Isikiel 45 - DAWAN BÎLA AISKA

Tasba pîska Dawan dukiara bâk sakan ba

¹ “Tasba ba yui kiamka kumi bani ra yabaia daukbia ba ra, tasba pîska kum bâk sakaia kabia 10 mail yarika bara 8 mail bîla yahpika, baha ba Dawan dukiara bâk sakan kabia. Baha tasbaya sakuya ba holi kulkan kabia.

² Baha tasbaya ba wina tempel mâkaia tasbaya kulki sâkbia, 840 pît skwir bahara bîla yahpika kum tnaya bani ra swibia 84 pît twi nani pâwi kaia.

³ Dawan dukiara bâk sakan tasbaya bakriki ba, 10 mail bara 4 mail, baha ba kau Dawan lahma kabia; bahara sin tempel ba bâra kabia.

⁴ Baha tasbaya pîska ba prîs nani ra yan kabia, Dawan tempelka ra wark taki ba nani ra, witin nani lamara bal warkka ba daukaia. Bahara witin nani ai watla paskaia pliska bri kabia. Bâk sakan pliska kum kabia tempel lamara.

⁵ Baha purkara, tasba wala bâra kabia 10 mail yarika bara 4 mail yumhpika bara bâk sakan Libait nani dukiara, tempel ra wark dauki nani ba, witin nani tawan tara nani bri kabia dukiara anira iwaia.

⁶ Tnata ra, tawan ba dukiara bâk sakaia sa tasba kum, 10 mail yarika, 2 mail bîla yahpika, baha pîska holikira sakan ba lamara. Naha tasbaya Israel luhpia nani aiska dukia kabia.

Gabamint tâ brabrira dukiara tasba sakan ba

⁷ “Baku sin tasba pîs kum bâra kabia gabamint tâ bri ba dukiara. Pîs kum ba lalma tani ra kabia, bara wala ba muna tani ra, wibia kaka, baila kum bara baila wala ra holikira tasbaya ba wina bara tawan tasbaya bâk sakan ba. Lalma wina muna kat, sim yarika bri kabia tasba pîska kiamka bani ra baiki saki yaban ba baku.

⁸ Naha tasbaya Israel gabamintka tâ bri ba dukia kabia; baku gabamint tâ brabrira nani ba kli upliki nani ra taiban lâka ra bribia apia, kuna swibia Israel luhpia nani tasbaya kiamka bani ra.

Gabamint tâ bri nani ra lâka ba

⁹ “Yang Dawan sna ba, aisisni: ¡Ba kat aitani sa, Israel gabamintka tâ brabrira nani! ¡Kau taiban lâka âpu, saura munan sin âpu! ¡Kasakka lâka ra bara wapni lâka ra taws! ¡Upliki nani tasbaya implikisma ba swis! Yang, Dawan, baku adar yabisni.

¹⁰ “Paun munaia bara kulki kaikaia ba kasak kat wapni dauks.

¹¹ Plun mâ nani paun ra mangki ba bara diara laya nani wirhika ba sin kumi kulki kan. Homer kum ba 220 batil, bara homer ba ni plun mâ nani ba diara laya nani ba kulki kan. Diara laya bato kum ba 22 batil, plun mâ efa kum ba sin 22 batil.

¹² “Diara wirhika paun ra kulki ba sin baku natka ra kulki kan: 20 girah, 1 siklo, 11 gramo; 60 siklo, ba mina kum.

¹³ “Naha dukia nani ni man nani prisantkam daukaia sma: Plawar bara barli mâ dâkisma bara baha nani na mânka 60 dauks, bara baha wina mânka kum brih baha ni man nani prisantkam yabi bas.

¹⁴ Batana laya brima ba sin baku dauks, mânka 100 dauks, bara baha wina mânka kumi ba brih prisantkam yabi bas.

¹⁵ Sîp nani 200 ba wina kumi yama Israel twiya kau pain ba wina. Baha sika man plun sâtka bri bal Dawan lahma yaia ba, aiska angkan sakripaiska ba bara kli wal uplika takaia ba, baha lika saurka swi tikaia ba dukiara. Yang, Dawan ba, adar yabisni.

¹⁶ “Kuntri aiska ra upla sut daukaia sa baha prisantka ba Israel wihtka tara ra yabia,

¹⁷ bara witin wîna aiska angkaia sakripaiska daiwra ba yabia, plun sâtka nani, bara wain kati raya taki ba ra, ris yua nani ra baha prisantka nani ba yabaia, Israel lilia dauki yua nani ba. Baha yua nani sin saurka swi tikaia sakripaiska nani daukaia mâ sâtka prisantka bri balaia, daiwan aiska angkaia sakripaiska bara kli wal uplika takaia sakripaiska sin, Israel luhpia nani pâtka ban swi tikaia dukiara daukaia.

Insal luan Yua Liliaka ba

¹⁸ “Yang Dawan sna ba, aisisni: Pas yua kati pas ra man nani sakripais daukma bîp wainhka lupia kum wîna watawan âpu ba, tempel klin daukaia ba dukiara.

¹⁹ Prîs ba daiwan tâlia ba wirâ bri saurka swi tikaia sakripaiska ba wina bri, bara tempel dimaia durka playa ra yûkbia, altar tani playa walhwal ba ra, baha kutbanka painkira bilara ba.

²⁰ Baku sin kati bani yua 7 ra daukma ya ya ai kupia lâka, apia kaka ai dara walras saurka daukbia kaka baha dukiara. Baku dauki tempel ra ai wîna klin daukbia.

²¹ Yua 14 kati pas man nani Insal luan Yua Liliaka daukma, bara man nani baha yua ra brit îs âpu ba pi kama.

²² Baha yua ra tâ brabrira ba bîp wainhka lupia sakripais daukbia ai saurka swi tikaia ba dukiara bara tawan uplika sut ba dukiara sin daukbia.

²³ Bara baha yua 7 nani dauki ba tilara, 7 bîp wainhka bara sîp lupia nani watawan âpu ba daiwan wîna aiska angkan ba Dawan ra yaia. Baha purkara yu bani ba guts kum ikbia saurka sakripais dukiara.

²⁴ Bîp wainhka bani bara sîp kumi bani ba ra pura prakan kabia Dawan ra yaia prisantka sât sât ba batil yawanaiska kum, bara batana batil yumhpa pura bakriki.

Utla Papakni liliaka

²⁵ “Baku sin Utla Papakni liliaka dauki kama kati 7, yua 15 ba, bara baha piua ra wihta tara ba mita kau ban yu 7 saurka swih tikaia sakripaiska ba daukbia dauki kan ba baku, daiwan an angkan ba kli baku angkbia, plun nani prisantka bara batana laya sin yaban kan ba kli baku prais yabia.