Job 20 - DAWAN BÎLA AISKA

Sofar

^1-2 Sofar, Naamat wina uplika ba bila pana aisi, naku win: Man mita ai munisma sâp apia kaia, kupi sin alki takaskaia apia, baha mita mampara aisaisna.

³ Lawi daukankam ba ni swiri ai daukisma, sakuna yang tânka brisna nahki pana mai aisaia.

⁴ Man kaikisma piua bani ba baku sa, upla naha tasba ra ba piua wina:

⁵ upla watawikira liliaka ba, piu prahni baman sa; ai âuyapah lâka ba minit lupia kumi baman sa.

⁶ Witinka ba kasbrika pura kat uli wabia kra, bara ai lal ba sin ban klaut kat wih alkbia kra,

⁷ daiwan nani tâskika baku kabia, ai pânika nani mita sin anira ba tânka briras kabia.

⁸ Yaprisauhkan baku âpu takan kabia, tihmia ra diara aihka kum kaikan ba baku, upla kumi mita sin ai tânka briras kabia.

⁹ Wal takaski bâra kaiki kan ba, kli sin kaikan kabia apia.

¹⁰ Umpira nani ra luhpia nani ba kli yan kabia, witin mita implikan ba.

¹¹ Wahma ai karnika sut ba wal raiti ra dimi wabia.

¹² Saura ba auhni kaikisa kaka, ai twisa ni dabi kaikbia;

¹³ aunhka ba ban ai bîla ra brisa, bara ai darkaya ra tawa tawa laki munisa.

¹⁴ Sakuna ningkara, ai biara bilara puisin takuya, piuta saura puisinka ba baku.

¹⁵ Yuyaka nani langkan ba sut aikabi sakan kabia, Gâd mita sika klungka ba wina saki ba.

¹⁶ Piuta saura puisinka ba utbi kan, bara baha puisinka ba mita ikbia.

¹⁷ Diara kukanka ba wal sip ai lilia bribia apia, baha bîp tialka laya bara nasma wal awalka taki plapi ba baku.

¹⁸ Dîa dîa yamnika brin ba sut lika kli laki yaban kabia, yuyaka bri ba wina tâ baikanka, apia kaka liliaka kum sin bribia apia.

¹⁹ Umpira nani ra taibi muni dukia dakbi bara ban lulki swin, utla nani witin mita mâkras kan ba dawanka takan.

²⁰ Pin dauki ba sip ai âuyapah takras, ailal bri ba aitani lukras.

²¹ Ai gridika lâka wina diara kumi sin sip swakras kata, baha mita ai âuyapah lâka ba ban wihka wabia apia.

²² Diara ban pali ailal bri kabia sin, ban kau lilia lâka âpu kabia, upla saurakira nani mihta ba witin purara kauhan kabia.

²³ Ai biara banhkaia munbia ba ra, Gâd ai lawanka witin purara brih balbia, ai lawanka ba lî baku auhbia.

²⁴ Ayan aiklabaia dukia ba wina swak takbia kaka, bras trisbaika ni bliki alkbia.

²⁵ Trisba ba ai wîna tara ra sabi lukbia, âuya bâk trisba tâ ba lui wabia. Sibrin tara daukbia;

²⁶ tihmia aiska ba mita tihmu dingkan kabia, pauta sip dasras ba mita witin bara watla ba sut angki âpu daukan kabia.

²⁷ Kasbrika ba mita saurka ba param sâkbia, bara tasba na dahra kwahkaia bubia.

²⁸ Gâd lawanka witin purara balbia ba ra, ai yuyaka nani ba sut tiwan kabia.

²⁹ Naha sika Gâd mita upla saurakira tanika daukan ba, bamna naha sika witin briaia kabia ba.