Job 32 - DAWAN BÎLA AISKA

Elihú aisinka

¹ Waitna yumhpa ba kaikan Job witin pâtkas sa dukiara aisi kan ba, bara witin nani aisi kan ba mahka takaskan.

² Bamna waitna kumi nina Elihú, Baraquel, Buz wina ba luhpia, Ram kiamka, witin ai kupia baiwanka ba sip alki takaskras kan Job mapara, Job ban aisi kan witin ba pâtkas sa, bara Gâd ra ni pâtkira saki kan bamna.

³ Sakuna witin lika Job pânika yumhpa mapara sin ai kupia sauhkan kan, baha nani Job mapara pana sip diara aisaras kan ba tâwan, Gâd ra saura kulkan kan ba.

⁴ Elihú ba sut tilara kau wahma lupia kan, bamna witin ban takaski bîla kaikan wala nani aisi danh takbia ba ra, witin aisaia.

⁵ Sakuna witin kaikan baha nani dîa Job ra wiaia ba tânka briras kan, sip ai kupia alki takaskras,

⁶ bara mahka aisin: Yang na lika wahma sna, bara man nani lika almuk sma; baha mita yang lukanki ba man nani tilamra dimi sip diara aisaras katna.

Elihú aisinka pas ba Elihú

⁷ Bara naku lukri: “Yarka aisabia diara tânka bri bîla ba; mani ailal sinska lâka bri ba mariki banhbia.”

⁸ Kasak pali sika, upla sut ba diara tânka kaikaia lâka ba brisa kuna, Gâd karnika sut bri ba mita ai spiritka ba yan sa.

⁹ Mani ailal ba mita upla kumi ra sin sinskira daukras sa, unmaya nani ba mita sin apia sa diara wapni tânka briaia ba.

¹⁰ Baha mita yang wîri: “Man nani, nanara yang ra wali banhs, kan yang sin diara aisaia brisna.”

¹¹ Yang lika man nani ra aman pali mai kaiki bara mai wali katna, diara nani man nani aisi banhwi kapram ba, yang kaikri man nani pliki katma kau bîla pain nani ba aisaia.

¹² Bara kaikri man nani kumi mita sin Job ra pana diara wiras kapram.

¹³ Bamna luki kaikma man nani ba ban sinskira apia sma, baha ba Gâd mita baman sip sa, sakuna upla mita lika sip apia sa aisaia.

¹⁴ Sakuna Job pali mita sin yang ra ai aisaras kan, ba mita yang mita sin man nani baku pana witin ra aisamna apia.

¹⁵ Job, naha waitnika yumhpa na aimawahki banhwan sa, witin nani man mampara diara aisaia ba tânka briras sa.

¹⁶ Sakuna lukpara yang sin bîli praki brimna naha nani wal baku, kan witin nani diara kumi sin mampara aisaras pali sa.

¹⁷ Bamna baha diara ba tilara, yang na sin dimi dîa aisaia sna ba aisamna.

¹⁸ Diara aisaia bîla nani wal banhki sna, sip kau alki sin takaskamna apia.

¹⁹ Pat puski baiwaia baila sna, wain laya daiwan taya raya ra laiki bri ba baku.

²⁰ Sturi brisna mai aisi âuyapah takaia, pana diara mai wiaia brisna.

²¹ Upla kumi ra sin mayunamna apia, sut lika kumi baku kulkamna.

²² Kasak pali, yang maiyuni aisi kaia sip apia sna; ¡baku daukamna kaka, Papaskra ba mita klala aikbia si!