Jasua 17 - DAWAN BÎLA AISKA

Manasés kiamka tasbaya ba

¹ Naha tasbaya sika Manasés kiamka ra yan, Josep luhpia almukka ba. Maquir ra aiklaklabra kata ba, Manasés luhpia almukka ba bara Galaad aisika, Galaad bara Basán tasbaya ba brin, Jordan lalma tani ra.

² Baku sin tasba nani briaia kan ba lat lulki kaikan, ai kiamka kulki kaikanka praiska ba kat, Manasés luhpia wala nani ra: Abiézer ra, Hélec, Asriel, Siquem, Héfer bara Semidá, naha nani Manasés luhpia nani bara Josep mulika nani kata.

³ Sakuna Selofhad, Héfer luhpia bara Galaad mulika kan ba, Maquir luhpia bara Manasés mulika, luhpa waitna kumi sin âpu kan, sakuna luhpa mairin baman matsip bri kan, bara naha nani kata: Mahlá, Noa, Hoglá, Milcá bara Tirsá.

⁴ Naha mairka nani na prîs Eleazar ra bara Jasua ra wan bara tawan wihtka nani ra sin, bara witin nani ra win: “Dawan ba wan blikan Moses ra wiaia tasba wankbia, baku sin wan taya nani ra.” Bara Jasua tasba witin nani ra yan ai aisa taika nani ra wal baku, dîa Dawan wisata ba kat.

⁵ Naku natka ra Manasés kiamka ba tasba pîs matawalsip brin, baha purkara Galaad bara Basán tasbaya nani, baha lika Jordan lalma tani ra ba,

⁶ kan Manasés luhpia mairin nani ra lika tasba yan waitna nani ra baku. Galaad tasbaya lika Manasés kiamka wala nani ra yan.

⁷ Manasés kiamka tasbaya ba Aser wina Micmetat kat kan, baha lika Siquem mawanra, bara ban waupasa bâk wata Tapúah laya kârma ba kat.

⁸ Tapúah tasbaya ba Manasés kiamka dukia kan sakuna, Tapúah tawanka pali Manasés wal ai baila kata ba, baha lika Efraín kiamka dukia kata.

⁹ Ningkara piarkika ba waupasa tani ra iwi wata Kena tingnika kat, kabu bamna Efraín tawanka nani na Manasés tawanka nani tilara kan, ban sakuna yahbra tani ra tingnika ba Manasés tasbaya kan, kabu kat taki auya yabalka ba wal.

¹⁰ Efraín lika muna tingnika ra kata, bara Manasés ba lalma ra, ai piarkika ba Mediterráneo kabuka kan, Aser kiamka tasbaya ba lika yahbra tani ra bara Isacar lika lalma tani ra.

¹¹ Manasés sin naha tasbaya nani brin Isacar bara Aser tasbaya nani ra, kumi bani tawan sirpi nani ai lamara bri ba aikuki: Bet-seán, Ibleam, Dor, Endor, Taanac bara Meguido, bara il nani yumhpa ba sin.

¹² Sakuna Manasés kiamka nani ba sip naha tasbaya briras, kan Kenan uplika nani mapara buan bara ban bahara takaskan.

¹³ Ningkara, Israel luhpia nani ba kau karna takan piua ra, Kenan uplika nani ra taibi munan lal mana aibapaia, sakuna tasbaya wina sakras ban swin bâra iwi kan.

Josep kiamka nani tasba pain ba brin

¹⁴ Josep kiamka nani ba Jasua ra win: —¿Dîa muni lat lulki ban tasba sirpi wankram, kan yang nani na upla ailal sna bara Dawan yamni ai munan ba?

¹⁵ Jasua bui witin nani ra pana aisin: —Man nani upla ailal sma bara Efraín ilka ba sip mai alkbia apia, baku bamna kau unta biara ra was, ferezeo nani bara refaíta nani iwi ba irbi saki baha tasbaya ra iws.

¹⁶ Bara witin nani ra win: —Kasak sa, naha ilka nani na sip wan alkras. Sakuna Kenan uplika nani twi ra iwi ba ayan waginka nani brisa, baku sin Bet-seán ra iwi nani ba bara Jezreel tawanka sirpi nani langnika ra iwi nani ba sin.

¹⁷ Bara Jasua bui Josep kiamka nani ra pana naku aisin, wiaia kaka, Efraín bara Manasés wal kiamka nani ra: —Man nani upla ailal sma bara karnika tara brisma, baku bamna tasba pîs baman maikaia apia,

¹⁸ sakuna baha il dus ailal bri ba sin brima, bara baha wina diara ailal sâkma. Kenan uplika nani dukiara lika, man nani bahara iwi ba wina sâkma, witin nani ba karna bara ayan waginka nani brisa kuna.