Job 26 - DAWAN BÎLA AISKA

Job

^1-2 Job mita pana win: ¡Dîa natka ra swapnikira ba tâ baikbia sa, karnika âpu swapan nani ra!

³ ¡Sins aitani brisma dîa kupi kraukanka yamni aikisma, sins âpu sna na ai smalkaia!

⁴ ¿Ya tâm baikan man baha sât bîla nani aisaram ba? ¿Ya mita mai smalkan baku aisaia?

Bildad

⁵ Kabu tihuka ra pruan nani bâra ba, sibrin mita tatatwisa kabu tihuka ra.

⁶ Raiti ba prura king tasbaya sa, diara aihka kumi sin âpu sa Gâd mapara yukukaia.

⁷ Gâd mita kasbrika purara ba mangkan sa diara âpu pali tilara, bara tasba ba ban pami swin sa, diara âpu ba purara.

⁸ Witin bui lî ba prakisa klaut nani tilara, baha wirhika ba mita klaut nani ba baiwras sa.

⁹ Kati mawan ba tihmu daukisa, klaut kum ni pura praki ba ra;

¹⁰ kasbrika kabu wal prawi ba kat, ingni tihmia wal prawi lainka sa.

¹¹ Gâd mita tâ iki ba ra, sibrin mita il nani kasbrika tâ baiki ba sin tatatwisa.

¹² Ai karnika ba ni kabu ra taiban, witin sip ba mita, Rahab daiwra saura tara ba pura luan.

¹³ Ai wingka puhbra ba ni, kasbrika purara ba kiasma âpu daukan, ai mihta ni piuta plaplapra ba ikan.

¹⁴ Naha na lika witin ai warkka nani pîska kum sa, yawan walan ba lika kârma binka baman, ¿ya sip sa tânka briaia ai alwanika karnakira ba?