Job 22 - DAWAN BÎLA AISKA

Aima yumhpa ra witin nani kli aisan Elifaz

^1-2 Elifaz Temán wina uplika ba, naku win: ¿Man lukisma ki upla ba sins lâka uya bri ba mita, Gâd mapara diara kum dukiara hilp kabia ki?

³ ¿Gâd, karnika sut bri ba dîa bribia brinka brisa man wapni bara tâski sin âpu kama ba?

⁴ Witin mita wapnikam dauki bara lâ ra mai paiwisa, baha ba lika man mita kasakka lâka kat ai dukia daukma tânka lika apia sa.

⁵ Ban sakuna, man watawikam lâka ba lika uba pali sa, bara saurkam ba lika tnata âpu sa.

⁶ Man uya brin pali lika mai daukras sa, ban sakuna muihkam nani ra taibi pali muni katma, wîna sakahkaia dukia nani bri ba maikbia dukiara; ai kwalka daiki ban kwala luha ban swisatma.

⁷ Yamna lî din dauki kan ba ra, lî diaia yaras katma, bara yamna plun dauki kan ba ra, plun piaia yaras katma.

⁸ ¡Man ba karnakira pali bara kulkanka lâka brisma, bara luki kapram man ba tasba na dawanka!

⁹ Piarka mairin nani ba ai mihta bîla baman ban swiram wi kan, bara rau nani ra saura muni kapram.

¹⁰ Baha mita nanara pât mita mai kutbi mai brisa, bara tisku lika sibrin tara ni banhram sa.

¹¹ Diara sut ba lika tihmu sa, diara kaikaia sip apia sa, lî plapi ba puhban mai dingkan kabia.

¹² Gâd lika kasbrika kau purara pali ba ra sa, slilma nani kau purara pali ba lika ai mina munhtara sa.

¹³ ¿Nahki man sip sma wiaia, Gâd lika diara tânka briras sa, baha klaut nani ba mita munan sip lâ aisi daukras sa?

¹⁴ ¿Nahki sip sa ki wiaia, Gâd lika sip diara kaikras sa, kan kasbrika tâ kumi wina tâ wala kat, kasbrika purak tauki ba mita?

¹⁵ ¿Ban tihmu yabalka bâk wapi kaisma ki, upla watawikira nani impakan ba bâk?

¹⁶ Witin nani pat pali pruan, lî saura aubi brih wan ba baku.

¹⁷ Witin nani Gâd ra win: “¡Ban kupia kumi wan swis! ¿Karnika sut bri ba, dîa wan mata daukaia sip sa ki?”

¹⁸ (Ban sakuna, witin mita sika wan watla bilara yamnika nani banhki wankan ba. ¡Yang wina laihura sa, watawikira nani baku lukaia ba!)

¹⁹ Kasakkira nani ba naha kaiki lilia sa, pâtkas nani ba lika kiki banhwisa.

²⁰ Watawikira nani yuyaka ba kaikisa, nahki pauta klauhan mita âpu pali dauki ba.

²¹ Kli mahka pali Gâd wal kupia kumi taks, baku lika kli kainamra yamni impakma.

²² Yas witin ba mita mai smalkbia, ai bîla nani ba sinskam ra mangki bris.

²³ Man mâyara bawma kaka, Gâd karnika sut bri ba ra kli tawi balma kaka, man wamtla wina watawi lâka nani ba sâkma;

²⁴ bara gul kau manakira ba kat kaikma kaka, tasba yamhpuska baku lî plapi ba walpaya nani baku takma.

²⁵ Bâra mika, Gâd, karnika sut bri ba, man gulkam bara silbarkam ailal ba witin kabia.

²⁶ Witin ba man liliakam kabia, bara sip kama kasak luki aman pali kaiki kaia.

²⁷ Dîa kra makama kaka, witin walbia, bara man mita dîa yaia wiram ba kat daukma.

²⁸ Bara baku lika dîa dîa daukaia buma ba yamni baman kabia, man yabalkam ra sin ingni ba ingwi kabia.

²⁹ Kan Gâd lika pura luan dauki ba mâyara batakisa, bara bawikira ba swaki sakisa.

³⁰ Witin swaki mai sâkbia, man ba pâtkas sma kaka, saurka wina sunu sma kaka.