Jirimaya 51 - DAWAN BÎLA AISKA

Babilon sauhki tikanka ba

¹ Dawan aisisa: “Diara sasauhkra payaska kum blikaisna Babilon mapara, Caldea uplika nani mapara sin.

² Yang daukaisna waihla nani bal Babilon ba plawar taya pâsa ra buki baku bukaia; daukaisna tasbaya ra upla kumi sin swiaia apia. Diara saura takaia yua balbia ba ra, tnaya bani wina witin mapara bal aiklabia.

³ ¡Pantamangka awa nani ba man nani wilks! ¡Lama prakaika nani dims! ¡Wahma nani Babilon ra bâra ba umpira kaikpara; aiklaklabra nani ba sauhki âpu pali dauks!

⁴ Kuntrika aiska ra Caldea uplika nani ba yabal nani ra prui prawi kabia,

⁵ Israel Juda wal maipara saura daukan kra sakuna, ai kuntrika saura lâka ni banhkan kra, yang, Dawan, karnika sut brisni, Israel Gâdka holikira, witin nani ba yang kau ban lulki swiras.

⁶ “¡Man nani Babilon wina taki plaps! ¡Ya ya swakwaia sip sma ba swakwi taks! ¡Witin saura daukan ba tâka man nani sin prupara! Nanara yang mita pana witin nani ra munaia yua aimakan bara aibapamni nahki praiska kat yabaia ba.

⁷ Babilon ba yang mihti ra gul kapka kum baku kan, tasba aiska ba baha wina yan di bla taki kan. Nisan nani baha wainka ba di sinska tiwi kan.

⁸ Sakuna wan dara walras kan Babilon pat kauhan, yuya sirpi man takan. ¡Man nani lika witin pura mata ins! Sîka nani bri bal insauhkan ba yukaia, rawbia sapa kaikaia.”

⁹ Yang nani Babilon ba pat sîka daukri, sakuna rawras. ¡Man nani swis! Kaisa yawan naha wina mahka wap kumi bani wan tasbaya ra, witin nani lâ sauhkan ba kasbrika pura kat ulan, kasbrika nani ba pura ba kat bukan.

¹⁰ Dawan daukan yawan wan raitka bri ba purara bukan. Man nani bal, kaisa Saion ra waia Dawan wan Gâdka daukan ba wiaia.

¹¹ Dawan Babilon slingbaia lukisa bara witin ai lukanka ba ni Media kingka nani ba tukbisa. Baha sika Dawan mita pana muni ba warkka ba, witin nani Dawan tempelka ra diara daukan ba tâwan. ¡Man nani trisbaikam ba pliki bris! ¡Kainam kahbaika nani ba dims!

¹² ¡Man nani Babilon kutban ba slingbaia tukinka ba yas! ¡Aihwawakra kau ailal bris! ¡Tawer ra aihwawakra nani swis! ¡Man nani yabal ra aihwaks! Dawan ridi takan bara witin Babilon mapara dîa daukaia maisa pakan ba witin baha sut daukan.

¹³ Babilon, man, awala tara nani ailal lamara iwisma, diara ailal kuki brisma, ¡man kau raya kaia piuam ba danh takan!

¹⁴ Dawan karnika sut bri ba ai rayaka ni swer taki aisin: “¡Man waihlam nani ailal tristrisia nani baku bri balaisna, bara man nani puram luan lawana ba aiwanbia!”

Gâd ra mayuni aiwanaia lawana ba

¹⁵ Dawan, ai karnika ni, tasba paskan; ai sinska lâka ni tasba aiska karnika bapan; sins bri ba lâka ni kasbrika pura aiska ba paskan.

¹⁶ Alwani bîla baikra ni lî auhaia binka ba kasbrika purara daukisa, tasba paski tawan ba wina kasbrika nani sunisa, lî auhi ba tilara yan imyula lipisa, pâsa watla wina sakan pâsa ba krawisa.

¹⁷ Upla sut ba sinskas baha tânka nani ba briaia brin daukras sa. Aidul nani ba mita baha papaskra nani ba ra kunin munisa: baha nani rayaka âpu kunin wan muni ba lilka nani sika;

¹⁸ baha dukia nani ba diara bahki, lawaska kikaia dukia, Dawan lâ dauki kabia bara sauhki tikbia.

¹⁹ ¡Jekob Gâdka diara sut bâra ba papaskra ba, witin sât aihka sa! Witin mita Israel ba ai uplika nani kaia bâk sakan. Ai nina ba mâkan sa: Karnika sut bri Dawanka ba.

Babilon ba Dawan amarka

²⁰ “¡Babilon, yang war aiklabaiki amarka ba man, aiklabaia dukia! Man ni nisan nani ba krikamna, king nani tasbaya ba sin slingbamna.

²¹ Man ni aras nani âiulra nani ba, wagin nani ba, aras un kiwka alki nani ba, sut yuya man daukamna.

²² Man ni waitna nani, mairin nani, almuk nani, wahma bara tiara nani ba krikamni, wahma sirpi, tiara sirpi nani ba krikamni.

²³ Man ni sepad nani, sîp nani ba, insla dadaukra nani, bîp wainhka nani ba, king nani, wihta tara nani ba krikamna.

Babilon klala brin ba

²⁴ “Man nani pali kaikma Babilon, Caldea uplika nani mita Saion ra saura munan ba tâwan witin nani klala briaia klalka ba, yang yabamna. Yang, Dawan, kasak aisisni.

²⁵ Man sauhki tatikra ilka takram, yang lika man mampara sna, tasba aiska sauhkisma ba. Yang, Dawan, kasak aisisna. Klala maikaia mihti bukamna, walpa tara nani pura wina karwi bal iwma, il tara kum pauta mita aman ba baku mai daukamna.

²⁶ Man mai slingbamna walpaya ba aisawan kabia, baha ni kli utla nani mâkbia apia. Upla iwras tasbaya bâra ban kama. Yang, Dawan, kasak aisisna.

²⁷ “¡War aiklabaia tukinka kuntri aiska ra yas! ¡Trumpit ba puhs, nisan nani ba ridi dauks Babilon mapara aiklabaia! ¡Ararat kingka uplika nani, Miní kingka uplika nani, Asquenaz uplika nani sin! ¡War wihtka kum sâks aiklabaia tâ bribia! ¡Aras ra uli prautkira nani ba tristrisia nani baku brih dims!

²⁸ Nisan nani ba wis aiklabaia ridi takaia Media kingka nani ba wis, wihta tara nani ba bara wihta nani ba sin sut, witin ai lâka ra iwi ba tasbaya nani sut.”

²⁹ Tasba ba nikwisa, lalaubisa, Dawan dîa daukaia win ba dauki bamna, Babilon ba upla iwras tasbaya saura kum daukisa.

³⁰ Babilon aiklaklabra nani ba aiklabras takaskan, ai kan kahbaika pliska nani ra diman; aiklabaia karnika âpu takan, mairin nani baku takan. Tawanka nani ba bal brin watla nani ba pauta ni angkan.

³¹ Upla kum kli upla wala witin nani plapi bal Babilon kingka ra win, tawanka tara ba pat pura luan sa.

³² Awalak plapi luaia yabalka nani ba waihla nani brin, bahara dimi aiklabaia watla nani ba angkan, suldiar nani ba sibrin tara daukisa.

³³ Dawan karnika sut bri ba, Israel Gâdka ba, aisisa: “¡Babilon ba pat pali plun mâ nani dâki wan mina ra taibi taya saki ba baku kabia, man nani bri ba krikaia piua ba aula!”

^34-35 Jerusalem, Saion tawanka ba, aisisa: “Nabucodonosor, Babilon kingka ba, yuya sirpi ai dauki ai langkan; plit kum bîla man ba baku ai dauki swin. Kabu daiwra saura tarka tara kum baku taki, ai langkan; dîa want ba kat ai âuyapah ai pin; bara tâka ba swin lulkan. ¡Babilon bui saura ai munan mana ba aibapbia! ¡Caldea uplika nani bui aibapbia, upliki nani ikan ba mana!”

Israel tâwan Dawan buan ba

³⁶ Dawan aisisa: “Kasakka lâka ba yang dauki maikamni, waihlam nani ba ra pana munamna. Babilon ra awala nani bara lî kârma nani ba sut pali lâkamna.

³⁷ Bara utla slingwan almuk upla dimras baman bâra kabia, suksuk tara nani watla takbia, lasa nani upla nani sut ra sirang iki tasbaya, upla sip bâra iwras tasbaya takbia.

³⁸ Babilon uplika nani ba layan ihbi baku, layan luhpia nani lawi baku kabia.

³⁹ Witin nani ra lapta mita ami kabia ba ra, diara diaia yabamna ba witin nani di bla takaia bara sinska ba tikaia. Baku witin nani yapbia ba kli bubia apia, kli sin kupia krawbia apia. Yang, Dawan, kasak aisisna.

⁴⁰ Baha ningkara witin nani ikaia pliska ra brih wamna, sîp lupia, nani guts nani, sîp nani iki baku.”

Babilon batakan ba

⁴¹ ¡Babilon, nina tasba aiska ra plapi tawan tawanka ba, kauhan, witin nani bal pura luan! ¡Nisan nani baha kaiki nahki tâ iwi ba!

⁴² Kabu laya Babilon ra ulan, ripka tara nani mita pura bikan.

⁴³ Tawanka nani ba aihka saura takan, bîla man daukan, tasba ba lâwan diara bâra âpu, upla bâra iwras, upla bahak sin wapi luras.

⁴⁴ “Bel, Babilon gâdka ba, klala yabamna, langkan yaba munrika aikabia, nisan nani witin ra kli plapbia apia. ¡Babilon kutbanka nani ba pat kauhan!

⁴⁵ Upliki nani, baha wina taki was, ¡kumi bani rayakam swaki sâks yang lawanki tara ba wina!

⁴⁶ Naha kuntrika sturi nani aisi ba man nani ra sirang mai ikbiara, man nini si bripara. Mani bani bin nani sât sât taki kabia kuntri ba ra upla nani ra saura munan sturka wihta nani wihta wala mapara buan binka.

⁴⁷ Baku bamna, yua ba balbia ba ra Babilon aidulka nani ba klala yabamna. Kuntrika aiska ba mâyara batakamna, upla pruan nani baman ni praki swin kabia.

⁴⁸ Kasbrika purara tasba ra diara nani bâra ba sut lilia banhwi kabia Babilon kauhbia ba ra, sasauhkra nani ba yahbra wina witin ra balbia ba ra. Yang, Dawan, kasak aisisna.

⁴⁹ Âu, Babilon ba kauhaia sa, witin daukan ba tâka Israel luhpia nani ailal pruan, witin tâka tasba aiska ra upla ailal pruan ba mita.”

Babilon Ju nani ra bîla blikan ba

⁵⁰ Man nani upla iki kan tila wina swak takram ba, takaskras plapi bas, kan laihura sma sakuna Dawan ra luki bas; man nani Jerusalem kupiam krauki bas.

⁵¹ Man nani aisisma: “Yang nani ra saura ai wi ba walisna ba swiri ai daukisa. Yang maiwan na swiri ai daukan lâka ni bikan, kan upla kakaira apia nani ba tempel bîla kau sunu pliska ba ra diman.”

⁵² Sakuna Dawan kasak aisisa: “Yua ba aula baha yua Babilon aidulka nani ba klala yabamna, tasbaya aiska bara insauhkan nani ai mamna lulki kabia.

⁵³ Babilon ba purara wih kasbrika purkara ulbia sin ai kan kahbaika pliska purara pali mangkaia dukiara, waihla nani ba blikamna witin nani ba sauhki tikaia. Yang, Dawan, kasak aisisna.”

Babilon ba sauhkan sa

⁵⁴ Laih Babilon wina sari ini winanka ba walisa, Caldea uplika nani kuntrika wina bin tara kum takisa.

⁵⁵ Baha ba Dawan, witin Babilon sauhkisa, bara binka nani ba sut lamni daukisa. Witin waihla nani ba kabu lawi ripka binka nani baku, bin tara dauki witin nani purara kauhi kabia.

⁵⁶ Witin nani Babilon sauhki tikaia balan; aiklaklabra nani ba alki priskan, pantamangka nani bri ban ba kriki âpu tikan. Dawan sika Gâd upla bani dîa ai mana briaia ba kat yabisa.

⁵⁷ King, Dawan karnika sut bri ba, kasak aisisa: “Babilon wihta nani ba yarka bla takbia, sinskira nani bâra ba, wihta tara nani ba, suldiar wihtka nani ba, suldiarka nani ba sin. Baku witin nani yapbia ba kli bubia apia bara kli sin kupia krawbia apia.

⁵⁸ Yang, Dawan karnika sut brisna bara aisisna: Babilon kutbanka bîla tara ba aiska pali dringban kabia, getka tarka tara nani ba angkbia. Nisan nani wark takan ba sut bahki takbia, ai laptika saki wark takan ba ami lubia.”

Jirimaya dahra aisin bîla ba Babilon ra brih auya

⁵⁹ Sedequías ba pat mani walhwal Juda ra king kan, baha manka ra prapit Jirimaya mita Seraías, Neria luhpia waitna Maaseías mulika ba ra kahban kan. Seraías ba king Sedequías yula kahbi Babilon ra waia kan, witin mita king anira dimaia watla ba plikaia kan.

⁶⁰ Jirimaya wauhtaya kum ulban kan, baha pât tara nani sut Babilon purara balaia dahra aisin ba, wibia kaka dîa takaia ba sut,

⁶¹ bara witin Seraías ra win: “Man Babilon ra wama ba ra, aman kaiks, bîla blikan nâra ulban na sut pain pali aisi kaikma, upla nani walaia.

⁶² Sakuna tâura puram suns: ‘Dawan, man aisaram naha tawanka na sauhkaia, upla nani kli nâra takaski kabia apia, daiwan nani sin âpu kabia, man mita upla bâra iwras kaia tasbaya kum daukma.’

⁶³ Baha ningkara walpa kum brih wauhkataya na bahara wilki Éufrates awala ra rungki swis,

⁶⁴ bara wis: ‘Babilon ba baku rungwaia sa, Dawan mita sauhki tikaia blikuya ba wina kli bubia apia.’ ” Naha kat Jirimaya aisin ba takaskisa.