Isikiel 23 - DAWAN BÎLA AISKA

Sameria bara Jerusalem wal ba, muihni saura dadaukra nani sa

¹ Dawan ba yang ra balan, bara ai win:

² “Piua kum mairin wâl bâra kan, mairka nani ba yapti kumi luhpia.

³ Tiara wina, naha mairka wâl na ur takaia warkka ra diman; Idsip ra yaban ai tialka ba taibi swapni daukan bara sunu kan lâka ba tikan.

⁴ Almukka ba nina Oholá (Sameria tânka); bara ai muihni Oholibá (Jerusalem tânka). Yang bui witin ba mayi briri, bara luhpa mairin, waitna nani baiki aikan.

⁵ Oholá ba kasak apia kan, bara ai lila nani wal ai âuyapah lihki kan, Asiria aiklaklabrika nani wal;

⁶ ai kwalka balianta, sut ba tâ brabrira, tawan lalka, wahma pranakira, sut ai araska ra ulan sa,

⁷ ¡Asiria wina bâk sakan nani baman! Oholá baha nani wal ur mairka takan, ai aidulka nani dukiara sin ai âuyapah kan, bara mâyara iwan baha nani ra mayuni kan bamna.

⁸ Idsip ra kan wina rug mairin takan, bara sip swiras kan ai natka ba. Tiara kan wina ailal pali, witin wal prawan bara sunu kan lâka ba tikan.

⁹ Bahamna ai lila nani mihta ra swiri, Asiria uplika nani ra, baha nani dukiara ai âuyapah takan,

¹⁰ bara witin nani mita sunu kan lâka tikan; ningkara ai luhpia mairin bara waitna nani ai mihta dakban, bara witin nani ra sord malika ba wal ikan. Baku natka ra ai lâka daukan, witin mapara. Bara ai tânka ba tara takan mairin nani tilara.

¹¹ “Ai muihni Oholibá naha kaikan, ban sakuna ai muihni wal, kanra ur takan kan ai âuyapah kira.

¹² Witin sin Asiria uplika dukiara ai âuyapah takan, baha nani sut tâ brabrira nani, tawan lalka, aiklaklabra, kwala prana dimi, ai araska ra uli, wahma pranira nani.

¹³ Daira walri witin sin tâski takan kan, ai muihni daukan ba nina blikan bamna.

^14-15 Sakuna witin kau laihura wan, ur taki lâka ra: utla tnaya ra Babilon lilka nani kaikan, kusbi bara pauni ni ulban kan; sut ba suldiar tara nani baku lâka daukan kabia, ai maisa wilkaika bara ai nana wila ba dukiara.

¹⁶ Naha Babilon wina nani kaikan ba ra, ai lilia takan witin nani dukiara; bara bîla twatwilkra Babilon ra blikan;

¹⁷ bara Babilon wina nani ba balan ba ra, witin wal aitnikan bara ai maya kan baku wal ai latwanka lâka daukan; ur taki tâski takan. Uba pali ur takan ba ningkara waitnika ra want apia, aikaban daukan.

¹⁸ Baha ningkara upla mawanra ur takan; ai wîna aiska ba kwala luha taki, upla nani ra marikan; yang aikaban ai daukan ba kat, kainara muihnika dukiara aikaban ai daukan ba baku.

¹⁹ Kuna kau ban ur lâka ra taukan, tiara kan piua ra ai kupia krauki, Idsip ra ur taki kata ba,

²⁰ Idsip uplika nani mita rug takaia lâka ba smalkan, bara witin wal laik takan, ba mita rugka lâka dauki ba biriku bara aras nani baku sa.

²¹ “Man, Oholibá, tiara piua ra lukras pali taukram ba ra kupiam krauki katma, Idsip uplika nani bui tialkam siapi puli kan ba.

²² Baku bamna, yang Dawan sna ba, naku wisni: Yabrika lilam nani sîam takan ba, kli waihlam takan kabia. Plis sât sât wina mampara buaia daukamna,

²³ Babilon bara Caldea uplika nani, Pecod wina, Soa bara Coa wina, Asiria uplika sut; witin nani ba wahma painkira, tâ brabrira, tawan lalka, suldiar lalka bara aiklaklabra nani; witin nani sut aras ra uli nani ba sin,

²⁴ mampara balbia; wagin nani ailal bara suldiar kwâra tara; plis sât sât wina bal mai kutbia; bara ai lal prakaika bara kaina kahbaia sin, yang mita raitka yabamni lâmka daukaia, bara witin nani lâmka daukbia dîa ai lâka natka ba kat.

²⁵ Yang kupi lawanka tara ra kupi baiwanka blikamni, bara witin nani mita kakmam, kiamam nani ba klakbia, bara baha nani tâka raya swin nani ba, sord malika ra ikan kabia. Luhpiam waitna bara mairin nani ba mihtam dakbi brih wabia, baku ba ra pauta lapta ra kauhbia bara âpu takbia.

²⁶ Kwalkam nani bara walpa klauhi dukia nani brisma ba sut mihtam dakbi bribia.

²⁷ Baku danh takbia man prikam lâka bara urkam lâka Idsip mihta ra aimakram ba bara kli Idsip uplika nani kaikma apia, witin nani ra sin kupiam kraukma apia.

²⁸ “Naha yang, Dawan, mai wisni: Man nisan nani ra misbara kaikisma ba karnika mihta ra mai mangkamni, man mita sîa aikaban mai dauki ba.

²⁹ Witin nani mita misbara mai kaikbia, wark taki briram ba witin nani sut pali bribia, bara susu mai swibia; wînam tara kwala âpu mai swibia, baha ni rug lâka daukram bamna. Uba pri kaia lâka ba man briram, rug lâka sin,

³⁰ baha tâka mita sika naiwa man ra baha diara taki ba, kan man ur takaia lâka daukisma ba mita, baha nisanka nani aidulka ra mayunram bamna mâyara kauhram sa.

³¹ Man muihkam wapanka nani nina blikram; baha mita sin kapka diaia yâri ba, baha man sin dima.

³² “Naku wisni, yang Dawan ba: Man sin muihkam din kapka ba dima, kâp kum tara, yahpa bara tihu, lawaska kikan bara bahki kulkan ba wal banhwan,

³³ batakan bara sauhki tikan lâka ailal. Baha sika muihkam Sameria kapka ba, baha wal bla taki latwan wahwi kama.

³⁴ Âpu pali sut dima, baha ningkara yuya man daukma bara tialkam ba kalkma. Yang, Dawan, aisari; baha yang aisaia wîri.

³⁵ “Baha mita, yang Dawan sna ba, naku wisni: Man bui yang ra âmya ai tikram bara ninam ba yang ra lakram, bamna klala pât nani ba wahwaia sma uba pri kaia bara ur takaia lâka briram ba mita.”

³⁶ Dawan bui ai win: “Man, upla luhpia, ¿want sma Oholá bara Oholibá mapara lâka daukaia? Baku bamna mawan kat wis ai daukanka saura nani dauki ba.

³⁷ Witin mita lukras ai sakan bara ai mihta nani tâski daukan tala laikan bamna. Sip lukras ai sakan aidul ra mayunan man, bahara kulkanka yaia wisi ai luhpia waitna nani sakripais daukan pauta ra, baha luhpia waitna nani witin wal briri ba.

³⁸ Baha purkara, naha nani daukan yang maipara: sim yua ra, tempelki holi ba tâski daukan bara ris briaia yua ba sin kulkras kan.

³⁹ Bara sim yua, ai luhpia waitna nani, ai kulkaia wisi aidul ra sakripais daukan, baha yua witin nani tempelki holi ra bal tâski daukan. ¡Baha sika yang waitla pali ba kat tâski daukan ba!

⁴⁰ “Bîla twatwilkra blikan upla nani ra wiaia, plis laih wina balbia; bara witin nani balan. Witin nani wâl ba aihtaban, bara ai nakra tamaya dingkan bara ai mihta ra bangkil mangkan yamni briaia dukiara;

⁴¹ krikri painkira kum ra iwi banhwan, bara tibil ba ridi kan, bahara mangkan kan sîka kîa yamni bara batana yamni munan ba sin, yang warkki daukaia.

⁴² Upla kwâra winanka ba wali banhwi kata, lilia dauki kan ba; waitna nani balan kan ba, upla iwras tasbaya wina kata; baha mairka nani ra sakahki kan mihta ra bangkil nani mangki bara lal ra sin, kraun painkira nani mangkan.

⁴³ Bara yang wîri: ‘Nanara witin nani, baha rug mairin nani, waitna rugkira nani mita sut sauhkan ba aikuki ai warkka daukaisa. ¡Upla wala apia, baha mairka wâl yaba sika!

⁴⁴ Kaiks witin aula, Oholá bara Oholibá ra, pri mairin nani, sim rug mairin nani ra upla nani auya ba baku.’

⁴⁵ Sakuna upla kasakkira nani mita witin nani bui witin dîa briaia ba marit lâka sasauhkra nani upla âikra nani mapara lâka dauki pât ra lakbia. Kan witin nani ba marit lâka sasauhkra mairka nani, bara mihta nani ba tala ni yukan sa.”

⁴⁶ Dawan ba naku wisa: “Upla nani ba sut asla dauki, witin mapara bus, bara yas sibri kabia bara impliks.

⁴⁷ Upla nani sut ba walpa ni sabi ikbia, bara sord malika ba wal sabi tâ walak sâks; luhpia waitna nani bara luhpia mairin nani ba iks, bara watla nani ba sin angks.

⁴⁸ Yang naha kuntrika ra daukanka saura nani ba, yabrika âpu tiwbia bara mairin nani saura dauki, witin nani kaiki lan takbia ba nina blîkbia apia.

⁴⁹ Baha mairka wâl ba klala bribia, daukanka saura ba tâwan, bara aidul lâka saurka dauki ba mita sin. Bara man nani damra walma yang sika Dawan sna ba.”