Job 19 - DAWAN BÎLA AISKA

Job

^1-2 Job pana witin nani ra aisi, win: ¿Ahkia kat man nani ban sairka paski kaisma ki, bara bîlam aisinka ni ban klala aiki kaisma ki?

³ Aima kumi apia, sakuna kli kli saura pali ai wi banhwisma, ¿swiram sin âpu sma yang ra baku ai munaia?

⁴ Ban kra yang na pâtkira sna kaka, pâtka ba yang ra baman kauhaia kan.

⁵ Ban kra man nani kau yamni sma luki banhwisma ba mita, yang umpirki nani ba maiwanra mangki banhwisma.

⁶ Sakuna luki bas, Gâd mita sika ai batakan na, witin mita sika mini alkaika kiwka nani ba mangkan.

⁷ Yang bîli baikra winisna: “¡Ai iki banhwisa!”, sakuna upla kumi sin uni kahbras; hilp makabisna bara upla kum sin wapni lâka kat tâi baikras.

⁸ Gâd mita yabalki ba prakisa yang luamnara sîa; yabalki nani sut ba tihmu daukan sa.

⁹ Yang yuyaki nani tila ba wina ai lulki sakan sa, kraunki ba sin yang wina dakbi sakan sa.

¹⁰ Aiska pali sauhki tikan lâka ra ai sauhki swin sa, ¡bîli kaikanka lâka bri katna ba, wakia wina daiki sakan sa!

¹¹ Ai lawanka tara ba purira brih balan sa, ai waihla kum ra baku ai munan sa.

¹² War aiklaklabra daknika bri ba aiska maipara buan sa, bara waitla tnaya kir ba kutban, maipara aiklabaia dukiara.

¹³ Gâd mita daukan muihki nani bara upliki nani sut, yang wina laihura taki banhbia, bara upla sât wala baku ai kulkbia.

^14-15 Taiya nani bara upliki nani sut mita ai lulki ai swin sa; waitla ra dimi kan nani ba sin ai âuya ai tikan sa. Warkki tatakra mairin nani ba mita ai kakaira apia baku ai kaikisa, bara ai kakaira apia taki banhwan.

¹⁶ Warkki uplika kum ra winamna ba ra, pana ai winras sa, ban makabi pali aisamna sin.

¹⁷ Mayi lamara auna ba ra, ai brinka apia sa ai lamara ai briaia, luhpi nani pali ba sin yamni ai kaikras sa,

¹⁸ tuktan nani mita sin ai kulkras sa, nan buisna ba ra witin nani pat yang dukira saura aisisa.

¹⁹ Kau upliki pali nani ba mita sin ai kulkras takan sa, yang mita kau latwan kaikisna uplika ba sin maipara buan sa.

²⁰ Wîni taya na dusi kat prawisa, kau ban pali nahki muni raya sna.

²¹ Man nani upliki nani sma ba, yang dukira kupiam swapni bri bas, kan Gâd ba yang purira ai mihta batakan sa.

²² ¿Dîa kan man nani bui Gâd baku nini blikisma? ¿Pat kasak pali ai samram apia ki?

²³ ¡Aitani kaia kan upla bâra kan kata, yang bîli nani na ulbaia, bara baha ba ulbaika ra ulbi swiaia kan!

²⁴ ¡Aitani kaia kan upla kum ayan sisilka ni lit ra ulbaia, apia kaka walpa ra sukutbi ulbaia ban kaia ra!

²⁵ Yang kaikisni tâiwan aisaia uplika ba raya sa, bara witin sika naha tasba ra tâiwan aisasara kabia ba.

²⁶ Taiya na pîs pîs ra kauhbia kra, yang pali silp Gâd ra kaikamni,

²⁷ yang pali naikra ni kaikaia sna, yang pali mita, upla kakaira apia ba mita lika apia. Karniki nani ba sut mâyara iwan sa

²⁸ man nani aisi kapram ba walri ba ra: “¿Yawan nahki nina bliki rausauhkbia? Saurka wakia ba witin pali ra sa.”

²⁹ Sakuna sord tatwa ba dukiara sibrin brisna, baha sordka ni Gâd mita saurka ra klala yabi ba. Man nani luki bas, upla kum bâra sa lâ daukaika ba.