Isikiel 46 - DAWAN BÎLA AISKALilia daukaia yua wihta tara bara upla nani sin daukaia ba 1 “Yang Dawan sna ba, aisisni: Kutbanka painkira latka bîla lalma tani ra durka ba prakan kaia sa, yua matlalkahbi wark taki ra; bara ris yua ra bara kati raya yua ra. 2 Wihta tara ba lata tani ra dimi takaskaia pliska wina kutbanka painkira latara ba kat dimbia, bara utla playa ba kat takaskbia. Baha ningkara prîs nani ba sakripais daiwra ba angkbia, bara sakripais daukbia wal kupia kumi takaia ba dukiara wihta ba daukbia, baku witin ai mawanra bawbia dur bînka lama ba kat, ai mawan tasba kat kangbi, baha ningkara taki wabia. Dur ba prakan kabia apia tutni iwbia kat. 3 Sabat nani bara kati raya yua nani, upla ba bal Dawan mawanra mayunbia, sim durka bâra ba mawanra. 4 Daiwan nani ba tâ bri uplika ba ris yua ra prisant Dawan ra yabaia ba, 6 sîp lupia bara sîp wainhka kum, kumi sin wîna ra watawan âpu kaia. 5 Sîp wainhka kumi prisant yabaia ba plun mâ sin batil yawanaiska kum brih balbia bara sîp lupia nani prisant yabaia ba sin baha yabuya uplika ba witin luki kaikbia dîa wala sin brih balaia sip ba. Plun mâ batil yawanaiska kum brih aula bara batana laya sin batil yumhpa pura bakriki brih balbia. 6 Kati raya ra bîp sirpi kum, sîp luhpia matlalkahbi bara sîp wainhka kumi sin ai wîna aiska watawan âpu ba. 7 Bîp wainhka sirpi kumi prisantka yabaia ba plun mâ batil yawanaiska kum brih balbia, bara baku natka ra sin sîp wainhka ba dukiara daukbia, bara sîp luhpia nani ba dukiara witin dîa yabaia want ba kat yabia. Bara plun mâ batil yawanaiska bani ba, baha purara batana laya batil yumhpa pura bakriki sin brih balbia. 8 “Wihta tara ba bahara dimbia, get bâk dimi hal bâk wabia bara kli bahak bal takbia 9 Bara yua tara nani ra, tawan ba Dawan ra mayunaia dimbia ba ra, naku daukaia kabia: ya yahbra durkak dimuya nani ba, waupasa durkak takbia, bara ya waupasa durkak dimbia ba, yahbra durkak takbia. Sim durka dimuya bâk tawbiara, kuna ai mawanra bâk takaia. 10 Tâ bri ba tawan uplika aikuki dimaia sa bara aikuki taki waia sa. 11 Lilia sât sât daukaia yua nani ra plun mâ batil yawanaiska kum yabaia ba bîp wainhka lupia kumi bani prisantka, bara kli sîp lupia kumi bani yabaia plun mâ prisantka nani brih balaia ba witin sip ba baku; prisantka kumi bani ba daukaia plun mâ batil yawanaiska kum, bara batana laya sin batil yumhpa pura bakriki brih balbia. 12 “Tâ bri ba prisantka kum ai kupia lâka Dawan ra yabia kaka, ban kra daiwan kum angkuya ba, apia kaka sakripais wal kli wan uplika takaia dukiara, lalma durka ba kwâkbia bara ai sakripaiska yabia, sim ris yua nani ra yabi ba baku. Aima kum taki wan ba ra, dur ba prakan kabia. Yua bani prisantka ba 13 “Yu bani titan ra sîp luhpia kum yabia mani kum bri kaka, wîna ra watawan âpu kaia, sakripais baku angkaia Dawan ra. 14 Baku natka ra, titan bani Dawan ra prisant brih balbia, batil matlalkahbi pura kum barli baku, bara batana batil kum, plawar ba purara laikbia. Naha daukaia lâka na piua bani ra dauki kaia sa. 15 Sîp luhpia angkuya sakripaiska ra, bara barli baku prisantka ba bara batana ba, titan bani ra daukan kaia sa. Tâ bri uplika tasba wal daukaia ba 16 “Yang Dawan sna ba, aisisni: Wihta tara ba ai tasbaya pîska kum ai luhpia ra prisant yabuya kaka, baha ba kiamka kum wina kiamka wala wala ra yabi kabia. 17 Sakuna tâ bri ba ai tasbaya pîs kum ai albika kum ra yabia kaka, witin ai dukia kabia pri takaia manka alkbia ba kat, baku kli tâ bri ba dukia takbia bara ai luhpia nani dukia kabia sin. 18 Tâ bri ba upla kumi dukia dakbaia apia sa. Dîa ai luhpia ai dukia baku yabuya ba, ai dukia ba wina yabaia sa; baku upla kum sin diara luha kabia apia, yakabrira sin takbia apia.” Tempel ra piakaia pliska 19 Ningkara waitnika ai brih wan, dimaika tnaya ra kan ba kat, yahbra tani ra rum kum bâra kan prîs nani dukiara baman bâk sakan kan ba. Plis kum ai marikan muna tani ra, nina durka bâk, 20 ai win: “Nahara sika prîs nani piakaia kabia, wîna sakripais daukuya ba saurka lâka tâwan, bara piakbia ba barli prisantka yabuya ba. Baku sâkbia apia kutbanka painkira latara ba ra, baku sin tawan uplika nani ba dimbia apia, bâk sakan ba pliska ra.” 21-22 Ningkara ai brih wan kutbanka painkira lata tani ra ba ra, utla kutbanka klukia walhwal ba ra aikan taukri. Kaikri klukia walhwal sut ra kutbanka painkira watla lata sirpi kum bri kata. Sut ba sim yahpika, 68 pît yarika bara 48 pît bîla yahpika bri kan, 23 lama kir ba walpa ni kutban kum bri kan, bara plamaika ra pauta mukaika bâra kan. 24 Baku ba ra ai win: “Naha sika piakaia pliska bara tempel ra wark dauki nani ba piakbia daiwan sakripais bri bal yaban ba.” |
© 2010 Bible Society in Nicaragua
Bible Society in Nicaragua