Inanka Nani 5 - DAWAN BÎLA AISKA

Inanka matsipka ba

¹ Âmya ra luki bas Dawan, dîa yang nani ra takan ba; tawi wan kaiks, bara kaiks nahki wan swira paski ba.

² Duki nani sut upla sât wala nani mihta ra tawan sa, waitla nani sut ba tasba wala uplika nani baman bal brin sa.

³ Yang nani rau takri, aisikas; yaptiki nani sut piarka nani baman takan sa.

⁴ Yang nani laiya pali sin, atki banhwisna; yang nani paita nani sin, atki banhwisna.

⁵ Wark bîpka dusa ba, yang nani naina ra mangkan sa; yang nani swapisna, sakuna ris briaia piua aikras sa.

⁶ Yang nani mihti nani sakbisni Idsip uplika nani ra, Asiria uplika nani ra sin, plun piaia aikbia dukiara.

⁷ Papiki nani mita saura daukan, bara witin nani nâra âpu sa; bara witin nani ai saurka pâtka ba yang nani brisni.

⁸ Nanara yang nani, alba nani mita wan taibi brisa, bara upla âpu sa baha nani mihta wina wan dakbi sakaia.

⁹ Rayaki pâtka tila bâk yang nani pati ba sakisna, aiklaklabra nani upla iwras tasbaya ra bâra ba tâka.

¹⁰ Yang nani wîni taya nani ba, brit angkaika watla baku lapta sa, plun tiwan mita rih wan daukisa.

¹¹ Saion bara Juda tawanka nani ra mairin bara tuktan mairin nani ba, bahki kulkan kan.

¹² Tawan wihtka tara nani ra mihta ra wilki paman sa, tawan almukka nani ra sin kulkanka yaras munisa.

¹³ Upla karnakira nani ba yan diara akbaia dukia nani wauhisa; bara wahma nani lika pauta dusa wirhika nani mununhtara kauhisa.

¹⁴ Nanara almuk nani âpu sa tawan tara getka nani ra; bara wahma nani sin aiwani kata ba mahka swin.

¹⁵ Yang nani kupi ra lilia bri kapri ba sut tiwan sa, dans puli kapri ba sut sarka lâka ra tawan sa.

¹⁶ Yang nani laila wina kraun kata ba kauhan sa; ¡saura pali sa, yang nani saura yâri ba tâwan!

¹⁷ Naha tâka mita, yang nani kupi ba sikniskira sa, naha nani sut tâka mita sin, yang nani naikra nani ba pukni takan sa.

¹⁸ Saion ilka ba, il kum sauhki tikan bâra sa; sikiski nani ba, baha purak wapi taukisa.

¹⁹ Ban sakuna, Dawan, man lika king aimaki ban kama; ¡iwaikam ra bâra ban kama!

²⁰ ¿Dîa kan ban pali âmya ai tikram sa ban kaia ra? ¿Dîa kan ban piu wihka lulki ai swiram sa?

²¹ ¡Man ra tawaia wan muns, Dawan, bara yang nani lika man ra tawamna! ¡Rayaki ba kli raya dauks, patitara yua nani kata ba baku!

²² Sakuna aiska pali lulki ai swiram sa; kupiam baiwanka sin tara pali brisma yang nani maipara.