Job 23 - DAWAN BÎLA AISKA

Job

¹ Job mita pana aisi, win:

² Kau aima kum aisinki tahpla nani ba aisamna, kan Gâd ai mihta yang purira kahban.

³ ¡Aitani lukaina anira yang bui witin ba sakaia sip katna kaka, bara nahki sip kamna witin bâra ba kat waia!

⁴ Pâtki ba witin mawanra kahbamna, diara ailal aisaia brisna.

⁵ ¡Pat tânka brisna nahki aisaia sna ba, witin pana ai wibia ba ra!

⁶ Sakuna witin ban maipara karna aisabia apia, ban sakuna witin bui yang ra ai wali kabia.

⁷ Bara tânka bribia aisisna ba tânkira sa, param sin mairikbia, pâtkas sna ba tânka, ¡bara pri lâka ban kaia ra aikbia!

⁸ Sakuna Gâd ba lalma tani ra plikri bara baha tani ra âpu sa, muna tani ra plikri bara baha tani ra sin wal prawras sna.

⁹ Yahbra tani ra wari, bahara âpu sa, waupasa tani tawi wari, bahara sin âpu sa.

¹⁰ Mini lulkanka bani witin kaikisa, tâinka pliki kaikbia kaka, aihwa kamna gul aihwa ba wal baku.

¹¹ Piua bani yang yabalki wina tnaya ra tawras sna, baha yabalka witin mita mairikan ba.

¹² Piua bani ra dîa lâ mangki aikan ba kat daukaia munisni, yang kupi lâka kat lika apia.

¹³ Witin dîa kum daukaia brin daukisa kaka, daukbia, diara âpu sa baha ba takaskaia.

¹⁴ Dîa witin bui yang wal daukaia brin daukbia ba baha kat daukbia, baha tnaya ra dîa wala kra bâra kaka sin.

¹⁵ Sakuna baha ba mapara sibrin brisna, lukisna ba baman pat sibrin tara ai daukisa.

¹⁶ Gâd karnika sut bri ba, sasibrira ai daukan sa.

¹⁷ Aitani lukaina tihmia ba yang ra lap ai tikan kan kata, bara tihmu ba mita sin blaki ai brin kata.