Jirimaya 21 - DAWAN BÎLA AISKA

Jerusalem klala yabaia maisa pakisa

^1-2 King Sedequías mita Pashur Malquías luhpia waitna ba blikan Sofonías Maaseías luhpia waitna ra wih wiaia, Jirimaya ra wabia bara naku wibia: “Pliskam pali, yang nani tâiwan Dawan wal aisas, kan Nabucodonosor Babilon kingka ba, yang nani maipara aiklabisa. Ban kra Dawan ai warkka aihkakira kum daukbia bara munka Nabucodonosor mahka wabia.” Bara Dawan Jirimaya ra aisin,

³ bara witin mita tawi Sedequías ra blikan waitnika nani ba ra win:

⁴ “Sedequías ra wis Dawan, Israel Gâdka ba aisisa: ‘Yang daukaisna tawan kutbanka lata tani ra, man nani daknikam Babilon nani Caldea uplika nani mapara aiklabi ba kli ai ninara tawaia, bara baha nani sut tawan lila kat asla daukamna.

⁵ Bara yang bui man nani mampara aiklabamna, karniki ba kupi baiwan laptika tara ba param sakamna.

⁶ Naha tawanka ra iwi nani ba sut ikamna; upla nani daiwan nani ba siknis saura alki prubia.

⁷ Baha ningkara Sedequías, Juda kingka ba Nabucodonosor mihta ra mangkamna, ai waihla upla âikra nani ba mihta ra, wihtka tara nani ba daknika nani ba sin mihta ra mangkamna, war lubia bara siknis saura ba sanglang ba sut lubia ningkara kau pruras raya uplika nani ba. Baha yang daukamna, kuna pruras swakwan nani ba sin sord ni ikaia kupia pihni lâka âpu umpira kaikan lâka luha ikbia. Yang, Dawan, kasak aisisna.

⁸ ‘Naha bîla na sin man upla nani ra wis, yang Dawan sna ba, naku wisni: Bâk saki briaia yabalka nani yang bui man nani ra maikisna, raya kaia yabalka ba pruaia yabalka ba wal.

⁹ Ya tawan ra takaskbia ba war ra prubia, apia kaka sanglang mita siknis mita sin kra. Sakuna, ya naha wina taki Caldea uplika nani tilara dimbia kaka witin nani nanara tawan mapara aiklabi ba aikuki, witin prubia apia; ai rayaka ba pan swaki sâkbia.

¹⁰ Yang pat luki kaikri naha tawanka na purara saura ba briaia. Babilon kingka ba mihta ra mangkaia, bara witin mita pauta ba mukbia. Yang, Dawan, kasak aisisna.

Juda kingka mapara maisa pakan ba

^11-12 ‘Juda kingka watla uplika nani ra, Debit watla uplika nani ra, yang aisisna na wis: Dawan maisa paki ba wals: Wapni lâka ba yu bani dauks; tataibra nani ba mihta wina taiban uplika nani ba pri sâks, apia kra, daukankam saura nani ba mita kupi baiwbia bara pauta klauhan baku takamna, angkamna bara upla sip daskbia apia.

Jerusalem klala briaia ba maisa pakisa

¹³ ‘Tawan tara il bîla nani sut purara aimakisma ba, twi langnika ra walpa tara baku sma, yang, Dawan, man mampara aisisna. Man nani aisisma: ¿Ya yawan wal aiklabaia sip sa? ¿Ya sip sa yawan wan yukuwaika ba kat dimaia?

¹⁴ Yang bui man nani ra klala maikamna dîa daukisma ba praiska kat; dus nani pâwan ba angkamni, bara baha tani ai lamara ba ra sut angkbia. Yang, Dawan, baha kasak aisisni.’ ”