Isikiel 11 - DAWAN BÎLA AISKA

Jerusalem pâtka ba

¹ Gâd karnika ba ai bukan bara ai brih wan, Dawan tempelka dimaia lalma tani kat. Durka ra 25 waitna bâra kan, baha tilara kaikri Jaazanías, Azur luhpia ba, bara sin Pelatías, Benaías luhpia, tawan lalka bâk sakan ba.

² Dawan bui ai win: “Naha nani sika upla ikaia baman luki ba, bara naha tawanka ra saura daukaia baman luki ba sin.

³ Aisi banhwisa: ‘Watla nani kli mâkan ba wina uya wihka pali apia sa. Nahara yawan swak takan lâka ra sa, wîna dikwa bilara ba baku.’

⁴ Baha mita, yang nini ra smalki wis.”

⁵ Bara Dawan spiritka ba yang ra ai diman, bara ai win yang aisamna: “Naha Dawan aisisa: ‘Israel luhpia nani, baha sika man nani lukisma ba. Lukankam ba yang kakaira sna.

⁶ Pruankam nani ba kau ailal daukram naha tawanka ra, bara yabal nani ba pruan nani ni banhkram.

⁷ Baha mita yang, Dawan ba, kasak mai wisni: Jerusalem ba dikwa kum baku kabia, sakuna wînka ba man nani apia kama, baha nani ba man nani mita ikram nani uplika kabia, kan man nani lika dikwa wina mai sakamna.

⁸ ¿War nani ra sîa brisma ki? Yabrika man nani puramra war balbia. Yang, Dawan, baha ba kasak mai wisni.

⁹ Man nani mampara lâ daukamni: Naha wina man nani ra mai sakamni bara upla tringsar nani mihta ra mai mangkamna.

¹⁰ Sord malka ra pruma. Yang bui Israel tasbaya piarkika ra lâmka daukamna, bara damra walma yang sika Dawan sna ba.

¹¹ Tawan ba man nani dakawam baku takbia apia, man nani sin wîna takma apia. Yang bui man nani lâmka daukamni Israel tasbaya piarkika ra.

¹² Bara damra walma yang sika Dawan sna ba; kan yang lâika ra taukras kapram bamna, yang lâ yabri ba bîla walras, kuna nisan wala nani kir mai bri ba natka kat man nani dauki banhram.’ ”

¹³ Dawan nina yang bui man nani ra kau aisi kapri, Pelatías Benaías luhpia ba kauhi pruan. Bara yang maiwanra tasba kangbaia kat bawri, bara bîli baikra tara saki winri: “¡Ay, Dawan! ¿Israel kiamka wiria takaskan ba âpu daukaisma ki?”

Gâd lâ raya kum maisa pakisa

¹⁴ Bara Dawan bîla yang ra balan bara ai win:

¹⁵ “Upla nani Jerusalem ra iwi ba Israel luhpia nani dukiara aisisa, man nani tawankam uplika nani ra wisa: ‘¡Witin nani ba Dawan wina laihura sa! Yawan nani ra lika, kuntri ba wankan yawan baha dawanka takaia.’

¹⁶ Baku mita, wis: ‘Naku wisa Dawan ba: Yang mita kangbi sakri, bara tasbaya aiska ra yakabi kir lakri, kuntri tringsar nani tilara, sakuna naha sât na piua kunhku baman kabia. Nahara yang sika, witin nani kutbanka painkira kum kamna ani tasbaya ra wabia sut ra.’

¹⁷ Baku sin wis: ‘Dawan ba naku wisa: Yang mita yabrika kli tawi balbia, baha kuntrika bara nisanka nani anira yakabi kir lakri ba wina, bara asla daukamni bara Israel kuntrika ba maikamni.

¹⁸ Witin nani kli tawi balbia ningkara, ai kuntrika ra diara saura nani dauki ba sut âpu daukbia, diara yamni apia nani witin ra ba sin.

¹⁹ Yang bui kupia karna walpa baku ba sakamni, bara kupia raya kum yabamni bara spirit raya kum sin yabamni.

²⁰ Baha ningkara witin nani ba yang lâika bara adarki nani daukri ba kat iwbia, bara witin nani mahka alki daukbia. Witin nani ba yang upliki kabia bara yang lika witin nani ai Gâdka kamna.

²¹ Sakuna baha nani saurka ra iwi nani ba, bara upla yamni kaikras nani ba, yang mita makabamni ai daukanka saura nani mana aibapaia. Yang, Dawan ba, kasak mai wisni.’ ”

Dawan prana ba Jerusalem wina sakisa

²² Rayaka bri nani ba ai tnawa buki pâlan, bara wilwaika nani ba sin witin nina blikan. Bara Israel Gâdka prana witin nani purara kata ba sin,

²³ baha sin tawan ba purara wina taki pâli laihura wan tawan lalma tani ra ilka ba purara kaia wan.

²⁴ Tisku Gâd karnika bal ai bukan, bara kli ai brih wan Babilon ra, tasbaya wina sakan uplika wala nani bâra kan ba tilara naha takan, kan lilka kum Gâd spiritka mita ai marikan ba mita. Ningkara lilka ba kli lap tiwan.

²⁵ Bara aisari alba nani ra Dawan diara nani ai marikata ba sut.