Jasua 4 - DAWAN BÎLA AISKA

Walpa 12 Jordan awala wina saki brin

¹ Upla nani sut awala baila wala ra luan ba ra, Dawan Jasua ra aisin:

² “Waitna 12 aihka sâks, kiamka kumi bani tila ba wina waitna kum.

³ Bara waitnika nani ba ra wis awala bilara prîs nani bûi kan ba wina walpa 12 sâkbia, bara na tihmia man nani anira wih takaskma ba, bahara walpaya ba brih wabia.”

⁴ Bara waitna nani 12 bâk sakan ba, Jasua bui witin nani ra winan balan,

⁵ bara win: “Man nani was Jordan awala lilara Dawan lâka auhbaia watla mawan ba kat, witin lika man nani Gâdkam ba, bara baha wina man nani kumi bani walpa kum pamhpaya ra twilki bal, Israel kiamka kumi bani kulkanka walpa kum, bamna asla sut ba ra walpa 12 kabia.

⁶ Baha walpaya nani ba wina sturka aisin kabia, luhpiam nani yu kum man nani ra makabi walbia: ‘¿Naha walpaya nani na dîa tânka sa?’,

⁷ bara man nani bui witin nani ra wima: ‘Yu kumi kan Dawan lâka auhbaia watla ba Jordan awala bâk brih twilki luan bara lî ba lâ auhbaia watla ba mawan lilak tar baiki lâkan kan, baikanka wâl daukan. Bara naha walpaya nani na, baha takan ba dukiara luki Israel luhpia nani wan kupia krauki kabia nâra bri balan ba.’ ”

⁸ Jasua bui witin nani ra daukaia win ba baku, witin nani awala ba wina walpa 12 bri balan, Israel luhpia nani kulkanka ba kat, kiamka kumi bani dukia walpa kum, Dawan bui Jasua ra dîa daukaia win ba baku daukan, walpa nani ba witin nani ai tintka watla ra bri si suni swin.

⁹ Baha purkara Jasua sin witin nani ra win, kli walpa wala 12 awala lilara prîs nani Dawan lâka auhbaia watla brih bûi kan ba kat asla duki swibia. Baha walpaya nani ba naiwa kat dîa swin ba baku ban bâra sa.

¹⁰ Prîs nani Dawan lâka auhbaia watla ba twilki Jordan awala lila kat wih bûi kan ba, Dawan mita sin Jasua ra win, Israel luhpia nani ra win diara nani dauki kan ba. Baha sut ba Moses mita sin pat Jasua ra win baku daukaia. Upla nani ba isti awala ba lui wan,

¹¹ upla nani ba sut baila wala ra lui wan, bara prîs nani ba Dawan lâka auhbaia watla ba brih luan, bara upla nani sut tâura witin nani aimakan.

¹² Bara aiklaklabra nani Ruben bara Gad kiamka nani ba bara Manasés kiamka bakriki tila ba sin awala baila wala ra luan aiklabaia dukia nani ba brih, Israel uplika wala nani ba tâura witin nani aimakan, baku daukaia Moses mita pat win kan ba baku.

¹³ Waitna nani 40,000 war aiklabaia ridi, Dawan mawanra taki wapan, Jeriko twiya tasbaya nani ba tani ra.

¹⁴ Baha yua Dawan mita baku daukan, Israel luhpia nani ba sut Jasua ra kaiki tâ iwaia bara kulkanka sin yabaia, Moses raya kan witin nani bui witin ra bîla wali kulki kan ba baku, Jasua ra sin kulkaia.

¹⁵ Bara Dawan Jasua ra win:

¹⁶ “Prîs nani ra wis Dawan lâka auhbaia watla ba awala wina brih sauhka ra ulbia.”

¹⁷ Jasua bui witin nani ra win mahka sauhka ra ulbia.

¹⁸ Prîs nani ba nan lî wina sauhka ra ai mina taiban ba ra, awala laya ba kli wal prak prawan, bara mahka lî ba auban pas kata ba baku.

¹⁹ Israel luhpia nani ba Jordan wina takan kati pas lapta yua matawalsip ba ra, Jordan awala ba lui Guilgal Jeriko lama kat ai tintka watla bapan.

²⁰ Jasua Guilgal ra baha walpaya nani 12 Jordan awala wina sakata ba bri si, watlika ra mangki swin.

²¹ Bara witin bui Israel luhpia nani ra win: “Yu kum luhpiam nani man nani ra makabi walbia: ‘¿Naha walpaya nani na dîa tânka?’,

²² man nani pana witin nani ra wis, Israel luhpia ba nahki Jordan awala ba lâki lui wan, walpaya nani ba baha tukinka,

²³ bara nahki man nani Jordan awala ba lui kapram Dawan Gâdkam awala laya lâkan ba baku, yang nani sin Kabu Pauni lui kapri bara kabu laya ba lâkan kan.

²⁴ Baku upla nani tasba aiska ra wali tânka bribia, Dawan karnakira ba nahki diara dauki ba, bamna man nani piu sut Dawan Gâd ra pain kulkan lâka ba yabi kama.”