Job 29 - DAWAN BÎLA AISKA

Job ai raitka lâs aisisa Job

¹ Job kli aisinka ba kwâki naku aisin:

² ¡Sip katna kaka yang baha yua nani ra kli tawaia, Gâd mita kaini kahbi kan ba yua ra!

³ Witin ai ingnika ni ingni aiki kan, bara yang na tihmu ra taukaia sip kapri.

⁴ Yang pat aitani pâwri kan ba piua ra, Gâd mita waitla ba aihwaki kaiki kan.

⁵ Gâd, karnika sut bri ba, yang tnaiya ra bûi kan, luhpi nani ba tnaiya kir kan.

⁶ Tialka laya ba tasba kat laiwi kan, bara batana laya ba walpa wina iswi kan.

⁷ Yang iwaiki bri kapri piua ra, tawan ra asla taki bâra kan.

⁸ Wahma nani ba yang ai kaiki ba ra, tnaya ra tawi kan, almuk nani ba lika bûi banhwi kan.

⁹ Tara kulkan waitnika nani aisi banhwi kan ba sâp takan, bara ai mihta wauhi munan upla sut ba sâp kaia.

¹⁰ Wihta nani ba sut ai bîla baikra ba mâyara aisi kan, twisa ba darkaya ra alki kan.

¹¹ Upla nani ai kaikuya ba ra, aisisna ba wali bara laikula dauki kan, bara yang dukira yamni aisi banhwi kan.

¹² Yang mita rau bara piarka nani ra tâ baiki kapri, upla mita tâ baikras kan uplika ra.

¹³ Pât ra kan uplika ba tingki ai wi kata, yang tâ baikanki ba piarka nani mapa ra liliaka kum kata.

¹⁴ Kasakka lâka bara wapni lâka ba yang wîni pîska kum kata, baha nani ba yang prâika kan bara yu bani dimi kapri.

¹⁵ Yang na upla nakras nani nakra kapri, bara skahwa nani mina kapri.

¹⁶ Diara luha nani aisika kapri, bara kuntri wala uplika nani tâwan aisasara sin.

¹⁷ Yang lika upla watawikira nani krusa kriki kapri, bara ai napa wina daiwra ba dakbi saki kapri.

¹⁸ Yang luki kapri: “Yang yui nani ba lika auhya mâ ba baku kabia, almuk pali taki bara waitla bîla kat pruamna.

¹⁹ Yang na dus kumi tingni un ra mangkan ba baku sna, ai tnawa nani ba tihmia piua ra diwas laya mita buskisa.

²⁰ Praina ba yang wal kli raya takbia, bara karniki ba ban bri kamna.”

²¹ Sut pali ai wali banhwi kan, bara sâpkira pali kupia kraukanka ba wali kan.

²² Yang aisari ba ningkara, upla kumi sin maipara aisaras kan, bîli nani ba drap drap tahwi kan witin nani purara.

²³ Bara witin nani lika brin dauki pali bîla kaiki kan, bitni piua ra lî auhaia bîla kaiki ba baku.

²⁴ Yang mita wiria kikuna ba, wiria baman kasak luki kata, bara piua sut ra maiwan ba lilia baman kaiki banhwi kata.

²⁵ Yang lâika ba witin nani purara bri kapri, bara witin nani dîa daukaia brin daukan ba aitani lukri, king kumi ai war aiklaklabra daknika nani mawanra bûi ba baku, ani piua sari kan ba ra yang mita maisa nihki katna.