Isikiel 14 - DAWAN BÎLA AISKA

Aidul nani ra kulki mayuni ba mapara

¹ Israel almukka nani kum kum yang ra balan, bara yang maiwanra iwan.

² Baha ningkara Dawan ba aisisa bara ai win:

³ “Upla luhpia, naha uplika nani na aidul lâka ai kupia ra mangkan, bara ai saurka ra ai mina pruki kauhaia ba ai kainara mangkan. ¿Baha nani dukiara natka kum ra yang makabi walaia sna ki?

⁴ Witin nani aikuki aisas bara wis: ‘Dawan naku aisisa: Ya ya uplika, Israel luhpia nani tila wina, aidul nani bri ba ra ai kupia mangki bri ba, ai mina prukaika warkka ai kainara mangki bri yaba, prapit ra ai pura suni walaia balbia ba ra, yang pana witin ra aisamna, witin aidulka ailal bri ba natka kat.’

⁵ “Israel luhpia nani sut kupia alkamna, witin nani ba yang wina dakwi taki banhwan ba ai aidulka nani dukiara.

⁶ Baku bamna, wis Israel luhpia nani ra: ‘Naku win Dawan ba: Kupiam laks, bara aidulkam nani ba wina taws, bara mamwan ba wauhi laks diara yamni kaikras lâka sut ba wina.’

⁷ Israel uplika kum, apia kaka upla tringsar kum Israel ra iwi ba, yang laima wina taki wan bara ailal nani bri bara aiska pali tâwan ai pura suni ba, witin ra munan saura dauki bâra kaiki ba, bara baha wina kli prapit kum ra wih ai pura suni ba yang ra ai pura sunaia wisi, yang mita witin ra aisamna.

⁸ Yang maiwan baha uplika wal prawamna, bara klala kum yabamni upla sut kaikaia, diara kum upla sut aisabia, uplika ba sin upliki nani tila wina sakamna. Bara man nani damra walma yang sika Dawan sna ba.

⁹ “Bara prapit kum kunin munbia kaka, bara sturi aisabia ba, yang Dawan kunin munri kabia, baha prapitka ra; bara mihti sakbamna yang upliki nani ra bara klala yabamni, bara sauhki sin âpu tikamni Israel luhpia nani tila ba wina.

¹⁰ Sut saurka tâwan klala yabamni: baha saurka tânka pliki kaikan ba, baku kabia prapit nani sin.

¹¹ Israel luhpia nani ba yang laima wina kli taki waia apia, saurka lâka bara kli tâski takaia apia dukiara. Witin nani ba yang upliki nani kabia, bara yang lika witin nani Gâdka kamni. Yang, Dawan, kasak aisisna.”

Jerusalem ba aitani sa klala yaban kaia

¹² Dawan bîla yang ra balan bara ai win:

¹³ “Kuntri kum yang maipara saura daukbia kaka bara yang wal kasak apia kaka, yang mihti sakbamna witin nani purara klala yabaia, bara pata piaia ba dakbamni, bara witin ra plun wahwan blikamna, bara yang munrika upla nani bara daiwan nani ba pruaia.

¹⁴ Bara naha waitnika yumhpa na wan tilara kan kaka, Noa, Danel bara Job, witin nani yumhpa baman ai kasakka ba mita, ai rayaka nani baman swaki sâkbia. Yang, Dawan, kasak aisisna.

¹⁵ “Bara kuntri bîla bâk daiwan wail yaka lubia kaka, upla iwi nani ra âpu daukbia, bara upla iwras tasbaya takbia, upla kumi sin bâk lubia apia, daiwan wail ba sîa.

¹⁶ Bara baha waitnika yumhpa, witin nani tilara kan kaka, ai luhpia waitna bara ai luhpia mairin sin swaki sâkbia apia; witin nani baman swakwaia kan, bara kuntri ba upla iwras tasbaya takbia. Yang, Dawan ba, rayaki wal swer takisna.

¹⁷ “Apia kaka, baha kuntrika purara war blikamna kaka, adar yamna upla nani bara daiwan nani ba sut ikaia.

¹⁸ Bara baha waitnika yumhpa ba baha uplika nani tilara bâra kabia kaka, ai luhpia waitna bara ai luhpia mairin nani sin witin nani sip swaki sâkbia apia; witin nani baman swak takbia. Yang, Dawan, yang rayaki ni swer takisna.

¹⁹ “Apia kaka siknis blikamna baha kuntrika ra, bara kupi baiwan ra prura mâ ba bahara mangkamna, upla nani bara daiwan nani sin pruaia,

²⁰ bara baha nani tilara Noa, Danel bara Job sin, bâra kabia kaka, ai luhpia waitna bara ai luhpia mairin nani sin swaki sâkbia apia, witin nani baman swakbia witin nani kasak ba mita. Yang, Dawan, yang rayaki ba ni swer takisna.

²¹ “Yang Dawan sna ba, naku wisni: Kau saura kabia Jerusalem mapara klala saurakira walhwal blikamna piua ra: war, plun wahwan, daiwan wail nani bara siknis saura nani, bara ikri upla bara daiwan nani sut ba.

²² Upla wiria man raya takaskbia, bara baha wina ai luhpia waitna bara mairin brih taki wabia. Ansa piua ra man nani ra wabia ba ra, kaikma nahki man nani wal iwan ba, bara diara man nani wal daukan ba, bara klala ba wina maisa nihkan kabia, Jerusalem purara bri balri ba.

²³ Witin nani ai maisa nihkan kabia, baha dukia nani witin nani daukan ba kaikbia ba ra. Baha ningkara man tâinka brima Jerusalem ra yang baku daukri ba tânkas daukras sna ba. Yang, Dawan, kasak aisisna.”