Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Isikiel 17 - DAWAN BÎLA AISKA


Wain kiwka bara yakal tara ba wal

1 Dawan bîla ba yang ra balan, bara ai win:

2 “Man upla luhpia, Israel luhpia ra prakanka bîla kum wal aisas,

3 bara wis: ‘Dawan ba naku wisa: Yakal tara kum Líbano ra balan; ai tnawa nani ba tara bara yari pali kata, tnawa ba mapla sât sât bri kan. Tnawa tara ba, yalam tnawa kum ra kangban,

4 dus tnawa kau purara kan ba klakan, bara bri si diara âiatkra nani tasbaya ra mangkan, diara atkaia manis pali pliska kum ra.

5 Ningkara tasba wina mâ kum brin, bara tasba pat dâkan kum ra mangkan, lî kârma ailal pali plapi ba lamara.

6 Mâ ba urhwi takan bara wain dusa tara pali kum takan; ban pali purara apia kan sakuna, tnawa ba yakal ba tani ra driwata, ai wakia ba tasba ra kau dingki ba ra, wain dusa wala kum takan; slaunhka nani takan bara tnawa nani takan.

7 Kuna yakal tara wala bâra kan, tnawa ba tara pali kata, bara tnawa taya ailal bri kan. Bara wainka, ai wakia ba yan wan, bara ai tnawa ba, yakal ba tani ra lakan lî kau yabia dukiara, dusa mangkan kata wina, kau laihura kan.

8 Ban sakuna, tasba yamni ra mangkan kan, lî ailal lamara, ai tnawa bara ai mâ sâkbia dukiara, bara wain dusa tara kum takaia dukiara sin.’

9 “Bara yang bîli witin nani ra wis: ‘Dawan naku wisa: Naha wainka kiwka na mâ sâkbia apia, yakal kaina manis bal wakia ba daikbia. Bara mâ nani ba yaka kauhbia; upla wiria bara tâ baikanka wiria wal wakia ba daikbia, bara slaunhka raya nani taki ba sut lâwbia.

10 Kli mangkbia sin slaunhka takbia apia; lalma payaska alkbia bara lâwbia; slaunhka takaia pliska ra lâwbia.’ ”

11 Dawan ba yang ra balan bara ai win:

12 “Naha uplika mapara babura nani ra wals, tânka brisa sapa naha prakan bîla na. Wis: ‘Babilon kingka ba Jerusalem ra balan, bara Juda kingka bara tâ uplika wala nani sut ra silak ra brih wan Babilon ra.

13 Bara king luhpia kum wal wilkanka daukan, taibi muni witin wal kasak kat kaia, upla tara kulkanka bri nani sut brih wan,

14 Juda ba king lâka tasbaya kum karnika âpu kabia wisi, kli sip ai mina buaia apia, ai pramiska ba kat daukbia kra, bara ban dîa ba kat dauki kaia.

15 Kuna naha kingka luhpia na, Babilon kingka mapara buan bara kuntri lengstarka nani Idsip ra blikan, aras bara upla ailal nani makabaia. ¿Man nani lukisma ki, baha ningkara pura lubia bara pruras raya mihta wina swakwi takaia? ¿Raya swakwi takaia sip kabia, ai pramiska kat daukras uplika ba?

16 Yang, Dawan ba, rayaki wal swer takisni, Babilon ra prubia baha pramis daukan dukiara lawaska kikan ba, bara ai pramiska kat daukras kan ba, baha kingka mita king lâka ra mangkan ba.

17 Babilon kingka ba witin ra rausauhkbia ba ra, mina mangki ulaika nani ba tawan tnaya kutbanka kir ba ra paskbia, upla ailal ikbia, bara king fero sin witin ai hilpka ra suldiar karna nani ba, upla ailal sin blîkbia apia tâ baikaia,

18 kan witin pramis daukan ba lawaska kikan bamna, wal lâ daukan kata ba kat daukras kan; pramis takan kuna sut daukras kan, bamna rayaka wal swak takbia apia.

19 ‘Yang, Dawan ba, rayaki wal swer takisni: witin pramis ai daukata ba daukras kan, bara wal lâ daukata ba sin kulkras kan; bamna dîa daukan ba dahra makabamna.

20 Witin purara iliski ba wauhamni, baha wal alkamna; Babilon ra brih wamna, bara bahara lâ ra dingkamna yang wal kasak apia kan ba tâwan.

21 Ai suldiarka nani kau yamni ba war ra prubia, ya kau raya kabia ba pâsa mina walhwal ra yakabia. Baku damra walma yang, Dawan, aisisna ba.

22 ‘Yang Dawan sna ba, naku wisni: Yalam dusa kum purara ba alkamna; slaunhka kau purara ba krikamna ba ra, yang pali il kau tara ba purara mangkamna,

23 Israel ilka kau tara ba purara. Tnawa takbia, ai mâ sâkbia, bara yalam pranakira takbia. Daiwan sât sât nani baha munhtara raya kabia, piawira sât sât ai watla mâkbia baha tnawa distika ra.

24 Bara dus nani sut ai dahra walbia, yang sika Dawan sna ba. Yang ba dus kwakwalhra ra batakisna bara dus sirpi ba yabri pâwisa. Yang dus kura ba yâri lâwisa, bara yabri dus lâwan ba kli sangni takisa. Yang, Dawan, baku wisni bara daukisna.’ ”

© 2010 Bible Society in Nicaragua

Bible Society in Nicaragua
ကြှနျုပျတို့နောကျလိုကျပါ:



ကြော်ငြာတွေ