Jirimaya 41 - DAWAN BÎLA AISKA

Guedalías ba ikan

¹ Baha manka ra kati 7 aimakan ra, Ismael Netanías luhpia waitna, Elisamá mulika ba, king taika nani tilara kulkan waitnika ba, waitna matawalsip witin aikuki Mispá ra wan Guedalías ra aisaia. Bahara witin wal iwi plun pi kan ba ra,

² Ismael waitna nani matawalsip brih wan ba baha nani wih sord ni Guedalías ba ikan. Witin ba sika Babilon kingka ba mita wihta tara mangkan kan ba.

³ Bara baku dauki Ju nani bara Caldea uplika suldiarka nani sin Guedalías lamara bâra kan ba sin Ismael mita ikan Mispá ra.

⁴ Guedalías ikan yua wala ba, diara takan ba upla wala nani kau walras kan ba ra,

⁵ Siquem, Siló bara Sameria wina sin 80 waitna nani balan, uplika nani ba ai unmaya irban, prâka nani ba kalwan, taya ba sin insauhkan kan, witin nani mita ai taya ba klakan. Witin nani bri balan plun nani kîa pain angkaia dukia nani Dawan ra sakripais dauki yaia tempelka ra.

⁶ Ismael Mispá wina yabal ra taki ini wapi wan waitnika nani ba mapara. Witin nani wal prak prawan, bara win: —Man nani Guedalías Ahicam luhpia waitna ba bal kaiks.

⁷ Witin nani nan tawan lilara wih diman ba ra, Ismael uplika nani ba pat bal taki waitnika nani ba iki lî watla tara kum ra auhban.

⁸ Tila wina waitna matawalsip baman ikras swak takan, bara baha nani bal Ismael ra win: —Pliskam ai ikpara; yang nani plawar, barli mâ, batana laya, nasma sin insla ra yukuki brisna. Bara Ismael baha wali waitnika nani ba ikras swin.

⁹ Baha Ismael waitna nani iki lî watla ra auhban laya watla ba sika, king Asá witin lika Israel kingka Baasá aula kan ba wina yukuwaia salhkan ba. Baha laya watla ba tara pali kan, sakuna Ismael mita ikan uplika nani baman auhbi banhkan.

¹⁰ Baha purkara king luhpia mairin nani upla wala nani sin Mispá ra bâra kan ba baha nani sin Ismael mita silak ra mangkan, baha uplika nani ba sika kamandanti Nebuzaradán aihwawakra wihtka ba mita Guedalías lâka munhtara swin kan ba. Ismael mita silak ra mangki bara yabal ra brih wan ai kupia ra lukan baha nani ba Amón tasbaya ra brih waia.

¹¹ Johanán Caréah luhpia waitna ba, aiklaklabra wihtka nani ba sin walan Ismael upla nani ikan sturka ba,

¹² upla nani sut paiwi asla taki Ismael mapara aiklabaia wan, bara Gabaón ra lî ailal bâra kat wal prawan.

¹³ Ismael upla nani priski brih auya kan ba, Johanán kaikan aiklaklabra wihtka nani sin witin wal kan ba, witin nani lilia pali takan,

¹⁴ bara baha nani plapi Johanán daknika tilara diman.

¹⁵ Sakuna Ismael bara 8 waitna nani, witin nani aikuki tauki kan ba Johanán mihta wina plapi swak taki Amón tasbaya ra wan.

¹⁶ Bara Johanán, aiklaklabra wihtka nani ba, ai walka nani aikuki upla nani, suldiar, tuktan, bara upla tara kulkanka bri nani ba sut main kaikan, Mispá ra, Ismael Guedalías ra iki si priski brih auya kan uplika nani ba, baha nani sut kli Johanán mita Gabaón ra brih wan.

¹⁷ Witin nani baku mahka impakan ban Guerut-quimam, Betlehem lama kat wih takaskan. Witin nani luki kan baha wina Idsip ra waia

¹⁸ Caldea uplika nani wina plapi swakwaia, witin nani sibrin dauki kan, kan Babilon kingka mita Guedalías ba wihta tara mangkan baha tasbaya aiska ra, Ismael bal ikan ba mita.