Job 14 - DAWAN BÎLA AISKA

¹ Mairin wina aisubi takan uplika bani ba, rayaka kunhku brisa, pât dimaia lamara ban sa.

² Upla ba tangni kumi baiwi, ai prana saki si kli srawi ba baku sa; mukus kum bal taki si kli âpu taki ba baku sa.

³ Dawan, man naha uplika kat namkra mangki brisma, ¿bara witin mapara lâ kumi daukaia lukisma ki?

⁴ Upla kumi sin âpu sa diara tâski ba wina diara sunu sakaia.

⁵ Upla ba mani an raya kaia piua ba, man mita sika mangkisma ba; man piua mangkram ba wina witin kau sip lui waras.

⁶ Namkra nani ba witin ra kaikpara, bara kupia kumi lâka ra ban swis; ¡swirka ai lilia bribia upla ai mana bri ba baku!

⁷ Dus kumi klakan ba kau bîla kaikanka bâra sa kli urhwi pâwaia, kli raya takaia.

⁸ Ai wakia ba pat almuk takan kabia sin, playa ba tasba ra pat sukwisa.

⁹ Lî kauhla ba buswi ba ra kli urhwi pâwbia, ai tnawa nani sin sâkbia dus kura lupia kum baku.

¹⁰ Ban sakuna, upla ba lika prura saika âpu ban pruisa, pruya ba ra, ¿anira auya?

¹¹ Kabu laya ba kiasma taki lâwaia sip sa, awala nani ba sin lâwi lî âpu takaia sip sa;

¹² ban sakuna, kasbrika pura ba kau bâra ba piua ra, upla ba ai raitika wina kli bubia apia, ai yapanka wina sin kli rawbia apia.

¹³ ¡Baku kaia kan, yang ba prura kingka tasbaya ra yukuwaia katna, kupiam baiwanka ba bal lui wabia ba kat, bara piua kumi mangkma yang dukira kupiam kraukaia!

¹⁴ Upla kumi ba prubia ba ra, ¿kli raya takaia sip sa ki? Piua bani ra yang lika bîla kaiki kamna, warkki ba ban bâra kabia, latwan wahwanki piua ba lubia, maisa nihkra balbia ba kat.

¹⁵ Man ai winma kaka, yang mita sin pana mai aisamna; latwan lâka ba wal ai kaikma, man ba sika yang ai paskram ba.

¹⁶ Bara nanara mini lulkanka bani ba, aihwaki kaikma kaka, saura daukri ba kaikaia apia kapram;

¹⁷ swakwanki nani ba ban âmya tikaia kapram, bara watawanki nani ba wina diki klin ai sakaia wama.

¹⁸ Ban sin piua aula ba ra, il nani ba sin kauhi âpu takisa, bara walpa tara nani ba sin ai pliska ba wina kitwi takisa.

¹⁹ Lî mita walpa ba âpu daukisa, bara lî auhi ba mita tasba yuya nani ba raski brih auya; baku sika man mita upla bîla kaikanka bri ba âpu daukisma.

²⁰ Man bui witin pura luisma ba ra ai tasbaya wina sin saki lulkisma, bara witin ai mawan pîska ba sin tikuya sa.

²¹ Âu, man luhpiam nani ba kulkanka lâka alki ba ra, witin baha dukiara diara tânka briras kabia, pât ra kauhbia kaka sin, witin baha tânka sin briras kabia.

²² Witin ai wîna pali latwanka ba lika ai dahra walisa, witin pali ai wîna pât wahwanka ba baman.