Isikiel 34 - DAWAN BÎLA AISKA

Israel sepadka nani mapara dahra aisan ba

¹ Dawan ba, yang ra balan bara ai win:

² “Man, upla luhpia, yang nini bri Israel sîpka main kakaira nani ba mapara aisas, bara wis: ‘Dawan naku aisisa: ¡Alai kabia, Israel sepadka nani ra, ai wîna kat baman main kaiki nani ba! Sepad nani ba sîp nani ba sika main kaikaia sa.

³ Man nani tialka laya disma, taya ba wal dimaikam daukisma, bara ikisma sîp kau batana nani ba, kuna sîp nani ba lika main kaikras.

⁴ Man nani sîp swapni takan ba tâ baikras, siknis nani ba rakras, mina kriwanka ba sin blakras, tnaya ra tawuya nani ba kli brih balras, tiwuya nani ba sin plikras, kuna karna lâka ni munisma.

⁵ Sîpki nani ba sepadkas takaskan bara yakabrira takan, bara daiwan wail nani bal pin.

⁶ Yakabrira takan unta nani tilara bara il tara nani ra, bara tasba aiska ra tiwan, bara upla kum sin âpu kan baha dukiara lukaia bara pliki waia.

⁷ ‘Baku bamna, sepad nani, bîli baikra ba pain wals.

⁸ Yang, Dawan ba, rayaki wal swer takisni: Daiwan wail sât sât nani ba implikan bara sîpki nani ra pin, kan sepad âpu bamna. Sepadki nani ba sîp nani ba plikaia waras. Sepad nani ba klauna ai mainka kaikisa, kuna sîpki nani lika apia.

⁹ Baku bamna, sepad nani, wals sturi na,

¹⁰ kan yang, Dawan, aisisna: Sepad nani, yang waihlam takisni bara yang sîpki nani tâwan mai aisisna; mihtam wina main kaikaia lâka ba dakbuna, man nani ba wînam kat baman main kaiki kama apia; sîpki nani ba dakbi brimna, man nani sîpki nani ba ban pi banhwi kama apia dukiara.’

Sepad yamni ba

¹¹ “Yang Dawan sna ba, naku wisni: Yang pali mihti ra brimna sîpki nani daknika ba main kaikaia.

¹² Sepad kum ai sîpka nani dukiara uya luki ba baku yakabrira piua ra, baku yang sîpki nani dukiara lukamni; swaki sakamni baha pliska tihmu bara lâ tara yua kum ra yakabrira takan ba wina.

¹³ Kuntri tringsar ba wina sakamna, asla daukamna bara brih wamna klauna ai tasbaya ra. Brih wamna Israel untika ra piaia, bara lî kârma nani bâk, bara kuntri ra upla bâra pliska nani bâk.

¹⁴ Twi kau pain dakakaia brih wamna, Israel ilka tara nani ra bâra ba. Bahara ris briaia sip kabia bara twi kau auhni nani ba piaia.

¹⁵ Yang pali sîpki nani ba sepadka kamna, yang pali mita brih wamna ris briaia. Yang, Dawan, kasak aisisna.

¹⁶ Sîp tiwan nani ba plikamna, yabal tnaya ra wan nani ba bri balamna, mina kriwan nani ba kwala blakamna, swapni takan nani ba main kaikamna, batana bara karna nani ba main kaikamna. Yang mita main kaikamna nahki ba baku.

¹⁷ “Yang Dawan sna ba, naku wisni: Walram, sîpki nani: Kasakka lâka daukamna sîp wainhka bara guts wainhka lupia nani tilara.

¹⁸ ¿Aitani apia sa, twi kura yamni nani pisma ba wal, kuna minam ra taibisma dîa kau takaskan nani ba? Lî sangni ba disma, bara kau dîa ba minam ni buhutni daukisma.

¹⁹ Bara sîpki nani ba baha wina pîsa man nani minam ra taibram ba; bara lî buhutni daukram ba wina sin dîsa.

²⁰ Baha mita yang, Dawan ba, mai wisni: Kasakka lâka daukamna sîp batana bara biawan nani ba tilara.

²¹ Swapnikira nani ra man nani platukbi laihura sakram, kiapkam ni mangki sakram bara yabram plapan.

²² Sakuna sîpki nani ba swaki sakamna. Swimna apia ban kau impliki kaia. Kasakka lâka daukamna sîpki nani tilara.

²³ Yabamna duki dadaukra Debit ba kli tawi balaia, bara sepad unhsak baku mangkamna, bara witin main kaikbia. Witin baha nani sepadka kabia.

²⁴ Yang, Dawan ba, ai Dawanka kamna, bara duki dadaukra Debit ba tâ brabrira kabia. Yang, Dawan ba, aisari.

²⁵ Witin nani wal lâ wilkanka kum daukamna, yabrika rayaka kum lamni kabia. Yabrika tiwbia kuntri daiwra wail nani ba. Baku sîpki nani ba sip kabia lamni ra iwaia, plis kum param ra bara unta tilara lika apia.

²⁶ “Yang sîpki nani, il holikira ba lama kir mangkamna, bara yamni munamna; yamni munan laya blikamna piua bani ra.

²⁷ Unta dusa nani ai mâ sâkbia, tasba ba kau yamni takbia, bara lamni lâka ra iwbia klauna ai tasbaya ra. Yang tawanki ba pri sakamna, bara baha alba lâka ra bri ba wina ai dara wali banhbia yang sika Dawan sna ba.

²⁸ Nisan tringsar nani ba, kli witin nani purara kabia apia; daiwan wail nani sin pibia apia. Lamni iwbia, upla kum sin sirang ikbia apia.

²⁹ Insla mangkan mâ ailal yabamna, bara witin nani kli plun wauhbia apia; nisan wala nani ba sin, witin nani lawaska kikbia apia.

³⁰ Baku mika ai tânka bribia, yang, ai Dawanka, witin nani wal sna ba, bara Israel ba, yang upliki. Yang, Dawan, kasak aisisna.

³¹ Man nani ba sîpki sma, twi painkira brisna ba sîpka nani sma. Yang sika Dawankam sna. Yang, Dawan, kasak aisisna.”