Jasua 9 - DAWAN BÎLA AISKA

Jasua ra kunin muni wal lâ daukan

¹ Hitita nani, amorreo nani, Kenan uplika nani, ferezeo nani, heveo nani bara Jebús uplika nani kingka nani ba, diara nani taki luan sturka ba walan. Baha kingka nani ba Jordan awala muna tani ra, il nani tilara, twi langnika ra bara Mediterráneo kabuka lamara iwi tasbaya aiska ra bâra ban Líbano tasbaya nani sut ra iwi kan.

² Bara baha kingka nani sut asla, aidrubi aikuki aisi lâ daukan bakahnu Jasua mapara, Israel luhpia nani mapara sin war aiklabia.

³ Ban sakuna, heveo nani Gabaón ra iwi kan ba, witin nani pat walan kan Jasua bui Jeriko tawanka nani ba, Ai tawanka nani ba wal aiklabi dîa munan ba.

⁴ Bamna witin nani lâ daukan Jasua ra kunin munaia, bara ai birikuka nani ba alki satil mangkan, bara wain mangkaika taya batilka almuk kalwan nani sipan ba brin;

⁵ baku sin ai prâka almuk kalwan sipan nani ba diman, ai mina ra sin sandal sûska almuk kalwan sipan nani ba dingkan, yabal pata sin brit almuk lâwi karna takan puputka alkan ba brin.

⁶ Bara witin nani Guilgal ra, Israel luhpia nani kiamka ra wan, bara witin nani ra win: —Yang nani laih tasba wala nani wina aulna. Man nani ba yang nani wal lâ kum dauks.

⁷ Israel luhpia nani bui heveo nani ra pana win: —Man nani ba naura yang nani tawanki lamara iwisma baku mai kaikisna; ¿bara yang nani nahki man nani wal lâ daukamna?

⁸ Sakuna witin nani bui Jasua ra wih aisin: —Yang nani lika man warkkam daukaisna. Sakuna witin pana uplika nani ra makabi walan: —¿Man nani ba ya? ¿Ani wina man nani taki aulma?

⁹ Witin nani pana Jasua ra win: —Yang nani laih pali wina aulma, man nani Dawan Gâdkam sturka nani ba walri tâka. Witin Idsip ra dîa daukan ba yang nani baha sut walri,

¹⁰ bara amorreo nani kingka wâl Jordan awala baila wala ra iwi kan, baha nani ra dîa munan ba sin, wibia sa kaka, king Sihón, Hesbón wina ba, king Og, Basán wina ba, witin Astarot tawanka ra iwi kan.

¹¹ Baha mita yang nani wihtki tara nani, tawanki uplika nani yang nani ra ai win: ‘Man nani yabal ra impakaia patam dauki bris bara baha uplika nani ra was. Witin nani ra wis, yawan lika witin nani ai warkka takaia wilin sa, bara yawan sin witin nani wal lâ kum daukaia brin wan daukisa.’

¹² Yang nani waitla wina man nani ra balaia takri ba ra, britki nani briri ba kau lapta kan, sakuna nanara kaiks puputka alki lâwi karna takan na.

¹³ Batilki nani sin taya raya kan, wain laiki banhkri kan ba, sakuna nanara sut kalwan; yang nani prâika, sandalki nani sin raya kan, kuna nanara baha sin sut kalwan, yabal wihka yang nani impakri ba mita.

¹⁴ Israel luhpia nani bui Gabaón uplika nani pata ba wiria brih pih kaikan, sakuna witin nani Dawan ra ai pura suni baha tânka dukiara lika makabi walras kan.

¹⁵ Bara Jasua lika witin nani aikuki kupia kumi takaia lâka kum daukan, pramis munan ikaia apia pâtka kulkaia apia; bara Israel wihta tara wala nani ba sin baku daukaia swer takan.

¹⁶ Baha lâka daukan ba wina yu yumhpa luan ba ningkara, Israel luhpia nani ba ai dara walan Gabaón uplika nani ba witin nani ai tawanka lamara iwi kan ba.

¹⁷ Bara witin nani baha uplika nani ninara nina bliki taki wan. Yu yumhpa wapan bara tawanka nani ra wan, baha nani sika: Gabaón, Quefirá, Beerot bara Quiriat-jearim kat wih diman.

¹⁸ Sakuna Israel luhpia nani bui witin nani ba ikras, kan wihta tara nani ba witin nani ra Dawan nina ra Israel Gâdka nina ra swer takan, witin nani ba ikaia apia bara pâtka ban swih tikaia. Bamna tawan ba wihta nani mapara lawan,

¹⁹ sakuna wihta nani pana witin nani ra win: —Sakuna yang nani baha uplika nani ra Dawan Israel Gâdka nina ra aisi pramis takri bara wîri witin nani ra ikaia apia, baha mita nanara yang nani bui witin nani ra sip diara munras.

²⁰ Yawan bui witin nani ba swika raya kaia sa, kan yang nani swer taki Dawan wal pramis takri lâka ba krikamna kaka, Dawan sin yawan ra klala wankbia.

²¹ Bamna baku, Israel wihtka nani ba lâ mangkan, baha uplika nani ba ikras ban swibia. Sakuna uplika nani ba Israel luhpia nani ba sut pautika baiki, laya panhki kabia. Baha lâka daukan ba dauki kaia, uplika nani ba pramis takan, bara wihta nani ba baha lâka daukan ba witin wal alki brin.

²² Jasua sin Gabaón uplika nani ba paiwan witin ra balaia, bamna uplika nani balan ba ra, Jasua bui witin nani ra makabi walan: —¿Man nani dîa muni kunin ai munram, plis laih pali wina balram wisi? ¿Kasak aisaia kaka man nani na sin yang nani wal nâra iwisma ba?

²³ Baha kuninka man nani aisaram ba tâwan, lahtuban mununhtara ban kama. Man nani upla wala albika bâra taki kama, pauta klaki kama, lî panhki kama yang Gâdki watla dukia.

²⁴ Uplika nani bui pana Jasua ra win: —Rait yang nani kunin aisari ba, sakuna man nani ai ikma luki sibrin pali ai dauki kan ba mita sika kunin aisari ba, yang nani walri Dawan Gâdkam ba ai napakan Moses ra win kan, naha tasbaya na witin bui man nani ra maikbia, bara upla bâra iwi ba iki âpu daukbia.

²⁵ Bamna nanara yang nani lika man nani mihtam ra sna; dîa daukaia man nani brin mai dauki ba baha dauks.

²⁶ Bara Jasua bui Israel luhpia nani ra adar yabras kan Gabaón uplika nani ba ikaia,

²⁷ ban sakuna, lâ daukan witin nani Israel luhpia nani ba, Dawan altarka nani ba ra bri si swibia bahara pauta baiki lî panhki yabi kaia. Bahamna Gabaón uplika nani ba naiwa kat ban, baha warkka upla dukia dauki kaia warkka ba daukisa.