Isikiel 26 - DAWAN BÎLA AISKATiro tawanka ra diara takaia ba smalkanka 1 Kati bilara pas yua ra, mani 11, Dawan ba yang ra balan bara ai win: 2 “Tiro Jerusalem tânka luki ra aisan: ‘¡Alai, diara atkaia durka, nisan nani tilara pîs nani ra baman daukan sa! ¡Nanara yang piui balan! Yang yuya wal aibanhri sa, witin nani lika sauhki tikan ra takaskan kabia.’ 3 “Baha mita, yang Dawan sna ba, naku wisni: Tiro, yang lika man nani waihlam param takisna. Yabrika nisan ailal pali mampara bubia, sim kabu ripka tara nani ba baku; 4 bara kutbanka ba kriki tikbia, tawerka nani ba tasba ra batakbia. Pukpukika sut pahbi sakamna pliska wina, bara walpa lipni kum baman swimna. 5 Kabu lila kat takaskbia, ilis lâkaia pliska kum baku. Yang, Dawan, kasak aisisna. Tiro ba, nisan nani mita dukia sut dakbi bribia. 6 Bara tawanka wala wina bal iwan nani ba sin, sord malika ra kauhbia. Bara ai tânka bri banhbia, yang sika Dawan sna ba. 7 “Yang Dawan sna ba, aisisni: Yahbra wina yabrika balbia Nabucodonosor ba, Babilon kingka; king kau karnakira ba, Tiro purara kauhan kabia dukiara. Aras nani wal balbia, wagin nani, bara aras ra âiulra nani balan kabia, baku sin suldiar daknika ailal kira aikuki balbia. 8 Sord malika napa ra sauhki tikbia, upla kwâra tasba ra iwi nani ra; kutbanka tara kum dauki ba kainam kir, kaina kahbaika daukbia, baha wina mai yûkbia bara suldiar ai kaina kahbaika bri nani ba mampara blîkbia. 9 War aiklabaika dukia wal kutbanka krikbia, bara ayan ni tawerkam ba pruki krikbia. 10 Babilon kingka ba durkam bâk dimbia ba ra, tawan kum purara kauhan ba baku, aras ailal kira aikuki, puram aiska bikbia, pukpuka bukuya ba wal; kutbankam nani ba tatatbia, wagin bara aras uli aula binka nani ba wal; 11 araska nani sûska ba yabalkam nani ra taiban kabia. Uplikam nani ba sord malika ra iki tikbia, playkam karna nani ba tasba ra batakbia. 12 Yuyakam nani ba âpu daukbia, diara brisma nani ba sut brih wabia, kutbanka nani ba sin slingbi âpu daukbia, bara king watla pranakira ba sin mâyara batakan kabia; walpa nani ba kabu ra lulkan kabia, utla bînka nani ba slingbi sut yakaban kabia tasba ra. 13 Baku lamwanka nani binka ba âpu daukamna, bara arpkam nani binka ba kli walbia apia. 14 Walpa lipni kum baku mai daukamni, plis kum ra tân lâwbia dukiara swin ba baku, bara man kli tawankam ba paskma apia. Yang, Dawan ba, aisari; yang, Dawan, kasak aisisna. 15 “Yang Dawan sna ba, Tiro ra wisni: Kabu kuntrika nani ba naha kauhaia ba binka wali tatatwi kabia, baha insauhkanka upla nani iki tikanka ba dukiara, inanka nani ba tilara. 16 King nani kabu wina ba sut batakan kabia, bara ai prâka maman nani ba sut dakbi bribia; sibrin tara ba mita tasba kat iwi kabia, awar bani sibri mita tatatwi kabia bara baha nani kaiki sibrin takbia. 17 Bara witin nani lika upla pruan bikaia lawana na aiwani maikbia: ‘¡Nahki muni man na naku mai sauhkan, nahki muni kabu wina lap tiwram, upla mai kakaira tawanka! Man, uplikam nani aikuki, karna pali katma ba kabu ra; kabu aiska ra upla sibrin tara mangkatma ba. 18 Nanara man kauhram bamna, kabu kuntrika nani sut ba sibrin mita tatatwan. Nanara âpu takram bamna, kabu kî dakura nani ba sirang iwan.’ 19 “Kan yang, Dawan, baku aisisna: Yang mai sauhki mai swiaisna, tawan kum upla kumi iwras ba baku. Daukaisna kabu laya tihuka ba puramra prakaia, 20 bahara man rungkma upla pruan nani bâra ba kat. Tasba ba wina kau tihu tara ra mai lulkamni, bara kuntri ba sauhki tikbia ba baha nani pat pruan nani ba tilara iwi kabia. Bahara upla kli âpu kabia, kli sin tawanka ba paskan kabia apia. 21 Diara kum sibrinkira ra mai lakamni, bara tasba ba wina sin mai sakamni. Mai plikbia, bara mai sâkbia apia. Yang, Dawan, kasak aisisna.” |
© 2010 Bible Society in Nicaragua
Bible Society in Nicaragua