Jirimaya 15 - DAWAN BÎLA AISKA

Klala yabaia maisa pakisa

¹ Dawan bui ai win: “Moses, Samuil wal nâra maiwanra bubia kra sin sakuna, yang naha uplika nani ra luki kupi kriwan takbia apia. Witin nani maiwan wina taki, mahka wabia wis.

² Bara witin nani maura mamkabi walbia anira waia sa wibia, bara yang mai wisna na man bui witin nani ra wis: ‘Siknis saura alki prubia win uplika nani ba, siknis alki prubia; war ra prubia win uplika nani ba war ra prubia; sanglang dauki prubia win uplika nani ba, sanglang dauki si prubia; tasba wala ra brih wan kabia win uplika nani ba sin, tasba wala ra wabia.’

³ “Yang Dawan, kasak aisisni: Klala sâtka walhwal man nani ra blikaisna: war ra mai ikbia, yul nani mita mai raskan kabia, daiwan tnawira mai pibia, bara daiwan wail nani sin mai pibia.

⁴ Yang naha upliki nani ra diara daukaisna ba tâka nisan nani sut tasba ra sirang tara iwaia daukamna, Manasés Ezequías lupia waitna Jerusalem kingka kan piua daukan ba tâwan.

⁵ “Jerusalem, ¿ya man nani tâmwan kupia swapni takbia ki? ¿Ya pali man nani ra umpira mai kaikbia ki? ¿Ya pali man nani wînam aiska yamni kaia dukiara mai lukbia ki?

⁶ Man bui yang ra ai swiram, ninam ba yang ra lakram. Yang, Dawan, kasak aisisna. Baha mita yang, kupi alki takaski ban swapri, bara mihti bukri klala maikaia, bara mai sauhkri.

⁷ Kuntrikam ra tawankam tara nani ba wina uplikam nani ba saki rais taya pâsa ra yakabi baku yakabamni; upliki nani ba sauhkri bara luhpia nani ba âpu daukri witin nani ai rayaka lâka saura ba swiras ban ba tâwan.

⁸ Kabu un ra auhya ailalka ba wal man nani tilamra kau piarka nani ailal swiri. Yu wan lal kat prura ba blikri yaptika nani luhpia waitna nani bara tiara nani purara; bîla kaikras pali kan pât tara sibrin tara ba pât blikri.

⁹ Luhpa ailal bri kan yaptika nani ba kupia lap tiwan kauhan, sip ai wingka puhbras kan; swira paskan mâyara batakan, lapta ingnika ba witin nani ra tihmia takan. Tila kau raya ba, yang yabrika waihla nani mita ikaia. Yang Dawan ba, yang bîli mai wisna.”

Prapit ba brukwi baku aisisa

¹⁰ ¡Yaptiki, yang sari pali ai daukisa man tasba ra ai bri balram ba tasba aiska ra upla aikuki unsabaia bara aiklabaia baman! Upla kumi ra sin yang lalah lin munras, witin nani sin lin ai munras, ban sakuna witin nani sut ba mita laihtubisa.

¹¹ Witin nani laihtubi ba baku takbia, Dawan, yang na yamni warkkam daukras sna kaka, yang na waihli nani tâwan man ra puri sunras katna kaka, witin nani pât ra sari bri kan ba piua ra.

Dawan aisisa Israel ra klala yabaia

¹² “¿Ya sip sa yahbra tani ra ayan bâra ba krikaia, bras ba sin krikaia?

¹³ Israel, man saura nani daukram ba tâwan, diara nani brisma ba pâtkam nani ba sin waihlam nani ra yabaisna, diara sut man kuntrikam ra brisma ba, mana aibapras bal brih waia daukamna.

¹⁴ Waihlam nani albika takaia mai daukamna man kakaira apia sma ba tasbaya kum ra, kum kupi baiwanka ba mukan pauta klauhan kum mai angki âpu mai daukbia ba baku.”

Prapit ba Dawan ra ai pura sunisa

¹⁵ Dawan, man lika diara sut tânka brisma ba, ¡yang ra ai luki bas, bal hilp ai muns! ¡Waihli nani nini bliki ba man bui witin nani ra pana muns! Witin nani mapara man ban kupiam alki takaski kapara, witin nani ban yang ra ai ikbia; kaiks man tâmwan diara saura nani ai wi ba ban kupi alki takaskisna.

¹⁶ Man bui yang ra aisi kapram ba ra, aisinkam nani ba langki katna; baha nani sika yang liliaki âiyapah ai saki kan yang kupi ra, kan yang sika aiska man dukiam sna, Dawan bara Gâd karnika sut man brisma ba.

¹⁷ Baha nani lilia baman kaia luki nani ba tila wina aihka takisna, man bui yang Dawanki takram yua ba wina yakan wataukri, kupiam baiwanka nani ba ni ai banhkram bamna.

¹⁸ ¿Dîa muni latwan nani brisna ba sip dasras ban ba? ¿Dîa muni insauhkan nani brisna ba sip pruras, rakaika nani ba sut mapara bûi ba? Man ba yang maipara lî puputni kunin wan muni ba baku takram sa.

Dawan pana witin ra aisin ba

¹⁹ Bara Dawan pana yang ra aisin: “Man ba yang ra tawi balma kaka, yang sin kli tawi mai brimna bara man lika yang warkki daukma. Aisaia baman luki ban aisisma ba aisaras sakuna yamni kaia ba baman aisama kaka, bâra mika yang aisisna ba aisi uplika ba sika man kama. Witin nani sika man ra balaia sa, sakuna man apia sika witin nani ra waia sma ba.

²⁰ Naha uplika nani mapara yang daukamna man ba bras ni mai paski mai daukan, kutbanka kum baku kama, puram luaia karna. Mampara aiklabia, sakuna sip puram lubia apia, yang lika man wal kamna swaki mai sakaia. Yang, Dawan ba, kasak mai wisna.

²¹ Watawikira nani karnika ba wina pri mai sakamna, ¡sasauhkra nani karnika ba wina swaki mai sakamna!”