Isikiel 5 - DAWAN BÎLA AISKA

¹ Dawan bui ai win: “Upla luhpia, nanara skiru mala pali risar baku kum bris, bamna tâmwa bara unam maya ba sut irbi paun ra mangki kaiks. Bara tâmwa ba mânka yumhpa dauks.

² Tawan ba sauhki lubia ba ra, tâmwa mânka kum ba tawan lila kat angks; ba ningkara skiru kum bris tâmwa mânka wala ba klaki dauki tawan aiska ra yakabi swis, bara wala mânka yumhpa lika pâsa ra lulks. Bara yang lika upla nani ninara tawan ra wamni, mihti ra sord kum brih ki.

³ Baha tâmwa ba wina wiria lupia brima, bara man prâmka un ra wilkma.

⁴ Bara tisku kli baha wina wiria lupia brima, bara pauta klauhan ra lulks ambia. Bara baha wina pauta klauhan takbia, Israel tawanka aiska mapara.

⁵ “Yang, Dawan ba, naku wisna: Jerusalem ra ba bâra sa. Yang mita sika nisan nani bara kuntri nani lilapas ra mangkri.

⁶ Sakuna witin, yang lâika mapara buan bara adarki nani mapara sin, nisan wala bara tawan lamara nani ba purkara kau saura takan kata, tasba aiska ra sin; kan lâika bahki kulkan, lâ daukaia yabatna ba kat sin daukras kata.

⁷ “Baha mita yang, Dawan, naku wisna: Man nani kau kiamapara takram, nisan wala nani sut purkara, tasba aiska purkara, lâika mai smalkri ba walras katma, bîla ba sin sip alkras katma, ban sin lamara nisan wala nani lâka ba kat sin daukras katma.

⁸ Baha mita, yang, Dawan, naku aisisna: Jerusalem, yang sin man mampara buaisna; yang bui man mampara lâ daukaia sna nisan nani sut mawanra, bara nisan sut mawanra,

⁹ yang baku daukras kapri bara kli sin baku daukamna apia. Man nani daukankam ba saura pali kaikisna.

¹⁰ Man nani tilamra ai luhpia papira aisika nani bâra sa, bara luhpia nani sin ai papika ra pi nani ba bâra sa. Man mampara lâ ba daukamni, bara dîa takaskbia ba plis bani ra lakamna.

¹¹ Yang, Dawan, rayaki ra luki swer takisna: Man nani bui yang tempelki holi ba aidulkam tâski nani ba ni, daukankam saura pali ba ni tâski daukram bamna. Yang sin man nani ra mai sauhkaisna umpira mai kaikras kira; man nani dukiamra kupi swapni takbia apia.

¹² Man nani wina dakni kum ba, siknis mita bara plun wahwan tâka prubia man nani tilamra; dakni wala kum ba sord ra kauhan kabia, ai lahma nani ai lama kir bâra ba mita; bara daknika yumhpika ba lika tasba aiska ra yakabi lakamna, pâsa mapa walhwal ra. Bara witin nani nina ra sordki mihti ra brih wamna.

¹³ Bara yang kupi baiwanka ba sakamna; bara lawanki witin nani mapara ba âuyapah lâka daukamni, bara daihra walamna. Bara lawanki witin nani mapara mangkamna ba ra, ai tânka bribia, yang Dawan ba mita sika wîri lawanki tara tilara.

¹⁴ Yang mita mai daukamni, diara sauhki tikan yuyaka nani ailal ba baku, Jerusalem; swiram mai daukamni tawan nani kir mai bri ba sut mawanra, baku bamna upla sut mai kaikan kabia bâk lui nani ba.

¹⁵ Yang kupi baiwan ra man nani mampara lâ daukamna piua ra, klala karna pali maikamna, bara upla sut saura mai aisi lamwaska kiki kabia, kainam kir ra iwi uplika nani mawanra sin klala karna brima, bara tawan kir mai bribia ba ai tânka bribia. Yang, Dawan, baha aisari.

¹⁶ Yang bui witin nani purara plun wahwan saura blikamna, trisbaya sibrinkira sauhki tiki ba baku. Âu, ban daukamna man nani puramra sauhki tikaia lâka ba bri balaia, plun wahwan ba bara plun tiwan ba sin.

¹⁷ Âu, man nani puramra yabrika plun wahwan balbia, siknis nani, prura, daiwan wail nani, luhpa âpu mai swibia; bara mai daukamni man nani tilam wina manis war ra pruaia. Yang, Dawan ba, naku aisisna.”