Isikiel 47 - DAWAN BÎLA AISKALî kârma tempel wina laiwi ba 1 Waitnika ba aikan kli tempel durka ra tawi balri. Baku mika kaikri dur munhta bâk lî iswi kata, bara lalma tani ra laiwi kan, nahki natka ra tempel mangkan ba baku. Lî ba tempel aihkika tani bâk laiwi kata, altar ra ba wina waupasa tani ra. 2 Ningkara aikan takri tempel dur tasbaya ba wina yahbra tani bâk, bara aikan wapi kir tawri lata tani ra dimaika ba kat lalma tani ra kaiki kata ba kat. Lî kârma sirpi kum iswi kata waupasa tani dimaika bâk. 3 Waitnika ba kiwa kum ai mihta ra brih, lalma tani ra taki wan bara 560 yar kulkan bara yang lî bâk luri laya plapi ba mini lukutbaika ba pura kat kan. 4 Bara ningkara kli 560 yar wala kulki kaikan; bara yang lî bâk luri laya plapi ba luli kat kan. Bara kli 560 yar wala kulkan bara lî bâk luaia ai win, lî aubi ba maisi kat kan 5 Kli 560 yar wala kulkan bara laya ba awala takan sip luras katna; laya ba tihu pali takan bamna, yawi lika luaia sip kan. 6 Baku bamna ai win: “Aman kaiks dîa pali kaikuma ba.” Bara ningkara aikan awalka ba un ra tawi balaia, 7 bara kaikri un wâlsut ra dus ailal pali pâwi kata. 8 Ba ningkara ai win: “Naha laya na lalma tasbaya tani ra aubisa ban Jordan awala kat, bara baha wina Kabu Pruan kat wabia. Bara baha laya ba auya kat kabu laya ba damni takisa. 9 Ani anira naha laya kârma na wabia sut ba, daiwan sâtka sut baha wina di raya kabia bara inska ailal pali sin. Kan naha laya na lî tahpla ba lî damni ra lakbia, bara rayaka sât sât bâra kabia. 10 En-gadi ba wina En-eglaim kat inska âialkra nani bâra kabia, bara bahara sip kabia ai iliska nani lâkaia. Bara inska ailal pali bara sât sât bâra kabia Mediterráneo kabuka ra baku. 11 Sakuna swamp bara lî kauhla âpu kabia; baha sâl laya man kabia, baha wina sâl saki kaia dukiara. 12 Awalka bailka wâl un ra dus nani sât sât pâwbia mâ bri kabia. Wahia nani ba kauhbia apia ban kaia ra, mâ nani ba sin iwi ban kabia. Kati bani mâ alki kabia, kan tempel wina taki laya wal buski kabia bamna. Mâ nani ba plun bara wahia nani ba sîka kabia. Kuntri piarkika ba 13 “Yang Dawan sna ba, naku wisni: Naha kuntrika yabaisna ba kiamka 12 nani ra ai lahma (Josep ra yabamna ba kau aima wâl kabia tasbaya yahpika ba). 14 Yang swer takri almukkam nani ra naha tasbaya na yabaia. Kumi bani sim yahpika aikuki bribia. Naha kuntrika na diara briaia kan ba baku bribia. 15 “Yahbra tani piarkika ba, Mediterráneo kabuka wina, lui wabia Hetlón tawanka kat, bara Sedad tawanka nani ba kat, 16 Berotá bara Sibraim (baha ba Damaskus bara Hamat tasbaya bilara sa), bara Hasar-haticón (baha ba Haurán piarkika sa). 17 Baku mika, yahbra piarkika ba Mediterráneo wina Hasar-enán kat yahbra tani ra kabia Damaskus bara Hamat tasbaya kat. 18 “Lalma tani piarkika ba Haurán bara Damaskus tasbaya wina Tamar tawanka kat, Kabu Pruan ba kat, Jordan awala yarika ra, baha ba piarkika kabia Galaad bara Israel wal. 19 “Waupasa tawi tasbaya piarkika ba, Tamar wina Meribá-cadés upla iwras tasbaya ra lî daukra bâk lui ban Idsip tingnika bâk Mediterráneo kat. 20 “Muna tani piarkika ba Mediterráneo kabuka, Idsip piarkika wina kabu un Hamat dimaika mawanra yaba kat. 21 “Naha sika Israel kiamka 12 tilara ai kuntrika baiki saki briaia ba. 22 Naha sika man nani briaia sma ba, bara tringsar nani man nani tilamra iwi nani ba bara luhpa bri nani ba Israel ra aisuban baku kulkaia sa. Israel kiamka tilara baiki saki bribia ba ra, witin nani ra sin ai dukia yaban kabia. 23 Tringsar nani ba bribia ani kiamka tilara iwi ba tasbaya ra. Yang, Dawan, baku adar yabisni. |
© 2010 Bible Society in Nicaragua
Bible Society in Nicaragua