Job 18 - DAWAN BÎLA AISKA

Bildad

^1-2 Bildad, Súah wina uplika ba bila pana aisi, naku win: ¿Ahkia kat naha uplika aisi na swibia ki? Diara tânka yamni bâra kaka lika yawan sip sa kau aisi kaia.

³ ¿Dîa muni daiwan baku wan kulkan sa, bara yang nani na upla sinskas baku ban wan kulkisa ki?

⁴ ¿Dîa lukisma ki, kupia sauhkan lâka ra wînam bisbi tikisma ba ra, baku daukrika tasba na sin upla iwras tasbaya baku takbia lukisma, apia kaka walpa nani sin ai watlika ba wina, tnaya wala ra kitwi takbia ki?

⁵ Saurakira ingnika ba daskan kabia, bara pauta mukan ba sin klauhbia apia.

⁶ Ai lampka ingnika ba daswan kabia, bara ai watla ra ingni âpu kabia.

⁷ Ai mina lulkanka ba ai kanra wapi kabia apia, swapni takan kabia, ai bîla aisinka nani ba mita kli witin ra tawi alkbia.

⁸ Ai yabalka ra ilis mangkan kabia, bara baha iliska ba bui witin kli alkan kabia.

⁹ Ai mina plakura alkaia kiwka witin bui palkan kabia, bara baha kiwka wilkaia untika ba, witin ai mina ra kakauka mangki wilkbia.

¹⁰ Alkaia kiwka ai yabalka ra daukan ba ra yukukan kabia, witin lubia ba ra alkaia dukiara.

¹¹ Ani ani sut ra witin auya ba ra, tâ ikisa baku ai dahra walisa, ai mina lulki bani ba sut ra, witin nina bliki rausauhki baku ai dahra walisa.

¹² Plun wahwan ba mita ai karnika ba âpu taki ba, pât wahwan lâka ba witin ai purara kauhaia ba ban sa.

¹³ Siknis ba, prura luhpia mairin latwankira sa, tawa tawa ai wîna tara ba pih âpu daukbia.

¹⁴ Ai watla bilara ai âuyapah kaia kan ba wina daiki sakisa, bara sibrin kingka mawanra raski brih auya.

¹⁵ Ai watla ba pauta mukan sa, sulpa ni ai dukia kukan ba purara yakaban sa.

¹⁶ Witin ba lika dus kumi ai wakia nani lâwan, ai tnawa nani sin srawan ba baku sa.

¹⁷ Kupia kraukaia lukra nani sut lika tasba wina diki sakan kabia, bara ai nina ba sin kli mâkan kabia apia.

¹⁸ Ingni ba wina tihmia tara nani ra lulkan kabia, naha tasba wina sin kangbi sakan kabia.

¹⁹ Ai uplika nani tilara ai kiamka sin âpu kabia, ai watla bilara sin upla kumi sin raya swin kabia apia.

²⁰ Ai yua tnata dukiara, witin nani lalma ra bara muna ra ai sturka walbia, bara sibrin mita tâ iwan kabia.

²¹ Baha kat watawikira rayaka ba tnata alkisa, Gâd ra kulkras uplika ba sin.