Inanka Nani 4 - DAWAN BÎLA AISKA

Inanka walhwalka ba

¹ ¡Gul ba nahki muni mapla tiwan! ¡Gul ingnika lipni ba nahki muni tikan! ¡Tempel walpaya nani ba yabal un nani ra yakaban sa!

² Saion pranakira ba ai kulkanka ba gul wal ai mana kata ba, nanara slaubla dakawa baku kulkisa, sumi dadaukra kum mita warkka ba daukan.

³ Yul wail mairin nani ba sin ai luhpia nani ra ai tialka ba diaia yabisa, sakuna yang upliki nani ra Jerusalem ra kau saura munan, daiwan tnawira yahpa tara kum upla iwras tasbaya ra bâra ba baku sa.

⁴ Tiala di tuktika nani twisa ba ai darkaya kat alkisa, lî diran dauki ba mita; tuktan nani plun makabisa, kuna upla kumi sin witin nani ra yaras sa.

⁵ Baha nani plun auhni baman pi kata ba, nanara tawan yabalka nani ra kauhi pruisa. Baha nani prana lâka ra kwala balianta talia baman dimi kata ba, nanara tâski yakabi paskan puknika tilara iwisa.

⁶ Yang upliki nani watawanka Jerusalem ra saura munan ba kanra tara sa, Sodoma saura daukan ba wal, baha lika tasbaya purara upla bal aiklabras, minit kumi ra sauhkan.

⁷ Ai wihtka tara nani lika kanra sunu kan, pura wina lî auhi ba wal, baku sin kanra pihni kan tiala laya ba wal; ai wîna tara ba kanra pauni kan silbiara taya paunka ba wal, ai prana ba kanra ingni kan, walpa pranakira ba wal.

⁸ Kuna nanara witin nani ba, kanra siksa sa, tihmia tara ba wal; tawan bîla yabalka nani ra sin, upla kumi bui sin witin ra kaikras kabia. Ai wîna taya nani ba ai dusa nani kat prawan sa, ¡dus lâwan baku sin takan sa!

⁹ Baha nani aiklabaia sordka wal aiklabi ikan nani ba kanra yamni sa, baha nani plun bla prui nani ba wal, kan witin nani na tawa tawa ra pruan bamna, ai tasbaya wina plun mâ piaia sip sakras tâka.

¹⁰ Witin nani lika ai mihta pali ni, mairin nani kupia painkira nani ba, ai luhpia nani ba piakan; ai luhpia nani pali ba witin nani ai pata dauki pin, tawanki tara Jerusalem sauhki tikan ba tâka mita.

¹¹ Dawan ai lawanka tara brin, bara ai kupia baiwan laptika aiska pali ba yakaban; bara Saion kat pauta blikan, bara ai plamaika tara nani sut sin ami luan.

¹² Tasba kingka nani baku sip kasak lukras kan, tasba aiska ra king aimaki nani ba sin, waihla bara lahma nani ba, Jerusalem getka nani bâk bal dimbia.

¹³ ¡Naha sut na ai prapitka nani saurka, bara ai prîska nani watawanka nani tâka mita sa, kan witin nani tawan bîla pali kat, upla kasak nani tâlia laikan bamna!

¹⁴ Witin nani tawan bîla yabalka nani ra, nakras baku sip kasak ai dara walras kira wapi kan; tala wal tâski pali aihwa takan kan bamna, upla kumi sin witin nani ra ai mihta ni sip kangbras kan.

¹⁵ “¡Tnaya ra taws, tnaya ra taws —witin nani ra wini wisa—; baha uplika nani ba tâski sa, kangbi banhpara!” “Witin nani ba tanis plapi taukisa —idan nani wisa—, kau sip nâra iwi kapras.”

¹⁶ Dawan, witin pali mita witin nani na yakaban sa, bara kli sin tawi kaikbia apia; prîs nani ra kulkanka yaras kan, upla almuk nani ra sin umpira kaikras.

¹⁷ Wan nakra nani swapisa, kau tâ baikanka sip balbia apia ya bîla kaiki ba wina; yawan aihwaki ban bîla kaikisa, nisan kum swaki sakaia sip apia ba aula dukiara.

¹⁸ Wan mina lulkanka bani ra, waitna nani aihwaki wan kaiki kan, yawan sip takras tawan bîla yabalka ra. Wan piua tnata ba baila sa, wan yua nani ba sut kulkan sa; wan awarka ba aimakan sa, wan piua tnata ba pat balan sa bamna.

¹⁹ Waihla nani wan nina bliki ba, kanra isti sa yakal tara purara pâli tauki ba wal; wan nina blikisa il nani tilara, ¡bara wan alkaia wisi wan kainara takaski wan bîla kaikisa!

²⁰ Silak watla kat kauhan sa Dawan bâk sakan uplika ba, wan rayaka ra wingka puhbra yabi kan ba, king baha pali dukiara aisi kan ba. ‘‘Ai distika ra tawan nani ba tilara iwi kabia.’’

²¹ ¡Edom nisanka nani, kiki bas; Us tasbaya ra man king aimakisma ba! ¡Dîa tahpla diaia ba man ra sin balbia, bara man bla taki kwala luha takma!

²² Man klalkam ba danh takan sa, Saion tawanka, Dawan ba kli tasbayam wina priskan lâka ra mai blîkbia apia. Sakuna saurkam ra klala yabia, Edom tawanka, bara saurkam sut ba param ra sakan kabia.