Job 40 - DAWAN BÎLA AISKA

Dawan

¹ Baha sut purkara Dawan mita Job ra aisi, naku win:

² Man sika yang maipara lâ aisanka kum brisma wiram, ¿Gâd karnika sut bri ba mapara, kau ban ai aisaia lukisma ki?

Job

³ Bara Job bui Dawan ra pana aisi, naku win:

⁴ ¿Dîa pali yang bui man ra aisamna ki, kan yang na diara bahki sna na? Kanra yamni sa yang sâp kamna.

⁵ Pat kli kli aisari sa, kau aisaia ba âpu sna.

Gâd kli Job ra yaban aisisa Dawan

⁶ Dawan ba kli Job ra aima wala ra aisin. Pâsa saura karna krawi kan ba lila ba wina,

⁷ Dawan aisin: Nanara ai mariks kupiam karnika lâka ba, bara naha makabanka nani na pana aisas.

⁸ ¿Bara ai wiaia lukisma ki pâtkira bara kasak apia sna, bara man lika pâtkas pali sma?

⁹ ¿Dîa man ba yang baku karnakira sma ki? ¿Man bîlam baikra ba, yang bîli baikra alwani ba baku sa ki?

¹⁰ Tara kulkan lâka, king tara kaia kwalka ba dims, prana bara ingni lâka ni puram praks.

¹¹ Aimayunra nani sut ba kaiks, ai kupia sauhkanka sanska yas, bara swira dauki yas bawbia.

¹² Âu, namkra ni slingbi bataks, saurakira nani ba, ani anira kaikma ba ra âpu taibi dauks.

¹³ Sut pali tasba ra biks, pruan nani sialaka watla ra dingki durka praks.

¹⁴ Bamna yang pali mita kaiki âu wimna, man karnikam ba mita pura luatma ba.

¹⁵ Behemot tara ba ra kaiks, baha yang paskri, yang bui man ra mai paskri ba baku: twi pîsa, bîp wainhka baku.

¹⁶ Kaiks nina dusa ba nahki karna ba, bara kaiks wakia nahki karna pali ba.

¹⁷ Ai wâika ba karna sa yalam baku, ai mina nani wakia ba kakawa takisa.

¹⁸ Ai dusa nani ba bras karnika baku kata, silak tara baku kata.

¹⁹ Baha lika yang warkki daukanka; yang mita witin ba paskri, yang baman sip sna pura luaia.

²⁰ Laih il ra daiwan prautkira nani puli banhwi ba mita, twi brih bal sa pibia dukiara.

²¹ Witin ba inma nani liura pâwi munhtara prawisa, bara drapapa tilara yauhrus dusa nani bâra ba tilara yukuwisa.

²² Inma nani liura pâwi ba mita dista yabisa, lî un ra pâwi dusa nani ba mita tnaya kir kutbi brisa.

²³ Lî ba pupuhkbia sin, sirang ikbia apia, lî sin ban bîla kat wabia kra, bin âpu sâp kabia.

²⁴ ¿Ya ba sip kabia alki nakra nani sut daikaia, apia kaka kakma bâk rup ni wilkbia?