Isikiel 2 - DAWAN BÎLA AISKA

Dawan Isikiel ra paiwisa

¹ Baha ningkara bîla baikra kum walri: “Man upla luhpia, man bus, bara man wal aisamni.”

² Baha bîla baikra ai aisi kata ba ra, Dawan karnika ba yang ra balan, bara yang ra ai bukan. Bara ai aisan bîla ba walri.

³ Witin kau ban aisi kan: “Upla luhpia, yang bui Israel luhpia nani ra mai blikisna, baha tawanka bîla walras ba, bara yang maipara buan sa. Witin nani, bara ai almukka nani sut kira maipara buan, naiwa yua kat.

⁴ Witin nani ai luhpia ba sin, lal karna bara kupia karnira nani sa; bara baha nani ra wima: ‘Dawan Gâd naku wisa.’

⁵ Witin nani mai walbia, apia kaka walras kabia sin, ban sakuna ai dahra walbia, piu sut ra prapit kum ai tilara bâra ba.

⁶ Upla luhpia, man, witin nani ra, bara dîa mai aisi ba ra sin si bripara, rahra nani kainam kir mai kutbi nani bri baku damra wali kama sin, apia kaka misri tilara iwisma baku kama sin. Sakuna si bripara witin nani mamwan kat aisi bara sirang mai iki, kasak maipara babura pali kabia sin.

⁷ Man, yang bîli nani na aisas, ban kra bîlam walbia apia kaka walras kabia, kan uya mapara babura sa.

⁸ Man, aman wals yang mai wisna na; mapara babura kapara, baha nani baku; bîlam kwâks, bara pis dîa maikisna na.”

⁹ Bara kaikri mihta kum sakban kan yang tani ra, witin wauhtaya kum ulbi blaki bri kan.

¹⁰ Mihta ba, yang maiwanra ilingkan kan, bara kaikri ulban kan, tani aiska ba: bahara ai bîla saki inanka nani, latwan tara baman kan.