Isikiel 43 - DAWAN BÎLA AISKA

Dawan prana ba kli tempel ra aula

¹ Waitna ba lalma tani getka ba ra ai brih wan,

² bara kaikri Israel Gâd prana ba lalma wina aula kan. Bin karna pali wali kan, lî tara binka baku kan, bara tasba ba Dawan ingnika ni ingwan.

³ Baha lilka yang kaikri ba, Dawan Jerusalem sauhkaia balan taim pat kaikri ba baku kan, bara Quebar awala un ra kaikri lilka ba sin baku kan. Bara yang laila makupri maiwan tasba ra kangbaia praiska kat,

⁴ bara Dawan prana ba lalma durka bâk tempel ra diman.

⁵ Bara Gâd ai karnika ni ai alki ai bukan bara tempel lilapas kat ai brih wan, bara yang kaikri tempel bîla Dawan prana ni banhwan kan.

⁶ Waitnika laimara buan, bara walri Dawan tempel wina ai aisi kan,

⁷ bara ai win kan: “Naha sika kingki lâka pliska, mini mangkisna pliska; nahara iwamna Israel luhpia nani tilara ban kaia ra. Witin nani bara ai kingka nani sin apia kabia, kli nini kulkanka âpu daukbia ba; nini holikira ba, kasak apia lâka ba wal: Kli lilka tara nani paskanka daukbia apia, ai kingka nani prubia ba ningkara.

⁸ Apia kaka utla tara nani durka ba tempelka lamara, kutbanka kum baman lila bâk lulkan ba wal. Witin nani tâski daukan nini holikira ba, daukanka nani yang misbara kaikisna ba wal; baha mita kupi baiwan witin nani wal bara yabri pruan.

⁹ Nanara yang wina laihura sâkbia kaka, apia kaka ai kingka nani lilkika kusbi paskanka ba, bara yang lika witin nani tilara iwamna ban kaia ra.

¹⁰ Bara man, upla luhpia, wis Israel luhpia nani ra dîa tempel dukiara kaikram ba, bara lilkika ba ra kulki kan nani ba, baku ai saurka dukiara ai swira takbia.

¹¹ Bara ai swira takbia kaka dîa dîa daukan sut dukiara, bara wis tempel natka ba bara dîa bâra ba bahara; takaika ba bara dimaika ba, lâs kat, lilkika aiska ba, baku natka ra lâ nani kulkaia sa. Nahara lilki dauks, ai tânka aiska nahki kaia ba kat. Lâika nani sut ba uls bara baha kat kulkaia kabia.

¹² Naha sa tempel lâka ba: tempel lama kir tasba bara ilka purara ba holikira pali kulkan kabia.”

Altar ba

¹³ Naha sika altar yahpika kulki kaikan ba, blasi kulki kaikanka kata baku. Altarka kaina bâk, dits kum bâra kan 20 ins paknika bri kan bara 20 ins bîla yahpika bri kan, baha ba lata tani ra bâra kan, baha kan kir ba, un kum bri kata, 10 ins. Altarka plurka tani ba naku kata;

¹⁴ ditska paknika ba wina un ba kat 4 pît bri kan, wîna tara ba mâyara ba 20 ins bakriki kan. Wîna tara lila tani ba 7 pît bri kan yarika ra, bara 20 ins pura lui kata.

¹⁵ Pura tani sakripais angki pliska ba, 7 pît bri kan. Aringka walhwal bri kan, pura tani ra baiwi taki kan.

¹⁶ Altarka pura tani ba skwir kan bara 20 pît bri kan tani bani.

¹⁷ Lila tani ba sin skwir kata, 24 pît bri kan tani bani ba, ditska kir ba 10 ins kan yahpika, yarika ba 20 ins. Mina mangki ba lalma tani ra kata.

¹⁸ Ningkara Dawan bui ai win: “Altar ba paskaia piua balbia ba ra, naha lâka nani daukaia sa: Altar ba purara daiwan kum angkaia, wîna aiska ba, bara tâlia ba wal altar ba srikbia.

¹⁹ Libait wina prîs nani Sadoc kiamka, baha nani kabia laimara balaia duki daukaia, sîp lupia kum yabamna sakripais daukbia saurka nani ba tâwan. Yang, Dawan, baku adar yabisna.

²⁰ Ningkara tâlia ba wiria brima bara aringka walhwal ba ra srikma wina utla klukia walhwal nani ba bara un buki bapan nani ba sut. Baku aiska pali klin sâkma saurka ba wina.

²¹ Baha ningkara saurka daukan tâwan ikaia sîpka lupia brima, bara angkma tempel ba latka ra, sakripais daukaia pliska ba ra.

²² Yua yapra wala sakripais daukbia, saurka daukan ba mana yaia, guts lupia kum aiska sunu ba, bara prîs nani baha klin daukbia altar ba ra, sîp lupia nani klin daukata ba baku.

²³ Baha klin daukaia lâka ba sut daukma ba ra, bîp wainhka lupia kum bara sîp wainhka lupia kum brima, wâlsut watawan âpu, sunu kaia,

²⁴ bara yang ra aikma. Prîs nani ba sâl wal yûkbia bara angkbia, sakripais baku yang ra ai kulkan lâka ra.

²⁵ Yu bani, yu 7 kabia, guts wainhka lupia kum sakripais daukma saurka lâka ba dukiara bara sin sîp lupia kum bara bîp lupia sin kum baha sut watawan âpu kaia.

²⁶ Yu nani, yu 7, prîs nani ba klin daukaia sa altar ba, diara Dawan ra yaia ba dukiara.

²⁷ Baku daukbia yu 7, bara yu 8 wina ai kanra, wîna aiska angki nani ba wal kupia kumi takaia sakripais nani ba daukbia. Baku mika yang bui man nani mai brimna âiyapah kira. Yang, Dawan, baku mai wisni.”