Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Isikiel 44 - DAWAN BÎLA AISKA


Lalma durka yus munanka

1 Waitnika kli ai brih wan tempel ra dimaika lata tani ra, bara baha lalma dimaika ba, baha ba prakan kan.

2 Bahara Dawan bui ai win: “Naha dimaika na prakan kabia; kwâkan kaia apia sa. Upla kum sin bâk dimbia apia, kan bahak Dawan diman bamna, Israel Gâdka. Baku bamna, prawan kabia.

3 Dawan mawanra kahban pata ba, wihta tara ba baman bahara dimi iwi piaia sip sa. Get bâk dimi hal bâk dimbia, bara kli bahak bal takbia.”


Ya nani sip sa tempel ra dimaia

4 Ningkara waitnika ba ai brih wan yahbra tani ra dimaika bâk, tempel ba mawanra. Kaikri Dawan prana ba tempel ba banhwan kata, bara bawri maiwan ba tasba kangbaia kat.

5 Bamna Dawan bui ai win: “Man, upla luhpia, namkra ba pain kwâks bara aman wals, tempel lâka nani ba tempel bîla kat lâka nani ba yang mai wiaia sna na. Aman kaiki bas ani uplika nani ba tempel dimi taki kaia adarka bri ba.

6 “Wis Israel luhpia nani mapara babura nani ra: ‘Naku wisa Dawan ba: Aitani ba kat kabia daukanka saura nani ba, Israel luhpia nani.

7 Man nani tempelka ba tâski daukisma, yabram upla tringsar nani ba dimisa, upla yang wal lâ daukan tukinka âpu, ai lukanka ra bara ai wîna tara ra sin apia; tâski daukisa sakripais baku aiki batanka bara sakripaiska tâlia bara lâika nani bara pura lui baha daukanka saura wal.

8 Yang ra ai pura sunaia lâka witin nani ra yabri ba daukras, sakuna baha warkka ba tringsar nani ra yan daukaia.’

9 “Baha mita, yang Dawan sna ba, aisisni: Tringsar kum sin tempelka ra dimbia apia ai lukanka ra bara ai wîna tara ra wal lâ daukanka tukinka âpu kaka; baha tringsarka Israel tilara iwi nani sin apia.

10 Libait nani, yang wina laihura taki wan ba, Israel yabal wala ra taki wan bara ai lulki ai swin aidul ra mayunaia dukiara, aibapaia kabia ai saurka tâwan.

11 Sip sa tempelka ra duki daukaia dur nani main kakaira baku, bara wark wala nani ra sin tempel ra dauki kaia; witin nani sika daiwan nani ba ikbia, aiska angkaia wîna ba bri balan ba bara tawan ba prisant nani bri bal ba; purkara, ridi kaia sa tawan dukia daukaia.

12 Witin nani Israel luhpia nani dukia dauki kata aidul ra mayunra daukaia, bara baku yan saura daukaia. Bahamna, ai saurka mana aibapbia. Yang, Dawan, kasak aisisna.

13 Sip yang duki daukras kabia prîs baku, Dawan lahma aihka sakri ba lamara sin wabiara, Dawan lahma aihka sakri ba. Ai swira lâka twilkaia kabia diara saurakira nani daukan ba tâwan.

14 Tempel ra diara sirpi kum kum daukaia yabamna, baku dîa daukaia ba sut pali daukbia.


Prîs nani ba

15 “Libait nani prîs takan Sadoc kiamka nani ba, tempelka ra ban wark dauki kan Israel luhpia nani tnaya ra taki wan ba ra, sip kabia laimara balaia duki daukaia. Witin nani maiwanra balbia bara batanka nani ba tala ba sakripais dauki aikbia. Yang, Dawan ba, baku adar yabisni.

16 Tempelki ra sin dimaia sip kabia, altarki lamara balaia sin warkki daukaia, bara witin nani bubia warkki ba dauki kaia.

17 Witin nani get bâk tempel bîla pali ba ra dimaia wabia bara linin kwalka dimi kabia. Tempel bîla pali ra warkki dauki ba taim witin nani sîp taya prâka dimbiara.

18 Linin kwalka kum ai lal ra wilkan kabia, bara dras dimi ba sin linin kwalka, bara ai maisa ra wilkan kabia apia ai laptika takaia dukiara.

19 Bara kau kutbanka painkira latka tani ba wina taki upla nani ra waras ba ra, ai kwalka nani tempel ra diman kata ba daikaia kan bara tempel rumka nani ra swiaia, bara kwala wala dimaia, baku mika kwala holi lâka ba upla ra lubia apia sîa.

20 “Tâwa aiska irbiara, tâwa yari sin swibiara; dauhbi baman swibia.

21 Prîs kumi sin wain diaia apia, kutbanka painkira latka bîla tani ra dimuya ba ra.

22 Mairin piarka takan ba, apia kaka ai maya swin mairka ba, ai maya briaia apia sa. Israel wina tiara aihwa kum, apia kaka prîs prahki maya ba lika ai maya bribia.

23 “Prîs nani ba upliki ra smalkaia sa tânka bribia holi lâka ba bara tâski lâka ba bara sunu tâski lâka ba wal.

24 Aiklabanka tilara, witin nani wihta baku kaia sa, bara lâ daukbia yang lâika ba kat. Lâika nani ba kat daukbia bara smalkbia lilia daukaia yua nani ra, bara kulkan kaia yua nani holikira baku riski yua nani ba.

25 “Upla pruan wîna ba kangbaia apia, tâski lâka takaia apia dukiara; ban kra ai aisa, ai yapti, ai luhpia waitna, ai luhpia mairin, ai lakra, ai muihni bara ai lakra kau marit takras kaka baman lika.

26 Ban kangbia sa kaka, klin takaia sa; baha ningkara yu 7 bîla kaikaia sa.

27 Aima wala ra tempel kutbanka painkira latka ba bîla tani ra dimi banhbia bâra wark daukaia, saurka lâka tâwan sakripais kum daukaia kabia. Yang, Dawan ba, baku adar yabisni.

28 “Yang baman kamna, ai kukanka baku briaia prîs nani ba. Israel ra kukanka yaban kabia apia. Yang sika witin ai dukia kukanka sna bamna.

29 Sip kabia barli piaia Israel wina aiki nani ba, bara daiwan sakripais saurka lâka dukiara aiki nani ba, bara pâtkira ba tâwan aiki ba. Baku sin, dîa dîa Israel luhpia nani yang dukira bâk saki ba witin nani dukia sa.

30 Baku sin prîs nani ba, tâura mâ kau yamni ba bribia bara prisantka nani ba sut. Bara man nani brit akbram, kau yamni ba witin nani ra yama. Baku yamni munanki lâka ba, man nani wamtla bilara kabia.

31 Prîs nani ba piaia apia sa piawira kumi sin, apia kaka daiwan wala klauna pruan kaka, apia kaka daiwan wail mita pîs ra daukan ba.

© 2010 Bible Society in Nicaragua

Bible Society in Nicaragua
ကြှနျုပျတို့နောကျလိုကျပါ:



ကြော်ငြာတွေ