Jirimaya 38 - DAWAN BÎLA AISKA

Jirimaya ra lî watla kum ra mangkan ba

¹ Sefatías Matán luhpia waitna, Guedalías Pashur luhpia, Jucal Selemías luhpia waitna, Pashur Malquías luhpia waitna, baha nani walan Jirimaya naku aisi kan upla nani ra:

² “Dawan aisisa: ‘Tawan ra takaskbia uplika nani ba aiklabi ikbia, sanglang prubia, siknis alki prubia. Sakuna ya bal taki Caldea uplika nani wal wabia ba, ai rayaka ba pruras swak takbia.’

³ Dawan aisisa: ‘Naha tawanka Babilon kingka uplika aiklaklabra nani ba bal, aiklabi bribia. Upla kum sin baha nani ba takaskbia apia.’ ”

⁴ Bara wihta tara nani ba wih king ra win: —Naha waitnika na ikaia sa, witin aisi ba mita suldiar nani tawan ra nâra ba lukanka, upla nani sut lukanka ba swapni daukisa. Waitnika na upla nani tâ baikaia daukras, sakuna saura munaia baman aisisa.

⁵ Bara king Sedequías pana witin nani ra win: —Aisaram ba aitani, bamna man nani bui witin ra dîa munaia lukisma ba dauks. Man nani mampara yang diara daukaia sip apia sna.

⁶ Bara witin nani Jirimaya ba alki wihta tara Malquías laya watla ra mangki swin, aihwawakra latka ra bâra ba. Lî watla ba lî âpu drapapa baman kan, bara witin kialira ni witin ba wilki bâra lahban, bamna Jirimaya drapapa ra rungwan.

⁷ Etiopía wina kum kan nina Ébed-mélec, witin king watla ra kulkanka tara bri kan, witin walan baha nani Jirimaya ra lî watla ra mangkan ba. Baha yua king ba Benjamín getka ra lâ dauki kan upla nani aikuki.

⁸ Bara Ébed-mélec king watla ba wina taki wan king ra baha sturka wiaia:

⁹ —King tara, baha waitnika nani Jirimaya ra, baku munan ba lâ krikanka kum daukan sa. Witin nani bui witin ba lî watla kum ra swin, bahara sanglang prubia. Kan nanara tawan ra plun âpu takan sa.

¹⁰ Bara king ba Ébed-mélec ra win 30 waitna brih wabia Jirimaya ba baha wina sakaia, witin kau pruras ba ra.

¹¹ Ébed-mélec waitna nani ba aikuki, king watla ra kwala almuk nani bâra ba watla ra wan, baha wina kwala almuk nani brin, bara kialira ni wilki lahban.

¹² Jirimaya ra win: —Kwala ba ni klukiam ra mangks, kialira ba kat mangkan latwan maikaia apia dukiara. Bara Jirimaya ra win ba baku daukan.

¹³ Bara waitna nani kialira ba lulkan bara Jirimaya baha wina sakan. Baha ningkara, Jirimaya aihwawakra latka ba ra takaskan.

Sedequías paiwan Jirimaya ba balbia

¹⁴ Bara king Sedequías win prapit Jirimaya ba witin ra bri balbia, tempel ra witin dimi ba durka bâk. Bahara king bui witin ra naku win: —Yang sturi kum mamkabi walaisna, brin ai daukisa man bui diara rait ba ai wima.

¹⁵ Jirimaya pana win: —Man dîa makabi walisma ba mai wimna kaka, king ba ai ikaia ai blîkbia; kupia kraukaia bîla kum wimna kaka, witin bui yang ra walbia apia.

¹⁶ Sakuna king Sedequías yukuwan ra Jirimaya ra swer taki aisin: —Dawan ra luki yang bui man ra swer takisna, witin yawan ra wan rayaka wankisa, mai ikaia mai blikamna apia, baha nani mai ikaia luki ba mihta ra sin mai mangkamna apia.

¹⁷ Bara Jirimaya Sedequías ra win: —Dawan karnika sut brisa, Israel Gâdka ba, witin aisisa: ‘Man Babilon aiklaklabra wihtka nani mihta ra aimakma kaka, man rayakam man wamtla bîla uplika ra yaka sut swaki sâkma, bara naha tawanka na sin angkan kabia apia.

¹⁸ Sakuna man baha nani mihta ra aimakaia apia wima kaka, Caldea uplika nani naha tawanka na bribia ba ra angkbia, bara man sin swak takma apia.’

¹⁹ Sedequías pana witin ra win: —Sakuna yang sibrin ai daukisa, kan Ju nani tila sin Caldea uplika nani tilara dimi aiklabisa, bara baha nani ai alkbia kaka ai sauhkbia.

²⁰ Jirimaya pana witin ra win: —Sakuna king ba baha nani mihta ra kauhbia apia. King, pliskam, Dawan aisi bîla ba, man wali dauks, yang bui man ra mai wîri ba, man ra baku yamni takbia man pruras raya kama.

²¹ Dawan bui yang ra mairikan kaikri, king baha nani mihta ra aimakras kabia kaka dîa takaia ba:

²² mairin nani sut Juda kingka watla ra kan ba Babilon wina aiklaklabra wihtka nani ba bal saki brih wan kabia, bara mairka nani ba naku aisi kabia: ‘King ai uplika nani kau pain bri kan ba mita tawi kunin muni pura luan; mina ba drapapa kat dingkaia dauki si ai nina tawi mahka wan.’

²³ Jirimaya kau ban king ra aisi kan: —Mairin nani ba sut, king luhpia waitna nani ba sut Caldea uplika nani mihta ra aimakbia, king baha nani mihta wina swak takbia apia, Babilon kingka mihta ra mangkan kabia, bara tawan ba angkan kabia.

²⁴ Bara Sedequías pana Jirimaya ra win: —Rayakam ra latwan kaikisma kaka, naha yawan aisin na man upla wala kum ra wipara.

²⁵ Yang bui man wal aisisna na wihta tara nani ba walbia kaka, witin nani balbia man dîa ai wiram ba man wina walaia, bara yang dîa man ra mai wîri ba sin walaia, mai ikaia apia wisi pramis mai muni, bara diara sut mamkabi walaia.

²⁶ Sakuna man naha witin nani ra wis, man naha baman yang ra makabi kapram, yang Janatan watla ra kli mai blikamna apia, man bahara pruaia.

²⁷ Witin aisin ba kat takan, wihta tara nani ba sut Jirimaya ra wan bara makabi wali banhwan, sakuna witin pana baha nani ra king mita nahki aisabia win ba kat win. Bara witin nani Jirimaya ba kupia lâka ra swin, kan sturi nani aisin ba upla wala kumi sin walras kan bamna.

²⁸ Bara baku Jirimaya aihwawakra watla latka ba ra ban bâra kan Jerusalem waihla nani bal tawanka ba brin yua ba kat.