Jirimaya 35 - DAWAN BÎLA AISKA

Jirimaya bara Recab uplika nani wal

¹ Josías luhpia waitna Joaquim, Juda kingka kan ba piua ra, Dawan ba yang ra balan, bara ai win:

² “Recab uplika nani tawanka ra was bara baha nani aikuki aisas. Bara tempel bilara kutbanka kumi ra brih was, bara wain diaia yas.”

³ Yang, Jirimaya, Jaazanías (Jirimaya wala luhpia, Habasinías mulika), bara muihnika nani luhpia waitna nani pliki wari, Recab uplika nani tawanka ra,

⁴ bara witin nani ba tempel ra brih wari, Hanán Igdalías luhpia waitna nani kutbanka ra, witin ba Gâd waitnika kum kan. Baha kutbanka ba, tempel wihtka wala nani dimi ba lamara kan, Maaseías, Salum luhpia waitna takaski kan ba kutbanka ba purara, witin ba tempel ra dimaia durka ba aihwaki kan.

⁵ Bara yang kâp ra wain banhki laiki bri sal Recab uplika nani ra yabri diaia, bara witin nani ra wîri: “Man wain wiria dis.”

⁶ Sakuna witin nani pana ai win: “Yang nani wain diras, Jonadab, wan damika Recab luhpia waitna ba wan win, yang nani bara kiamka nani sut wain diaia apia.

⁷ Witin sin yang nani ra ai win utla mâkaia apia, insla daukaia apia, wain nasla daukaia apia, atki briaia sin apia. Yang nani ra ai win utla papakni ra baman dimi kaia, baku yang nani naha wawapra taukisna na tasbaya ra piua wihka iwi kamna.

⁸ Yang nani damiki Jonadab dîa ai win adarka nani ba bîla walisna, baha mita yang nani wain diras pali, waitna nani, mairin nani, tuktan nani sin apia,

⁹ ba mita yang nani utla mâkras ba ra dimi takaski kaia, wain nasla nani sin âpu, insla nani sin.

¹⁰ Utla papakni ra baman yang nani dimisna, bara baku wan damika Jonadab wan win lâka nani ba kat bîla wali daukisna.

¹¹ Sakuna Nabucodonosor, Babilon kingka ba naha kuntrika kutbi alkaia balan piua ra, yang nani Jerusalem ra bal iwaia lukri, Caldea uplika Siria uplika nani aiklabi aula ba kaina wina plapaia; baha mita yang nani Jerusalem ra iwisna.”

¹² Bara Dawan Jirimaya ra aisin, bara win:

¹³ “Yang, Dawan karnika sut brisna, Israel Gâdka, yang bui man mai blikisna Juda uplika nani ra, Jerusalem uplika nani ra was bara wis: ‘Yang mai smalkisna ba man nani lan taks, adarki nani maikisna ba man nani bîli wali dauks. Yang, Dawan, mai wisni.

¹⁴ Jonadab, Recab luhpia waitna ba kiamka nani ai damika Jonadab witin nani ra aisi adar win ba kat witin nani bîla wali daukan wain diras, naiwa kat sin witin nani wain diras ban sa, kan ai damika lâka bîla wali dauki ba mita. Yang sin man nani ra adarki nani maikri kli sin mai wîri, sakuna man nani bîli wali daukras.

¹⁵ Yang bui man nani ra prapit kumi blikri, kli wala blikri, albiki prapit nani sut blikri mai wiaia: Man nani natkam saura nani ba daukankam saura nani ba swiaia. Man nani lika gâd wala nani ninara waia apia, baha nani ra sin mayunaia apia, bara baku man nani damikam nani ra baha tasbaya maikri bâra iwi kaia sip kama. Sakuna man nani bui yang ra walras, bîli wali sin daukras.

¹⁶ Recab luhpia waitna Jonadab kiamka nani, ai damika aisi adar yan ba kat wali daukan; sakuna man nani tawi, Israel luhpia nani lika yang bîli wali daukras.

¹⁷ Baha mita yang, Dawan karnika sut brisna ba bara Israel Gâdka, mai wisna: Yang daukisna Juda bara Jerusalem wal purara, uplika nani ba purara pât nani balaia wîri ba balbia. Kan yang bui man nani ra aisari, sakuna man nani ai walras; man nani ra mai winri, sakuna man nani pana yang ra aisaras.’ ”

¹⁸ Jirimaya sin, baha purkara Recab uplika nani ra win: “Dawan karnika sut bri ba, Israel Gâdka ba, aisisa: ‘Man nani damikam Jonadab adarka nani kat bîla wali daukram ba mita, witin ai smalkanka nani ba walram witin dîa mai win ba kat daukram bamna,

¹⁹ Yang, Dawan karnika sut brisna, Israel Gâdka, man nani ra mai wisna, Jonadab kiamka wina piua bani waitna kum yang warkki tilara ban kabia.’ ”