Job 28 - DAWAN BÎLA AISKA

Sins lâka ra mayunanka

¹ Silbar sakaia tasbaya ba bâra sa, bara gul kau pain aihwa daukaia watla ba sin.

² Ayan ba tasba wina sakisa, walpa nani ba sin, baha ba angki slilki daukan bara bras ni takisa.

³ Tihmu ra upla ba mita tnata alkisa, bara kau tihu pali ra iwi auya, bahara tihmu ba tilara walpa nani plikisa.

⁴ Wirhika tânka kaiki kiwka wina lanhwan, tasba kumi ra gul warkka kwâki banhwisa, upla lui waras pliska nani ra bara tawan wina sin laihura.

⁵ Tasba purara sika plawar pâwisa, mununhta tani ra abalki swin sa pauta klauhan baku.

⁶ Bahara walpa manakira blu baku nani bâra sa, bara gul ba sin tasba wal abalkan sa.

⁷ Yakal sâtka daiwra, tnawira nani bara tnawira sâtka wala nani ai tahkia ra alki pi ba sin, baha yabalka nani sâtka ba kau kaikras kan.

⁸ Daiwan kraskira nani ba sip bâk luras sa, layan nani sin pat pat luras sa.

⁹ Upla ba ai mihta walpa biulwi ba purara kahbisa, unta tara pâwan nani ba wakia wina daikisa,

¹⁰ walpa nani tila bâk unta kraukisa, diara yukukan nani bani ba ingni ra sakisa.

¹¹ Awala nani ani wina bal taki ba tânka pliki kaikisa, bara diara yukukan ba ingni param ra sakisa.

¹² ¿Ani wina sins lâka ba aula sa ki? ¿Ani pliska ra sa ki diara tânka pliki kaiki kaia lâka ba?

¹³ Upla ba tânka briras witin mana ba nahki sapa, naha tasba ra sin sâkbia apia sa.

¹⁴ Kabu tihuka pali ba bui wisa: “Nahara âpu sa”, bara kabu bila: “Baha ba nâra âpu sa.”

¹⁵ Gul ni sip sakras sa, silbar ni sin sip atkras sa.

¹⁶ Gul kau manakira pali ba ni sin sip aibapras sa, walpa klauhi bara yaspir walpaya ni sin apia.

¹⁷ Gul bara glas walpaya wal kau manakira sa, gul ni daukan dukia nani wal sin sip atki sakras sa.

¹⁸ Sins lâka ba kau manakira sa, lilura walpaya manakira nani ba wal, walpa nina krisulait ba sin, baku sin sita nakra nani wal kau manakira sa.

¹⁹ Etiopía krisulaitka ba wal sin sip prakras sa, gul pali aihwa ba wal sin sip aibapras sa.

²⁰ ¿Bamna sins lâka ba ani pliska ra sa ki? ¿Ani pliska ra bâra sa diara tânka kaikaia lâka ba?

²¹ Daiwan saura nani nakra wina yukukan sa, kasbrika ra pâli tauki daiwra nani wina sin yukukan sa.

²² Baha sut purkara sauhki tikaia lâka bara prura wal ba mita, naku wisa: “Yawan lika witin ai dukiara wan kiama ni baman walata.”

²³ Sakuna Gâd lika sins lâka yabalka ba kaikisa, witin baman tânka brisa anira sakaia sip ba.

²⁴ Bamna witin kaikisa tasba tnata pali ba kat, bara kasbrika purara ba mununhtara dîa bâra ba sin.

²⁵ Gâd mita pâsa karnika mangkaia lukan ba ra, lî ba sin aitani kat mangkan.

²⁶ Witin lî auhaia piua nani mangkan ba ra, pâsa saura yabalka ba sin mangki yan.

²⁷ Sins lâka ba kaikan, ai mana kulkanka ba sin, bara tânka pliki kaiki aitani kulkan.

²⁸ Bara Gâd mita upla nani ra win: “Dawan dukia ba kasak daukaia ba, baha sika sins lâka ba, saura wina tnaya ra tawaia ba sika, diara tânka kaikaia lâka.”