Isikiel 1 - DAWAN BÎLA AISKA

Gâd iwaika ba marikan

^1-3 Yang, prîs Isikiel, Buzí luhpia waitna, Quebar awala un ra yu aiska kum bâra katna Babilon ra, upla nani alba brih wan nani ba tilara. Baha piua ra purara kasbrika ba kwawan, bara Gâd kaikri lilka nani bâk. Piua ba baha manka ra pat kati walhwal aimakan, yua matsip ra diman kan, bara baha kat pat 30 mani alkan; baha piua tilara king Joaquín alba lâka ra brih wan ba mani matsip alkan.

⁴ Baha ningkara kaikri, yahbra wina prari, pâsa karnakira kum aula kan; bara kasbrika tara kum wina pauta klauhan kum taki kan imyula baku. Bara ai kaina kir ba ingni tara dingki bri kata. Pauta klauhi ba lilapas ra bras ingni tara bri ba bâk klauhi kata,

⁵ bara lilapas ba ra, rayaka bri lilka walhwal bâra kan: baha nani ba upla talia kan.

⁶ Kumi bani ba mawan walhwal bara tnawa walhwal bri kan;

⁷ witinka kuhma ba wapni kan, bara mina sûska ba bîp mina baku kan, bara bras pain pali kusbi daukan baku lipi kan.

^8-9 Ai mawan walhwal, ai tnawa walhwal bri ba purkara, naha rayaka bri nani ba, upla mihta nani sin bri kan ai tnaya walhwal ra, ai tnawa nani mununhtara sin. Ai tnawa nani ba wal pana pana prawi kan. Wapi tauki bara ai tnawa nani ba wal aiblakras kata, ai kaina kat wapi kan.

¹⁰ Rayaka walhwal mawan ba naku kan: tâura mawan ba, upla kum mawan bri kan; ai aihkika tani ra ba, layan kum mawan; ai smihka ba, bîp wainhka kum mawan; bara nina tani ba yakal kum mawan.

¹¹ Tnawa nani ba pura tani ra uli wan kan. Tnawa wâl ba pana pana prawisa, bara tnawa wala wâl nani ba, ai wîna tara ba praki kata.

¹² Bara kumi bani ba wapi kan ai tâ kat kli ai ninara kli tawras bara anira waia Gâd karnika mita brih auya ba tani ra.

¹³ Baha rayaka bri nani daukan ba, masku ami baku, apia kaka, pauta klauhanka baku tauki kan, yang nani tilira. Bara naha pata klauhan ba, imyula baku kan.

¹⁴ Bara naha rayaka bri nani ba plapi wih kli plapi baku kata, imyula baku.

¹⁵ Baha nani rayaka bri ba kaikri ba ra, ai mina taibi ba ra kaikri, ai tnaya bani ra, wilwaia kum bâra sa.

¹⁶ Wilwaika walhwal nani ba wal kumi baku kan bara ai warkka dauki ba, walpa klauhi kum baku kata, bara wilwaika kum wilwaika wala bilara baku kan.

¹⁷ Baha walhwal nani ba sip kan ai tâ kat tauki kaia, kli ai ninara tawras pali.

¹⁸ Kaikri wilwaika walhwal nani ba bilara wilwi tawaia wala nani bâra kan, bara baha tnaya kir ba sut ingni lakwi kan.

¹⁹ Baha nani rayaka bri ba ai kanra auya ba ra, wilwaika nani ba sin aikuki ai kainara wan, bara rayaka bri nani ba buya ba ra, wilwaika nani ba buki kan.

²⁰ Baha nani walhwal ba anira waia Gâd karnika mita brih auya bara wilwaika nani ba sin aikuki buki kata, kan baha wilwaika ba sin witin nani rayaka pîska kum sa bamna.

²¹ Rayaka bri nani ba tauki kan ba ra, wilwaika nani sin tauki kan, baku sin witin nani takaskuya ba ra, wilwaika nani ba sin takaski kan; bara rayaka bri nani ba buya ba ra, wilwaika nani sin aikuki buki kan, kan baha wilwaika nani ba sin witin nani raya pîska kum sa bamna.

²² Baha nani lal pura bâk kasbrika pura sangnika tara ba sâtka baku bâra kan, ingni aihwa pali glas baku.

²³ Baha kasbrika pura sangnika tara baku ba munhtara rayaka bri nani ba ai tnawa nani wapni ilingki kan, kumi wala ra kangbi ni. Bara ai tnawa wala wâl kan ba ni ai wîna aiska ba biki kan.

²⁴ Witin nani ai kanra auya bara tnawa nani binka dauki kan ba sin awala lisamra tara aubi ba binka baku kan. Karnika sut bri ba bîla baikra baku, aiklaklabra nani ailal aula binka ba baku. Witin nani takaskuya ba ra, ai tnawa nani ba sin mâyara iki kan.

²⁵ Witin nani lal purara kasbrika bâra kan ba nina bâk bin kum takan.

²⁶ Kasbrika pura sangnika tara baku ba purara kaikri diara kum bâra kan king iwaika kum sapair ni daukan baku kan. Baha iwaika baku paskan ba purara upla kum bâra kan, witin ba waitna.

²⁷ Ai maisa wina pura tani baku ba ra kaikri, ingni mita lipi kan bras karna baku, bara pauta klauhan lama kir kan. Maisa wina mahta tani ra kaikri pauta klauhan baku kan. Ai kaina kir ra, ingnika tara kum bâra kan,

²⁸ sim kumadura kasbrika ra lî auhi piua ra taki baku. Naha natka ra, Dawan prana ba yang ra bal takan. Yang baha kaikri ba ra, laila bawri tasba kangbaia prais kat.