²⁰ “Dawan Gâdkam bîla wali dauki bas, bara witin ra baman mayuni bas; man nani kasak bas, witin ai nina ra baman swer taki bas.

²¹ Kan witin ba man nani mamyunra dukiara sa, witin ba man nani Gâdkam sa, man nani dukiamra diara tara aihkakira nani daukan kaikram.

²² Damikam nani Idsip ra wan piua ra 70 upla baman wan, sakuna nanara lika Dawan bui ailal daukan, kasbrika ra slilma nani ba baku.