Jirimaya 33 - DAWAN BÎLA AISKA

Bîla kaiki kaia maisa pakanka

¹ Jirimaya ba kau ban silak ra bri kan lâ uplika nani king watla latka ra aihwawakra nani ba mihta ra, bara Dawan kli aima wala ra witin ra aisin, bara win:

² “Yang, Dawan, tasba na yang paskri, tasba takan bara watlika ra dutki mangki swiri bâra ba mai wisna:

³ Yang ra ai wins bara pana mai aisamna, diara tânka tara nani dahra prakan tânka nani ba, man tânka briras sma ba mamrikamni.

^4-5 Yang, Dawan, Israel Gâdka, maisa pakaia sturka kum brisna Jerusalem watla nani ba dukiara, Juda kingka watla nani ba slingban kabia ba wiaia. Caldea uplika nani balan witin nani wal aiklabaia kutbi bri ba mapara aiklabaia ai sordka nani bri taki wabia, sakuna sut, pruaia baman wabia. Yang kupi baiwan pali ra witin nani ba pruaia daukamni, kan maiwan witin nani ra kaikras kamna baha tawanka watawika ailal pali daukan bamna.

⁶ Sakuna yang kli witin nani ba sîka rakamna, bara pain kulkan kupia kumi kaia kli baku takaia apia liliaka briaia daukamni.

⁷ Juda uplika nani Israel luhpia nani ba kli bri balamna, bara blasi witin nani nahki pain kan ba kli baku kaia daukamna.

⁸ Maipara saura daukan saurka tâskika ba sut âpu daukamni; watawika nani maipara daukan ba maipara buan pâtka ba sut swih tikamni.

⁹ Jerusalem ba yang liliaki tawanka takbia, nisan nani sut nakra ra pain kaikbia prana kabia tasba ra. Nisan nani walbia upla nani aisi kabia, yamniki nani sut Jerusalem uplika nani ra yabi kamna ba ra, yu yamni nani kli yamna ba ra, witin nani sibrin dauki tatatwi kabia.”

¹⁰ Dawan aisisa: “Man nani wisma baha pliska ba upla iwras tasbaya takan, bahara upla âpu daiwan nani âpu; Jerusalem tawan yabalka ba Juda tawanka yabalka ba bîla baman sa; bahara diara âpu, daiwan sin âpu. Baha pliska ra sika witin nani kli balbia bara walbia,

¹¹ lilia dauki lawana nani aiwani ba, ai maya pliki aiwani ba, bara aisi kaka walbia: ‘Man nani bui Dawan karnika sut bri ba ra tingki wis, Dawan ba yamni sa bamna, witin latwan wan kaiki ba ban sa.’ Witin nani ai prisantka nani ai tingkika lâka ra tempel ra bri balbia. Âu, yang baha kuntrika uplika nani kli bri balamna, bara witin nani kli blasi kata ba baku bâra kabia. Yang, Dawan, kasak aisisna.”

¹² Dawan karnika sut bri ba aisisa: “Naha kuntrika nanara bîla man swin na, upla âpu daiwan nani sin âpu, tawanka nani kumi bani ra kli sîp nani pâwbia bara sepad nani bahara ai daiwra nani dakaki kabia.

¹³ Il nani tilara tasba langni nani ra, Négueb ra, Benjamín tasbaya ra, Jerusalem kir bara Juda tawanka nani sut ra sin, sepad nani ba kli bal ai sîpka nani ba kulki kaiki kabia. Yang, Dawan ba, baha aisisni.”

¹⁴ Dawan kasak aisisa: “Yua ba balbia bara yang bui Israel bara Juda ra yamniki nani aisisna ba, yang daukamni.

¹⁵ Baha yua ba balbia ba ra, yang daukamna Debit witin ai kiamka pali bribia, bara kasakka lâka, wapni lâka ba sin naha kuntrika ra bapamni.

¹⁶ Baha piua ra Juda bara Jerusalem sin pât nani âpu pri sakan iwi kabia. Nina ba sin naku mâki kabia: ‘Yawan pura lui ba Dawan hilpka mita sika.’

¹⁷ Yang Dawan sna ba, naku wisni: Piua bani Debit kiamka kum ban Israel kingka bâra kabia,

¹⁸ Libai kiamka tila wina sin piua bani prîs nani bâra kabia, witin nani yu bani wîna aiska angki sakripais dauki aiki kabia, plun nani sakripaiska sin dauki aikbia pain ai kulki, bara sakripais wala nani sin daukbia.”

¹⁹ Dawan Jirimaya ra aisin, bara win:

²⁰ “Yang Dawan sna ba, naku wisni: Kakna bara tihmia ra yang wîri ba ai piua kat impaki kaia lâka baha ba kat yang dauki kaia sna, baha lakaia sip apia.

²¹ Baha baku natka ra sin, naipakan Debit wal lâ daukri ba daukras swiaia sip apia, witin ai kiamka wina kum ai iwaika ra king aimaki kaia sa, apia kaka, duki dadaukra prîs Libai kiamka wina ba sin ban bâra kaia sa.

²² Duki dadaukra Debit kiamka nani ba, yang warkki dadaukra nani ba, Libai kiamka nani ba slilma ailalka kasbrika purara bâra ba baku, auhya ailalka kabu ra bâra ba baku ailal daukamni, baha nani numbika upla kumi sin sip kulki sâkbia apia.”

²³ Dawan Jirimaya ra aisin, bara win:

²⁴ “¿Upla nani aisi ba man walras sma ki Israel bara Juda wal kiamka nani ba yang pali mita bâk saki briri ba lulki swiri ba? ¡Baha mita yang upliki nani ba witin nani saura kaikisa, nisan kum ra kaiki baku kaikras!

²⁵ Bamna yang, Dawan sna ba, naku wisni: Yang kakna wâl bara tihmia wâl lâ kum daukri kakna ra tihmia ra pura aimaki kaia lâka ba,

²⁶ Jekob kiamka nani bara duki dadaukra Debit ba sip lulki swimna apia, Ebraham, Aisak, Jekob kiamka nani tila wina pura aimaki kaia wihtka ba sakras swimna apia. Witin nani ra luki kupi swapni lâka kli brimni, bara diara sut witin nani ra yamni takaia daukamni.”