Job 30 - DAWAN BÎLA AISKA

¹ Sakuna nanara laiwaska kikisa, tuktan nani yang wal kau wahma ba, baha nani aisika ba yuli nani wal sin sip prakras, daiwri daknika ba aihwaki kaiki kaia.

² ¿Dîa mapara ai klahkla karnika ba wal tâi baikaia sip kan? Witin nani lika ai karnika ba sut mâyara iwan uplika atia sa.

³ Plun wahwan tara bara diara sin luha ba mita, tihmia ra upla iwras tasbaya ba yaban sa, witin nani diara wakia lâwan nani ba ai napa ni akbaia kan.

⁴ Twi twakni wina inma tahpla nani daiki kan, ban sin brum tahpla wakia nani ba sin pi kan.

⁵ Baha nani ba pânika nani mita lulkan uplika nani nina bliki, pura winisa âimplikra nani ra muni ba baku.

⁶ Walpa unta nani ra dimaia kan, albangka nani ra bara walpa nani tilara.

⁷ Twi langnika tila ba wina winisa, asla taki banhwi kan inta wahia nani tilara.

⁸ Diara sip daukras uplika, upla kum sin luhpia nani apia, aitani sin apia sa kuntri na ra takaskaia.

⁹ Sakuna nanara witin nani laiwaska kikisa, maipara puli aisinka nani ni daukisa yang nini bâk.

¹⁰ Saura ai kulki si, laima wina laihura takan, bara maiwanra kat yabalaya ai tuhbisa.

¹¹ Nanara aiklabaia dukia nani sut yang mihti wina saki mâyara ai batakan, kulkanka kumi sin yang ra aikras sa.

¹² Tnaiya ra ailal pali asla taki banhwan sa, ai munan kauhisna, maipara aiklabisa bara ban sin lukisa ai ikaia.

¹³ Yabalki ba prakisa sauhki ai tikaia dukiara, upla kumi mita sin takaskras sa.

¹⁴ Tnaya kutbanka bâk yabal kumi kwâkan baku sa, yang purira kauhisa bin tara wal.

¹⁵ Sibrin lâka tara yang purira kauhan, praina ba pâsa baku lui wan, duki yamni nani ba mukus kumi baku lui wan.

¹⁶ Kau raya kan ai daukras, sari lâka ba puri luan.

¹⁷ Latwan ba dusi kat dimi wan, tihmia ra piu wiria pan ris briaia aikras, sirang aikisa mita.

¹⁸ Gâd mita naina wina alkan, bara tâi baiki kwailka ba singbi sakri.

¹⁹ Drapapa ra ai lulkan, yang na tasba yuya bara yamhpus kapri kan baku.

²⁰ Gâd, tâi baikma mamkabri, sakuna tâi baikras sma, mai aisari bara yang ra ai walras sma.

²¹ Yang maipara kupiam karna daukram, mamwan lawikira nini blikisma.

²² Ai munisa pâsa mita ai bukan lap ai tikbia, pâsa karna mita ai singban kabia.

²³ Yang pat tânka brisna prura ra ai brih waisma, baha tasbaya kum mâyara saki swiram ba upla bani dukia ba.

²⁴ ¿Dîa yang na upla umpira nani ra diara yaras katna ki, bara ai umpirka lâka ba wina swaki sakras katna ki?

²⁵ ¿Pât bri nani ba tâwan inras katna ki, diara luha nani ba dukiara kupi swapni briras katna ki?

²⁶ Yang lilia bîla kaiki kapri bara sari ni maipara balan, ingni ba alki bri kapri bara tihmia ni balan.

²⁷ Yang kupi ba turban pali sa takaskras kira, bîli kaikisa sari lâka baman.

²⁸ Rayaka kumi brisna sari lâka baman, yu ingnika sin âpu sa, upla sut mawanra tâi baikanka makabisna.

²⁹ Yang na yul wail nani muihnika baku takisna, sip pâlras tara ba uplika sin.

³⁰ Taiya na kli siksa takan sa, rih ba mita wîni tara ba ai ami baku sa.

³¹ Arp nani, plut nani binka ba, maipara sari lâka latwanka ra tawan sa.