Job 34 - DAWAN BÎLA AISKA

Elihú aima wala aisin ba Elihú

¹ Bamna Elihú bui win:

² Man nani, sinskira nani, sins lâka sin mai smalkan ba, aisanki nani ba wirâ wals.

³ Wan kiama ba bîla aisinka nani ba tânka pliki kaikisa, wan darkaya ba diara auhni tânka ba kaikisa.

⁴ Baku bamna, yawan diara na tânka laki kaikaia sa, bara ani tânka yawan mita aitani kaikbia ba, baha yawan kulkbia.

⁵ Job naku wisa: “Yang na pâtkas sna, sakuna kasak sna ba Gâd mita ai kulkras sa.

⁶ Baha lika kunin kabia, yang na pâtkira ai kulkbia kaka.” Insauhkanki nani ba sip rawras, ban kra saura daukras kamna sin.

⁷ ¡Job baku wala âpu sa! Gâd lawaska kikisa, upla kum lî din daukan di ba baku.

⁸ Upla saura nani aikuki asla kaia lihkisa, upla saura aikuki prawaia want sa.

⁹ Witin bila wisa: “¿Upla ba dîa brisa, Gâd nakra ra yamni kaikbia ba?”

¹⁰ Bamna man nani, upla sinskira nani, yang ra wals, lukaia apia sa Gâd karnika sut bri ba, saura daukbia, kasak apia ba sin daukbia,

¹¹ Witin lika upla bani ai warkka nani ba kat mana aibapisa, upla bani dîa briaia ba kat yabisa.

¹² Kasak pali, Gâd karnika sut bri ba, witin saura kumi sin daukras sa, bara dîa kasak apia ba sin daukras sa.

¹³ Upla kumi wina sin karnika briras sa naha tasba aiska na wihtka aimakaia.

¹⁴ Upla bani wina rayaka payaska ba sâkbia kaka,

¹⁵ sut lika wal aikuki baku prui banhbia, bara kli tasba yuya takbia.

¹⁶ Man ba sinskira sma kaka, yang ra wali bas, bîli aisari nani ba sin aman wali bas.

¹⁷ Gâd mita kasakka lâka ra misbara kaikbia kaka, witin tasba na wihtka aimakaia sip apia kabia. ¿Nahki man pât ra lakma, upla kum kasak sa kaka?

¹⁸ King nani, upla tara kulkan nani ba sut lika saura atia sa kaka, Gâd lika lukras kira tânka ba mawanra mangkbia.

¹⁹ Witin mita naha tasba wihtka nani mawan kulkras sa, yuyakira ba kau kulkras sa, umpira ba wal, kan witin mita sika sut ra paskan ba.

²⁰ Upla nani ba wan dahra walras kan pat pruisa tihmia tilara; upla nani bin tara dauki si lap tiwisa, upla ba karnika âpu baku daukisa, rayaka ba sakisa.

²¹ Gâd ba upla nani mina lulkanka ba aihwaki kaikisa, bara ai wapanka ba sut tânka brisa.

²² Tihmia tara, kau tihmu ba âpu sa saurakira kum ra yukukaia sip ba.

²³ Gâd mita upla ra piua kumi mangki yaras sa, witin ai mawanra wabia lâ daukaia.

²⁴ Tânka pliki kaikaia ba aitani apia sa, upla tara nani ba batakaia bara ai pliska ba upla wala ra yaia dukiara.

²⁵ Gâd kaikisa witin nani dauki ba, tihmia piua ra wih klaki dakbisa.

²⁶ Klala yabisa lâ sasauhkra nani ra baku, upla nani sut mawanra.

²⁷ Witin nani bîla wali kaia brin daukras kan ba mita, ai rayaka lâka nani sin brin daukras kan.

²⁸ Umpira nani bara taiban uplika nani winanka ba, Gâd kat yan wan, bara witin mita walan.

²⁹ Bara Gâd ba sâp kabia kaka, ¿ya mita witin ba pâtkira sa wibia? Ai mawan ba yukukbia kaka, ¿ya ai mawan ba kaikbia ki? Witin bui tawan sut dukiara aihwakisa, upla kumi bani dukiara sim baku.

³⁰ Baku mika upla nani wihtka aimakbia apia, watawikira kum upla ra kunin mamunra ba.

³¹ ¿Dîa man bui Gâd ra wiram sa ki: “Ban swiri kunin ai munan, kli saura daukamna apia.”

³² Ai mairiks anira sa swakwanki ba, yang mita sip kaikras sna ba, yang saura daukri sa kaka, kli baku daukamna apia?

³³ Apia kaka, ¿brin mai daukisa ki, Gâd mita mana ba maikbia, man yamni kaia kaikisma ba kat, man mita brin mai daukras, swiram sakuna? Yang apia, man sika luki kaikisma dîa daukaia ba, yang nani ra wan wis dîa nu sma ba.

³⁴ Upla sinskira nani ai wali banhwisma ba, bara upla diara tânka bri nani ba mita ai wibia:

³⁵ “Job lika tânka briras aisisa, ai bîla nani ba tânkas atia sa.

³⁶ ¡Job aisi ba tânka tihuka ba laki kaiks, witin dîa pana aisi ba lika upla saura bîla prukra sa!

³⁷ Job na upla saurakira baman apia, sakuna kiamapara sa, yawan nani wan mawan kat Gâd lawaska kikisa, bara witin ra aisaia wisi, mapara aisisa.”